MATHI 26
PHOMBSI

MATHI 26

26
Jisu Jühen Phaüshah Showpü
(Mk. 14:1–2; Lk. 22:1–2; Jn. 11:45–53)
1Mechem Jisui hathü peü eyei tempa, büpalei nanglomthü kü büpai, 2“Nyih nyi pheikü Hompü Mo ngoikünyüke shei amphongi nyingei nyüke, hatü Shennyak Ha shophang kü aphen nangkü lanei shuohhen” shei e.
3Hahepak kü ngongpathü hatü behethü ngongchong Kaiaphaslei shemei thai, 4hatü jomphongi Jisu joei yepei jühen phaüshah showteke. 5Shejao jomphongi, “Mo hepak kü payü neyepshah, hei nevaijema nanglakthüi mophicheü ngaikahen khih” shei e.
Jisu kü Bethanylei Mainga-i Phupü
(Mk. 14:3–9; Jn. 12:1–8)
6Shaang mechem Jisu Bethanylei Simon ngombülei shemei nyupa, 7nyüha hük phei longi wongpü vong büpü meli dük hük deiyei büpa haüdü touei uoshi nyushingkü ha yah-ei shangjing kü cheiteke. 8Shejao mechem nanglomthüi ha eepa, jomphong mongshih-ei, “Mekei ha damtüknya? 9Mehenangkü hapa meli lop longi kü yutü hapa lop taopathü kü shuohhen vaipeih” shei e. 10Shejao Jisui ha nyingei jomphong kü, “Mehekei amphongi hapa nyüha mongshanghünya? Pinnyüi ngei kü doumei dükteke. 11Mehenangkü taopathü am mü düngei nyukahen, shejao amphong mü ngei düngei nenyukahen. 12Pinnyüi ngelei büm kü ha meli cheipai pinnyüi ngei mahng vühen shing temnyu khih. 13Hingmei ngei am kü enyeih, kahdoknyü kempülei melei hapa shahjang meipü jung baonghen, pinnyüi mehe dük, ha pinnyü deih-ei dangei ehen” shei e.
Judasi Jisu Yuhahhen Mongpü
(Mk. 14:10–11; Lk. 22:3–6)
14Hapheikü anpünyi khongkü hük, üpa kü Judas Iskariot shei nyüknya, büpa ngongpathü touei peiyei, 15“Ngei amphong kü büpa lanei shuohjü ammi ngei kü mehe shuohhen?” shei e. Hanangkü jomphongi büpa kü ngin hapüan ieyei shuoh. 16Hahepak kü pangei büpai Jisu luhen lem yemei nyu.
Nanglomthü mü Hompü Mo Hahpü
(Mk. 14:12–21; Lk. 22:7–13, 21–23; Jn. 13:21–30)
17Daw Neshihpü Aan Mo shongpü nyih kü nanglomthü Jisu touei peiyei, “Hami nüng shingvaishi Hompü Mo metouei temhahhünya?” shei phe. 18Büpai, “Chingnyülei peiyei shennyak hük kü, ‘Nyuhbüi enyüke, ngelei hepak ngoiteke, ngelei nanglomthü mü ammei shemei Hompü Mo hahhünyüke shei büpa kü etuh’ ” shei e. 19Hanangkü Jisui nanglomthü kü epükei dük, hatü jomphongi Hompü Mo temteke.
20Mechem om dhüpa, büpai anpünyi mü chemi uo; 21hatü mechem jomphong hahyingei nyupa, büpai jomphong kü, “Hingmei ngei am kü enyeih, amphong khongkü hüki ngei luhahhen” shei e. 22Ha kü jomphong longi mongshang, hatü hük pheikü hük shei büpa kü, “Hingmei ngei vaila Shembüpa?” shei phe. 23Büpai, “Üpa ngei mü nükshung hük kü lak lünya, büpai ngei luhahhen. 24Shennyak Hayü büpa nang nyangei nyupükei lüdaihen, shejao üpa homei Shennyak Ha luhahhenshang onyükei! Büpa shingvaishiyü nebühpü-üng meipüba” shei e.
25Büpa luhahpü Judasi büpa kü, “Nyuhbü, hingmei ngei nevai je?” shei e. Büpai, “Nüngi eteke” shei jangei e.
Shembüpa Mo
(Mk. 14:22–26; Lk. 22:14–20; 1 Kor. 11:23–25)
26Jomphong hahying shingkü Jisui aan hük yah, hatü moihiman pheikü büpai ha bhaok, hatü nanglomthü kü shuoh hatü, “Yahtuh, hahtuh, hapayü ngelei büm” shei e.
