1 KORINTHIA 2
2
Khros leen Kukthoi Khrista Mlei thu Karyaam
1Ku u knao rek, neiji naan hin kthlen mpha thu Isowr ki tuprut rinpaumin ava ahin inni kparthaang sii pauna rek mdit mata lousing ngi paryaam chmaang. 2Mleija Jisu Khrista leh Mma ngi Khros leen mukthoi na ava kma donle neiji naan arlakki do khat lee dei chnuwm maang. 3Ungta neia naan tu kilṭhi ngi kdung ksowl ungta kṭi ungu kunchunni ka am kcha ping; 4ungta nei kpau saam leh kdo paryaam ava ril ktlaa ki pauna rek lousing ava pme, pdainu pthla leh rutan ki ngaal. 5Tditta naan do rin chaak ka dulti mii ki lousing ava pme, pdainu Isowr rutan thungki mkurthut nrang lei.
Isowr Lousing
6Anto kurthuwk daat joso neenni plung kurchuwl rek arlak va lousing pauvi kpau kchaan ping, dultipaam ki lousing ava pme mdit mata do ktip sit kmara hava dultipaam ki paamkpu rek lousing lu pme. 7Pdainu dultipaam mapṭhan du liitti Isowr ri nen tkunlor chaak nraan mdo purchuwl dok tuprut pau ava leh Isowr lousing neenni ksaam kcha kurthuwk in ping. 8Hava dultipaam ki paamkpu rek ku khat lee ngi hava pauva deipandi me; mleija mmaanni mdee inbi, mmaan ni laarnee ki Mukpu ava Khros leen pthoi lam nime.
9Pdainu hanto mdo kjit dok lulu ngi,
“Mik dodee ma knaa do aryaak ma,
dulti mii plung thu klut kma,
Mma wonsat klo cha rek tummi Isowr do purchuwl pik dok.”
10Isowr pthla ava ngi nen nhin mipandan pik inda. Mleija pthla ngi do khim khai Isowr pau kukthuk daat ruk thlaam da. 11Mleija miilai thu ka am pthla ava kma donle ku ngi miilai poibinna mdee da? Ava lulu ngi Isowr pthla ava kma donle ku mii khat lee ngi Isowr poibin dei me. 12Tunva nenna dultipaam ki pthla karlaang kcharek ava in pmin me, pdainu nenni tdee pandit nra Isowr ri nen nhin leemna ngi mido tpiik in pthla ava Isowr hinki nenni tarlaan chaak in.
13Ungta neenva dultimii lousing do purchu ngi pauna rek ava the maan ring, pdainu pthla kthloi rek hinni pthla ktongki kindit ava purlup innu pthla ngi akpurchuk kchaan ping. 14Pthla ktongki mii kmava Isowr pthla ki leemna chla ava arlaang chme, mleija mmaanna Mma hin ka aak chlam, ungu Mma va deipandi lamme mleija mmaanna pthla ktongki kurthuwk lamme. 15Pthla ktongki miiva do mkheng nga mdo kṭewl, pdainu ku mii khat do kṭewl ma ra ava Mma mdaksaa daat. 16“Mleija ku ngi Mukpu poibin dei donle Mhin kpurchuk rang da?” Pdainu nenva Khrista poi bin tuthloi chaak in.
Currently Selected:
1 KORINTHIA 2: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
