ROMIA 15
15
Naan Daksaa kma Ktlok Plung Kapngam
1Ksowl do pchaan ma kuhur ṭhi rangki nnenna nruwn ktang, ungta nen ndaksaan ning thlunna rang pme; 2nen miipum ktaiji mma mma veen ṭhat nra, mukpunchoi nra tlot pik inche. 3Mleija Khrista va mdaksaa mthina ki mning thlunna tlome; pdainu mdo kjit dok lulungi, “Nah akrai kcharek dorai ava Nei kleen ktla a.” 4Mleija Laaika thungki chodu cho dilli mdo kjit dok ava nen mido tukso naan kurthuwk so, ditta plung krip mer leh kursoppi Laaika tbin psuk in. 5Jisu Khrista tu kilṭhi ngi khat leh khat plung khdaat plung knet ungta kuksop tu kilṭhi ngi a am nraan Isowr ri aju rot pik inso, 6mleija krowl khdaatti kirchin da, nenki Mukpu Jisu Khrista ki Mpah Isowr ava naanni apanpaak chaan.
Ktlok Chatirek tummi Kṭha Paumin
7Ava leiji Isowr laarnee tummi Khrista ngi naan ado tkowl chaak in heppi, khat leh khat ekurkowl chaan. 8Mleija npuhle hin mdo piik dok paureel ava mnet bet nra, Isowr ki kindit deek ava mdo tdet nra, Khrista ava vunmor kreen rek sra owrri kurjung dinu neiji naan hin kthe chaakka. 9Ungta Mma wonsat leiji ktlok chati rekki Isowr mdo panpaak chaak nraanki. Mdo kjit dok hava lulu,
“Ava leiji Nang nga neiji ktlok chati rek thungki apanpaak nikdi, ungta Nah miing nga laa ngi thee nikdi.”
10Ungu veikhat nowlli theda,
O ktlok chatirek,
Mma miirek tu kilṭhi ngi apanpaak chaan.”;
11Ungta veikhat nowlli,
“Ktlok chatirek, akheng inni Isowr apanpaak chaan,
ungu mii mkheng ngi Mma apanpaak chaso”;
12ungta kheel setti Isaijah
ngi theda,
“Ktlok chati rek leen kpaal rangki,
kthuwk Mma ava Jessi arjuwng thungki kthleng;
Mma hin ktlok chati rekki plung ngi kbin
psuk chra.”
13Pthla Kchiir rutanki plung ngi kbin mnem set set nra, plung ngi bin inti ado rin chaak in Isowr ava ngi kanpa leh kdaai aju pdim pik chaan so.
Plung Ktangarri Poul li mdo Kjitna ki Mlei
14Ku u knaorek, nei kdak kat rukka naan mlei thung ngi kning kthlung kcha a, mleija naan adaksaanna kṭha ava ngi kurkhumda, mkheng kdei ava ngi dim chda, ungta khat leh khat kpurchuk pchaang inti nu. 15Pdainu naan dobin phaak ra mkinreel angṭhe akikjit pik inna, mleija Isowr ri nei kihin mdo tpiik plungnee ngi, 16ktlok chati rek tlaaidown ava pthla kchiir ri mdo tpinchel dok talo kro kdingi thiimpu nong thung ngi kṭha paumin nong ktlo khatti soklou neiji plung ktangarri kthe chaakka. 17Isowr ri mlei kurthuwkda knong tlot ava Jisu Khrista thu napal kdo tlot kat ra. 18Mleija ktlok chati rekki kthe kupṭoi mkurthut nraan, nei kthung ngi Khrista doparman dok ava kma donle neiji do khat lee pre the chni maang. Pauna leh mnong tlotti, 19titinna rek leh tngana rek rutan ava pthla kchiir rutanni, Jerusalem kingi lamkla ngi kowlda Ilirikiam kpha neiji Khrista ki kṭha paumin ava kurkhummi paryaam chnu, 20Khrista miing mdodee nmaan liit thu, ktlok miilai khatti ber kcho mdo phun na thung neiji kṭha paumin kparyaam rangki ptuwn chnu,
21pdainu mdo kjit dok hava lulu,
“Mma miing am nma thu mmaanni kdei kpha chlamra,
ungta Mma karyaa kma mmaanni karyaa pindi chlamra.”
Poul li Romia mdo Vel nra mdo Tlot
22Hava ngi mlei kurthuwkda, mpha maknem thu naan hin kthlen nra ava mapkhaan tlitda. 23Pdainu tunva hava paamkowl thungva mmun kdo thloi chaak nowl ma leiji ungta kum roiksot thu naan hin kthlen nuwm leiji, 24neiji Spenia tha kche mpha thu ado kukurdut ṭhi raan kbin chaakka, chodu reeppi naan tu kanpa sap thiin min don, naanni klamṭoi nrangtha ado tdak chaak raan. 25Talu talu kurthuwk daat joso, tun tunva kintiing rek kbomra Jerusalem tha kahang rang imping. 26Mleija Jerusalem tha ka am kintiing rek hinni Masidonia leh Akhaja ki rekki kpii kcha thu leemna chla purdon pik lamda plung kngamma. 27Mmaan rukva plung kngammi tlo nuwm lamda, ungta mmaanva mmaan lei mtuwl chaak inna, mleija ktlok chati rekki pthla ktongki phowl kṭha kphaak ṭhi mkurthutbi, mmaan rukva daksaa ktongki dona ngi soklou rangtha kurthuwkka. 28Ava leiji, neiji hava kupṭut dok mpha thu, ungu mmaanni mdo pthuw chaak in ava mhin inni mparlaan dok inta, neiji naan hinki Spenia tha vang ro nikdi. 29Ungta neiji naan hin kthlen mpha thu Khrista hinki phowl kṭha ava kdimmi thleng nikdi tdit neiji kdee chaakka.
30Ku u knaorek, nenki Mukpu Jisu Khrista leh pthla wonsatti neiji kthe chaakka, nei ktumra neitu kilṭhi ngi Isowr hin tha ṭhil sap inche. 31Mleija Jihudia thungki krin kma rek hinki ka karthle chaak nra, ungta Jerusalem tummi nei ksoklo ava kintiing rek dongei mkurthut nra, 32ava leiji Isowr dongei kanpa leh arda krokki naan hin thleng chnik di. 33Naan akheng nga kdaai ki Isowr ri aju ṭhi chaan so. Amen.
Currently Selected:
ROMIA 15: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
