JOHANA 2
2
Kana khuaa inneihna
1Ni thum ni chuan Galili rama Kana khuaah inneihna a awm a, chutah chuan Isua nu a awm ve a. #Jn. 4:46. 2Isua leh a zirtîrte pawh inneihnaah chuan an sâwm a. 3Uainin a daih ta lo va, Isua nu chuan a hnênah, “Uain an tlachham ta e,” a ti a. 4Isuan a chhâng a, “Ka nu,#2:4 ‘Hmeichhia’ engah nge i lo inrawlh ve duh? Ka hun a la thleng lo a ni e” a ti a. 5Isua nu chuan rawngbâwltute hnênah, “In hnêna a sawi apiang chu ti zêl rawh u,” a ti a. 6Juda-ten an sakhaw dân, sil fai dân an tih chu an nei a, chumi dân ang chuan lung tuibêl paruk, ṭîn nga emaw, ṭîn sarih dawng vêl emaw ṭheuh chutah chuan an hûng a. 7Isuan an hnênah, “Tuibêlahte hian tui chhûng rawh u,” a ti a. A vaiin khat takin an chhûng ta a. 8Tichuan, an hnênah, “Thâl ula, fatu hotu hnênah kalpui rawh u,” a ti a. An kalpui ta a.
9Fatu hotu chuan tui uaina chang ta chu a lo tem a, khawia mi nge tih a hre lo va; tui thâl chhuaktute erawh chuan an hria a. Fatu hotu chuan moneitu chu a ko va, 10a hnênah, “Mi tinin uain ṭha an sem hmasa phawt a, tam deuh an in hnuin a narân deuh an sem ṭhîn a ni a; nang zawngin tûn thlengin uain ṭha i la vawn hi!” a ti a. 11Isuan he chhinchhiahna thil mak a tih hi Galili rama Kana khuaah a ti a, a ropuizia a lantîr a, zirtîrte chuan amah an ring ta a.
12Chumi hnu chuan, Isua chu a nu nên, a unaute leh a zirtîrte nên Kapernaum khuaah an chhuk a, chutah chuan ni tlêm tê chauh an châm a. #Mt. 4:13; Mk. 3:3.
Tempul tihthianghlim
(Mt. 21:12,13; Mk. 11:15-17; Lk. 19:45,46)
13Juda-te Kalhlên Kût hun a thleng lek lek tawh a, Isua chu Jerusalem-ah a chho ta a. #Exod. 12:1-27; Deut. 16:1-6. 14Tempulah chuan bâwng te, berâm te, pârva te an lo zuar chu a hmu a, tangka thlengtute an dawhkân bula ṭhu a hmu bawk a. 15Vuakna hruihrual ang a siam a, an berâm nên, bâwng nên, ran dang zawng zawng nên chuan a hnawt chhuak ta vek a; tangka thlengtute dawhkânte chu a nam thlûksak a, an pawisate chu a tihdarhsak a. 16Ṭhuro zuartute hnênah chuan, “Hêng hi la chhuak rawh u, ka Pa in sumdâwnna hmunah siam suh u,” a ti a. 17A zirtîrte chuan, ‘I in tâna ka ṭhahnemngaihna chuan mi ei zo vang,’ tih ziak a nih thu an hre chhuak leh ta a. #Sam. 69:9. 18Juda-te chuan an rawn chhuahchhâl a, “Hêng thil hi tihtheihna i nei tih entîr nân eng chhinchhiahna thil mak nge min entîr dâwn?” an ti a.#Mt. 21:23; Mk. 11:28; Lk. 20:2. 19Isuan, “He Tempul hi ṭhiat ula, ni thum chhûngin ka tungding leh ang,” a ti a. #Mt. 26:61; 27:40; Mk. 14:58; 15:29.
20Juda-te chuan, “Ni thum chhûngin i tungding leh ang maw? He in sak nân hian kum sawmli leh kum ruk a duh asin,” an ti a. 21Nimahsela, Isuan Tempul a sawi hi ama taksa thu a sawi a ni. #1 Kor. 6:19. 22Mitthi zîng ata kaihthawha a awm khân chu thu chu a sawi tih zirtîrten an hre chhuak leh a; Lehkha Thu leh Isua thu sawi chu an ring ta a.
Isuan mi zawng zawng a hria
23Jerusalem-a Kalhlên Kût Isuan a hman laia chhinchhiahna thil mak a tihte hmutu tam tak chuan amah an ring ta a. 24Nimahsela, Isuan anni chu a ring ve lo, mi zawng zawng a hriat chian êm avângin. 25Mi chanchin tu man an hrilh a ngai lo, an thinlung chhûnga awm chu a hre si a.
Currently Selected:
JOHANA 2: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.