JEREMIAH 28
28
Jeremiah ae Rachipaolawo Hananiah
1Po sükou, Judah hi veo Zedekiah nou vekou louyu po adai vei khouh angou nava Gibeon nuhdu hinou veyu rachipaolawo Azzur nahpoutu Hananiah nou napao maitao ae maisou nghoujü hinou ahi haibüa paoe, 2“Khoukhoulai Israel maivei Ramai Mapao nou haibüa paoe: Enou Babilon veo vei khouko sü souhawure. 3Po ahai lüvai hinou Enou Babilon hi Veo Nebukhadnezzar nou rathoki vei kini potayu khesü buh haihi poa dakhaive peilai. 4Enou Judah hi veo Jehoiakim nahpoutu Jehoiakin, ae Judah hinou Babilon hi nüpoa tayu mai hrülaiye sü sa-a dakhaive peilai. Enou Babilon veo vei khouko sü souha laiwure. Haisü Mapao Enou paowe.”
5Süthaisü napao maitao ae Rathoki hinou la-a buyu mai hrülai nghoujü hinou Enou Hananiah hi haibüa paoe: 6“Khupa soure! Mapao nou haisü soupei shulai touyu Enou louchewe! Nenou paoyu sü Mapao panou souvete peiyu sü soulo, ae rathoki vei kinitao alia hukhamai soua nüpoa tayu mai hrülaiye sü panou sa-a dakhai veyu sü soupei theo. 7Ana Enou ne hi paoyu ae maikhe maitao hi paoyu sü kei peio. 8Daoh raichoki ahai jünou raiyu rachipaola maitao nou soureih, tokaayu ae sounou ashi hai tyahrü taoli hi ae khouko bushoyu vedeitao hi velai tea paopei khaitoue. 9Ana kaonayu paopeiyu rachipaola maitao vei chipao sü vete loure touyu phaki, Mapao nou seita checheyu rachipaola mai-e tea popeiwe.”
10Süthaisü Hananiah nou te hinou pfüa laiyu phaodao nasü poloua daphe sasa peire, 11ae maisou nghoujü hinou Hananiah nou haibüa paoe: “Mapao nou paowe, süolouzü Babilon hi Veo Nebukhadnezzar nou tyahrütao ye panou pfüa laiyu phaodao nasü haibüa souphe peilai; ae puhnou haisü po ahai lüvai hinou soupeilai.” Süthaisü Enou tare.
12Rachipaolawo Hananiah nou avei phaodao nasü souphe peiyu teile daotuli thaisü, Mapao nou ahi ve haibüa 13Hananiah hi paopeio tea paoe, “Mapao nou paoe: Süü nou soukhai touyu phaodao nasü nenou soushare, ana süna thaosü Enou hu nou phaodao soupeilai. 14Daiolouzü Khoukhoulai Mapao, Israel maivei Ramai nou haibüa paoe: Enou tyahrü hrülai vei ngu hisü Babilon hi Veo Nebukhadnezzar vei kuvah soure vei hu phaodao sü thoupeiwure, ae puletao nou puhvei kuvah sü soulai, daiolouzü Enou rekhaona koute-a panou puhvei kuvah soure donou peiwure.”
15Süthaisü Enou rachipaolawo Hananiah hisü haibüa paopue, “Hananiah, keilo! Mapao nou ne ye seita moe, ae nenou da-a maikhe maiye panou dayu chi sü louche loure. 16Südonou Mapao nou neye sü deiphao hinou polaiwulai. Khaipo chemo jünou ne sü thai-a bailai, daiolouzü nenou maikhe maiye panou Mapao pei hi khaitya-a chi paowe.”
17Ae Hananiah sü po süna vei khoukha anai ki thaire.
Currently Selected:
JEREMIAH 28: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
