ROMIA 14
14
A u anao Kṭewlma
1Krin cha thung ngi ksowl mii ava akowl chaan, pdainu mma poibin thung ngi kalrai ṭhi maan. 2Ksowl chava an ke er daat mchaak arlaanni, ku mii khatva do khim khai tchaak krora kdingi binda. 3Kchaa miiva kchaa kma mii ava do ksi kma binna mso, ungta kchaa kma miiva kchaa mii ava kṭewlna mso; mleija mma Isowr ri mdo kowl chaak dok. 4Ktlok khat sra owr kekṭewl nang nga ku pti? Mma mdaksaa ki Kpupa maiṭhuwmmi tri ruk krip mata tutluk ruk ktlu kurthuwk kcha. Ungta mma ava ktipri pik chra, mleija mma Kpupava ktiprip kapchaang.
5Miilai khat va nit khat ava nit khat hinnu kheel sii heppi mdo bin chaak, ktlok khatva nit mkheng nga kurdu jikki mdo bin. Miipum ktaiji mma mma poibinni rip mer chaso. 6Nit kdan miiva, Mukpu mdo kjat nangi kdan cha kurthuwk so. Kchaa mii rukva Mukpu kakjatti achaa so, mma ngi Isowr mdo panpaak leiji, kchaa ku mii khat ruk va kheel siingi Mukpu kakjatti achaaso. 7Nen ku mii khat leea mdaksaa tummi kring ava pme, ungta nen ku mii khat lee ngi mdaksaa tummi kdiyou ava pme. 8Nenni kring nkurthut inbi, ava Mukpu hin kring cha tkurthut in, ungta nenni ndiyo inbi, ava Mukpu hin kdiyou tkurthut in; ava mkurthutbi, nenni ring jown min mata diyou jown min, nenna Mukpu do in pmin. 9Mma ngi kdiyou leh kring mikniing ki Mukpu mkurthut nra, mṭutna hava ki tummi, Khrista ngi diyouda ungu kring kinle nowl.
10Talu leiji naanva a u anao in akṭewl inna? Mata talu leiji naanva a u anao in ado rot in pme? Mleija nen nkheng inna Isowr ki kekṭewl ku onna maiṭhuwmmi tri sap raan; 11Mleija kjit dok da,
“Mukpu ngi theda,
Nei krin leiji,
pkhup khim khaiji Kihin ktardiilra,
ungta plei khim khaiji Isowr kpanpaak ra.”
12Ava leiji nnen nkheng ngi Isowr hin ndak ndakki mlei ava tpiik raan.
A u anao Tluk nra Tloma
13Ava leiji nenni khat leh khat leen kṭewl nmaan che, pdainu ava kchang nga a u anao inni lam thu khusiir mdo parthit ma nra mata mtluk ma nra poi abin in. 14Mukpu Jisu ngi mlei kurthuwkda ktobor do khat lee ame tdit neiji kdee chaak; pdainu ktobor kdingi kbin ku mii khat tumva ktobor. 15Naan do chaak ava ngi a u anao in khusiir parthit nra mkurthutbi, naanna wonsat dil kṭoiji chet maan ti. Khrista ngi mma tummi mdo diyo pik ava naan then chaakki ea krep maan. 16Ava leiji naan ṭhatna ava kṭhakma ktongtha pauna mso. 17Mleija Isowr Kruwngpaam ma tchaak tneek na pme, pdainu pthla kchiir thung ngi rinkindit leh kdaai ungu kanpa ngi; 18Khrista sok klo thu Isowr dorot pik ungu miirek dorot ava kurthuwk. 19Ava mkurthut leiji nenni khat leh khat hin kdaai leh plung kurchuwlli punchoi inche. 20Then lei daatti nenni Isowr nong ae krep maan che. Do mkheng nga kartleu kat, pdainu mii khusiir parthit nrang ngi then kchaa ava rome; 21saa kchaa mata ju knee ngi naanki a u anao in khusiir parthit nra khat lee tlo maan. 22Naan dorin chaak ava adaksaan leh Isowr arlakki arkhi chaan; mdaksaa mthina dorotti mdo kṭewl ma mii ava kanpa kcha. 23Pdainu plung chei kirche ngi kchaa mii ava mraal ka am, mleija mdobin chaakki mmava tlome; mleija krin cha thungki kma ava pnu.
Currently Selected:
ROMIA 14: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