27Hapheikü büpai shong hük yah, hatü menvih shuohtü büpai jomphong kü shuoh-ei, “Am peüi ha kübü yingtuh; 28mehenangkü hapayü longshi shing mang tükpü danghen shingvaishi haipü vangteishuwteipü ngelei iy. 29Ngei am kü enyeih, Opalei ongching kü amphong mü nyalingngupai yiü ja yinghen nyih mangngoi thahshi ngei amphong mü hapa nyalingngupai yiü nenyinghen.”
30Jomphongi kesho hük loktü Olive Kahshangei aong.
Peteri Jisu Nelahpü
(Mk. 14:27–31; Lk. 22:31–34; Jn. 13:36–38)
31Hapheikü Jisui jomphong kü, “Sheya am peü kemei ngei yakphonghen; mehenangkü ha nyangei nyüke:
‘Ngei mi yombü kü bheihen,
hatü mi khong yandaikemhen.’
32Shejao ngei yangei leipheikü ngei am shekü Galilei heihhen” shei e. 33Peteri büpa kü, “Peüi nüng yakphongjao ngei nüng neyakphongpih” shei e. 34Jisui büpa kü, “Hingmei ngei nüng kü enyeih, sheya-üng ou gashekü nüngi ngei jempa nelah-aokpih” shei e. 35Peteri büpa kü, “Ngei nüng mü dihen mü vamjao ngei nüng neyakphongpih” shei e, hatü nanglomthü peüi hapakei khan e.
Jisui Gethsemanelei Phoppü
(Mk. 14:32–42; Lk. 22:39–46)
36Hapheikü Jisui Gethsemane shei epü shing hükei jomphong mü dai, hatü büpai nanglomthü kü, “Ngei antolei phopnüng heihdainyeih; amphong hatouei uoshi chongkei” shei e. 37Büpai Peter hatü Zebedeelei cheha nyi müei dai, hatü mongshangei shangponghen chongpang. 38Hahepak kü büpai jomphong kü, “Ngei dihen mü ahshi-üng mongshangnyüke; ngei mü hatouei neshi-i uoshi chongkei” shei e.
39Maani yanei heihtü büpa kahdokei lemei shatü, “Opa, aokjema hapa shanghah yungshong ngei kübü yahlangshih, shejao ngei mongpü nevai, nüngi mongpü vaituh” shei phopei e.
40Hapheikü büpa nanglomthü touei leijashingkü jom peü shishi chongjateke; hanangkü büpai Peter kü, “Ngei mü ghonda hükao yemmü nenyuaokpü je? 41Yemmü nyutuh, hatü dokpü kü nevühen phoptuh; laangha payü monghumnyüke, shejao phai kü wong nekoh-ang” shei e.
42Shao büpa nyipabü daiyei, “Opa, ngei neyingpheikü hapa shanghah yungshong neyahlangaokjema nüngi mongpükei düktuh” shei phop. 43Shao büpa leijashingkü jom peü shishi nyu; mehenangkü jomei mükdok vihdaitü nyuteke.
44Hanangkü shao büpai jomphong tuhphongtü jempabü daiyei aihük shah eshi phop. 45Hapheikü büpa nanglomthü touei leiyei jomphong kü, “Amphong shaang thahshi shiyei nyiumeinyu je? Veituh, hepak ngoikünyüke, hatü Shennyak Ha mangthülei lak kü lanei shuohtükteke. 46Paotuh, jen daishah! Ngei luhahpüba hatouei peikünyüke!” shei e.
Jisu Yeppü
(Mk. 14:43–50; Lk. 22:47–53; Jn. 18:3–12)
47Mechem büpa shah eyei nyupa, anpünyi khong kübü hük Judas pei. Büpa mü khongnyü longpü hük yanlu hatü miyaung notü ngongpathü hatü behethü khong kübü peiteke. 48Shaang lupü shennyaki jomphong kü, “Ngei üpa kü ju kü jüpkahen, hapa shennyak yeptuh” shei nyangeihepü huhen etüktü nyu. 49Judas laülüki Jisu touei heih-ei, “Nyuhbü, meishi nyute!” shei etü ju kü jüp. 50Jisui büpa kü, “Küphü, nüngi mehe düknüng pei, ha düktuh!” shei e. Hahepak kü shennyakthü sheshalei heih-ei Jisu yepteke. 51Ngangahük kü Jisu mü nyupü khongkü hüki yan tukei ngongchongei aa hükei dhaong lüktük. 52Hahepak kü Jisui büpa kü, “Nüngei yan hülangtuh; üami yan mü yaongnya, yani mahhen. 53Ngei Opa kü vangsho phongshan haja anpünyi mü nyeishi shomhen neyüaokhen shei ammi deihnyu je? 54Shejao hapakei vamhen shei lai kü eyei nyupü mekei etü ha vamhenang?” shei e.
