JEREMIAH 25
25
Reilova nou Ngaobamaina
1Judah hi veo Josiah nahpoutu Jehoiakim nou vekou louyu po adai navasü Judah hi maitao donou Mapao vei chipao hai ahi ve. (Süsü Babilon hi veo Nebukhadnezzar nou vekou louyu po arai na hinoue.) 2Enou Judah ae Jerusalem mai hrülai hi paoe, 3“Po kaisü koute, süolouzü Judah hi veo Amon nahpoutu Josiah nou veo soulouyu po kiasü hinou chukoute hai Mapao nou ahi paopeiyu chipao khesü Enou neletao hi soutaosou paopeie, anou neletao nou kei peibae. 4Mapao nou neletao hi puhvei kilai rachipaola maiye seive peie, ana neletao nou puletao vei chi sü keipei bare, moyuma lenou peimore. 5Puletao nou neletao hisü neletao vei hrü ashi ae mahmo souyu hinou ledalo, sükulouzü Mapao nou neletao vei poupao hi peikhai touyu teidei hinou pa neletaoye teisa nou hrülai tea paopeie. 6Puletao nou neletaoye rah kukheye tho tasou moyuma sütao vei kuvah soua Mapao vei lekha rarou soupa peiso tea nou paopeie. Neletao nou Mapao vei chi zülouyu thaio, neletaoye puhnou souvea peilai moe. 7Ana neletao nou puh chi zü bare tea Mapao nou paoe. Puh chi züre thaosü neletao nou bashara khesü tho-a puhvei lekha soupa peire ae veahoyu sü lah neletao pei hi neletao nou poveloua baie.
8“Südonou Kukulai Mapao nou haibüa paoe: Neletao nou achi zübayu donou, 9Enou reikou nou buyu tyahrütao ae akilai Babilon hi veo Nebukhadnezzar ye seive peilai. Enou puletaoye save Judah ae sühinou hrüa buyu maitao alia kinapa soua buyu tyahrü veishi hi panou soureih soulai. Enou tyahrü haina ae kinapa soua buyu hrülaiye sü teisa donou soushi souhawulai, sübüa panou ngaoposhu pi shoyu ali soupeilai. 10Süpei hinou Enou puletao hinou vasayu paila, shinghi-a khonüh nüyu sü panou soupulai moe. Puletao vei meivabvü vapulai moe ae thoudzü sü panou bupulai moe. 11Teidei teitei sü soushi souha khaiwulai, ae tyahrütao nou po rainai hai Babilon hi veo vei kuvah soulai. 12Po rainai cheyu thaisü, Enou Babilon hi veo ae sühi buyu maikhe maitaoye puletao vei mah vanou souvea peilai, ae puletao vei teidei sü teisa donou soushi khaiwulai. 13Enou raichoki nou paokhai touyu chitao, Jeremiah nou maikhe mai hi paopei khaitouyu veahoyu teitei, larübvü haihi rüthou khaitouyu veishi sü Babilon maivei teidei teitei hi panou vepalai. 14Enou Babilon sü puhnou soupfü khaitouyu büa soupeilai, sübüa panou tyahrü alao nou ae vemaitao ye panou puletaoye sü sa-a qila soulai.”
Tyahrütao Peihi Ramai nou Chikure
15Israel maivei Ramai Mapao nou ahi haibüa paoe, “Zhaoh pai haina hisü avei lekha rarou nou lathou phoukhai toue. Enou neye seitayu tyahrütao hisü pai haina hai poloua panou puletaoye kelo. 16Puletao nou hai hai ke louyu kisü, Enou puletao hi khoche seive peiyu donou puletao sü vota bailai.”
17Südonou Enou Mapao vei bah hinou pai nasü polou-a Mapao nou Eye seitayu tyahrü hrülaiye panou süsü keloue. 18Jerusalem ae Judah vei nuhdutao, alia sühi vemaitao ae peikho maitaoye panou sünasü keloue, sübüa puletaoye panou radeiki vita-a ngaopi shore donoue, ae maikhe maiye panou puletao vei zhih sü chaa soua chukoute poyu büa pore donoue.
19-26Pai hinou ke louyu mai kukhe maitao zhih sü haitaoe:
Ejipt hi veo, puhvei peikho maitao ae süthai-apei maitao;
Ejipt hi mai hrülai ae sühi hrüyu shetumai hrülai;
Uz teidei hi vemai hrülai;
Philistin nuhdutao, süolouzü Ashkelon, Gaza, Ekron ae shokhaitouyu Ashdod hi vemai hrülai;
Edom, Moab ae Amon hi maitao;
Tair alia Sidon hi vemaitao;
Mediterranean teidei hi vemaitao;
Dedan, Tema ae Buz nuhdutao hi maitao;
peishu bijüa pfüyu mai hrülai;
Arabia hi vemaitao;
radeiki hi buyu mai hrülai;
Zimri, Elam alia Media hi vemaitao;
kadouyu ae nghiki nou buyu reilova vemai hrülai.
Deiphao hi buyu tyahrü hrülai nou haisü kelai. Akhai soua Babilon hi veo panou kelai.
27Süthaisü Mapao nou ahi haibüa paoe, “Israel maivei Ramai, Khoukhoulai Mapao Enou puletaoye sü sozhimo koute kelo ae rüpakhaio, alia kaoduta-a kaishupumo koute ke khaio tea kharochi peiwe tea maikhe mai hi paopeio, daiolouzü Enou puletao hisü soureih seive peilai. 28Alia puletao nou nebah hinou poloua ke balouzü, nenou puletao hi Khoukhoulai Mapao nou puletao panou ke vuzülai tea paowe tea paopeio. 29Daiolouzü zhukhaio, Enou avei nuhdu hinou soukanghiyu vah nasü soutalai. Puletao hai souvea peipai moe tea tsüchowu? Moe, puletaoye sü souvea vuzülai, daiolouzü Enou deiphao mai hrülai hisü soureih hai seive peilai. Haisü Mapao Enou paowe.
30“Südonou Jeremiah, Enou ne hi paoyu avei chipao teitei hai shapao vuzülai. Maikhe mai hi haibüa paopeio,
‘Mapao nou ratei vanou rapalai
ae kuyu raki vanou teisü palai.
Puhnou puhvei maitao hisü aetou moa nou ralai;
puhnou darkhadzü süyu mai büa shurao soua ralai.
Deiphao hi buyu mai hrülai nou rayu pai sü choulai,
31ae rayu pai sü deiphao akhai koute khana büpo-a talai.
Mapao nou tyahrütao pei hi chikure bue.
Puhnou mai hrülaiye chi kuyu buh savelai ae mai ashitaoye southalai.’
Haisü Mapao nou paoe.”
32Soukanghiyu nasü tyahrü ali hinou ali hi shoshonou velai, ae teikhai teirü ashi sü deiphao akhai hinou vejüa nou bure tea Khoukhoulai Mapao nou paoe. 33Süzhou teithe Mapao nou southa khaitouyu thaiphao khesü deiphao kainghou ali laonou alilao koute raosa khaitoulai. Puletaoye donou mai linoua dopfü peilai moe, ae puletaoye mailinoua daovu peilai moe, Puletao hai deiphi hinou tangu-a bulai.
34Do-a kralo, süthai-apei maitao, avei maitaoye khoyu zhaokhomaitao, shusoua kralo! Dopfüa vonai hrohinou dakhaio. Neletaoye southa laiyu teile sü velaire,#25.34 Hebrew hi larücha loupu hie, ana daie paowe touyu sheesha timoe. ae neletaoye sü zhaotu ali büa dathawulai. 35Neletao nou tureipa loure bo ali-a bulai moe. 36-37Mapao nou neletao vei tyahrü ae kaonaphi-a buyu teidei sü puhvei lekha rarou hinou souhayu donou neletao sü veahoyu hinou dopfüa kra-a nou bure. 38Souveo ali nou puhvei shibvü sü thaowua tayu büa Mapao nou puhvei maitaoye sü thaowure. Soureih souyu vei ngaopiyu ae Mapao vei lekha sünou teidei sü radeiki hi souvithou peiwure.
Currently Selected:
JEREMIAH 25: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