55Hahepak kü Jisui khongnyü kü, “Amphongü gühpa hük kü keiha ngei yephen yan hatü miyaung noshi peiküpü je? Nyihjeih ngei phopshemei uotü nyuh-ei nyushingkü ammi ngei neyep. 56Shejao hathü kemei thibüthü homei lai kü eyei nyupü jiühühen shingvaishi ha vampeih” shei e. Hahepak kü nanglomthü peü büpa yakphongtü nyaidai.
Jisu Ngongchong Touei Yaongpü
(Mk. 14:53–65; Lk. 22:54–55, 63–71; Jn. 18:13–14, 19–24)
57Jisu yeppüthüi büpa Kaiaphas ngongchong touei müei dei; hatü büpalei shemei shahkung nyuhbüthü hatü behethü thaiyei nyu. 58Shejao Peter payü khaatshi büpa phei müshi daiyei ngongchongei chingdung thahshi heih-ei hapa shahhidou mekei dohkahen shei veinüng mongei shüei veyombü mü uoshi nyuteke. 59Shaang ngongpathü hatü shahtap kü uopüthüi Jisu jühen nangkü büpa khüei shahshem denpü yemei nyu; 60shahshem denpü longi koei peijao jomi büpa nyonghühen mü meheyao nedang. Shomshi shennyak nyi peiyei, 61“Hapa shennyaki, ‘Ngei Kahvangei phopshem bentü nyih jem kü veaokhen hih’ shei epeih” shei eteke.
62Ngongchong yaongei, “Nüngi ha kü shahnyok neshuohhen je? Jomi nüng khüei denpü shuohpeyü mehe khih?” shei e. 63Shejao Jisui jek neshei. Hahepak kü ngongchongi büpa kü, “Ngei nüngü vanyangyem Kahvang touei vanghünyeih, nüngü Messiah, #Lai haneilei, “Khrista” shei eehen. Kahvang Ha vaijema hamphong kü eshih” shei e.
64Jisui büpa kü, “Nüngiang eteke. Shejao ngei nüng kü enyeih, shaang mebü nüngi Shennyak Ha Jeiyongpalei lakdah philei uotü phum shangkü yiüküpü eehen” shei e.
65Hapa shah kü ngongchongi büpalei ashak shaaktü, “Büpai eelanyüke! Jeni ha mü lenei mehe denpü nahen? Ammiyao shaang büpai eelapü danteke. 66Ammei shahphen meheang?” shei phe. Jomphongi, “Büpayü dihen shangteke” shei jangei e. 67Hahepak kü jomi büpalei dhe kü yu-opi shao, laki daüp hatü apteke. 68Jomi büpa kü, “Messiah, nüng kü üppü üpa shangkü nyingei ekühü” shei e.
Peteri Jisu Nelahpü
(Mk. 14:66–72; Lk. 22:56–62; Jn. 18:15–18, 25–27)
69Shaang Peter-ü chingshelei uoshi nyu. Chongphopü nela hük büpa touei heih-ei, “Galil am Jisu mü nüngao nyuhampeih” shei eshuohteke. 70Shejao büpai jom peü touei, “Nüngi mehe jung enya, ngei nenyingang” shei e. 71Mechem büpa shemshom touei vamjapa, lebü chongphobü nela hüki büpa eeyei pinnyü mü chemi yaongpüthü kü, “Hapa shennyakao Nazareth am Jisu mü nyuhampeih” shei e. 72Shao büpai lah-ei, “Ngei hapa shennyak nenyingnyih” shei e. 73Maani angpheikü chemi yaongpüthüi heih-ei Peter kü, “Hingmei nüngao hathü khongkü hük khih; mehenangkü nüngei shah-e ngeüshei-i hunyüke” shei e.
74Hahepak kü büpai thaüvaühen pang, hatü büpai vangei, “Ngei hapa shennyak nenyingnyih” shei e. Hahepak kü ou gateke. 75Hahepak kü Jisui büpa kü, “Ou gashekü nüngi ngei jempa nelah-aokpih” shei eshuohpü deih-ei dang, hatü büpa daiyei shahyaki thep.

Phom Naga Bible - DAÜLANGPÜ LAIHING

Copyright © 2005 by The Bible Society of India

Used by permission. All rights reserved worldwide.


Learn More About DAÜLANGPÜ LAIHING (BSI)

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.