1 KORINTHIA 1
1
1Jisu Khrista ki kenyee khat, Isowr poibin thu mdo own dok Poul leh nenki na u nnao in Sosthenas ava ngi,
2Korinthia ki Isowr rinlop hin tha, Jisu Khrista hin mdo tpinchel dok, Mukpu Jisu Khrista miing ku own kcha mmun ktaiki mii mkheng rek ava kintiing dida nen nkheng inki Mukpu ngi mdo own tpom dok:
3Nenki npah in Isowr leh Mukpu Jisu Khrista hinki plungnee leh kdaai naan thu am so.
Khrista thungki Phowl Kṭha
4Jisu Khrista hinki naan hinni mdo piik dok plungnee ava leiji mpha ktai thu neiji Isowr kpanpaak chaakka, 5tditta mlam ktai thu naanna apausaam in mkheng leh mkheng thu kdei kcha ngi dim chaan tinu. 6Khrista hin tha naan hin ki rinpaumin ava rukka net da. 7Tditta ava leiji naanni nenki Mukpu Jisu Khrista kandang ra ado ardat in heppi naan hinni pthla ktongki leemna chla ava kukhop kma lua ame; 8nenki Mukpu Jisu Khrista nit thung ngi kparmak tdit ktaakki mṭut na kpha dekki Mma ngi akipnet chraan. 9Isowr ra trin chaak ra, Mchapa Jisu Khrista nenki Mukpu ava tu plap kurthuwk rangki naanna ado tu own chaak dok in.
Rinlop thu Kinṭhen
10Ku u knao rek, nenki Mukpu Jisu Khrista miing ngi, neiji naan hin kthe chaakka, tditta naan arlakki kinṭhen ktaakki a am nraan, pdainu poibin khdaat ungu kekṭewl khdaatti kunlom in 11Mleija ku u knao rek, naan arlakki kar ai kalrai ka amma kdingi khuloi miirekki neia mson pik chlam da. 12Ava ki mleija naan miipum ktaiji, “Neia Poul mii ping,” Mdit mata “Apollo mii ping,” Mdit mata “Sephas mii ping,” kdingi theen tinu. 13Khrista ava athem inmo? Naan tummi Poul la Khros leen kukthoi mo?
14Kripas leh Kajas kma donle neiji ku mii khat lee pre baptis ado kuptlot maan leiji kanpa kchaam ping. 15Nei kmiing ngi baptis ktlot dida ku khat lee ngi mdo the ma nrang lei. 16Neiji Stiphanas le phungka mkheng baptis kdo ptlot chaak lam. Ava pkheelnu neiji baptis kdo ptlot ku khat lee dei chmaang. 17Mleija baptis kuptlot rangki neia Khrista va mdo tsii ava pme, pdainu Khrista ki Khros ava leemna mkurthut ma nra, lousing ktaakki kṭha paumin kparyaam rang lei mdo tsii chaak.
Isowr ki Rutan leh Mlousing nga Khrista
18Mleija Khros ki pauna ava ka aak rek tumva kmaang kcha, pdainu mdo ktlan dok nen ntumva Isowr rutan. 19Mleija ava hanto kjit dok da,
“Ksing rek lousing nga Neiji eakrep nik di,
ungta kdei pandi rek dodee ava do tip sit nimaang.”
20Ksing miilaija tu ungda? Nowlam chukpu rekka tu ungda? Tun kaalki mii karteen ṭhi dei rekka tu ungda? Dultipaam ki lousing nga Isowr ri mdo tpa aah pthi pme mo? 21Mleija Isowr lousing ava dultipaam ki lousing va deime, ka aak do tlotti krin cha rek hin mdo ktlan pik nra, nen do paryaamma Isowr poibin ning kupthlung. 22Mleija Jihudia rekki titinna rek ṭhilda ungta Grik rekki lousing thlaam lamda. 23Pdainu nenva Khros leen mdo pthoi yo in Khrista paryaam in minnu, ava Jihudia rek khusiir parthit na khat ungta ktlok chati rek aah chaak na khat kurthuwk da, 24pdainu mdo own dok rek Jihudia rek leh Grik rek mikniing hinva Khrista ava Isowr ki rutan leh Isowr ki lousing. 25Mleija Isowr aah chaak na ava mii rek lousing ksingsii ava pkheel da, ungta Isowr sowl chaak na ava miirek ruktang sii pkheel da.
26Mleija ku u knao rek, ado tu own in ava abin in; dultipaam dil kṭoiji ksing mii ava nemme, ru ktang mii nemme, klin ksaang thu kṭou mii nemme; 27pdainu ksing ava ningkja mdo piik nra, Isowr ri dultipaam thu ka aak kchol da, ru ktang ningkja mdo piik nra Isowr ri dultipaam thu ru kdowng kchol da, 28kunlor deekki miingi mdo bin ava do khat lee mdo psit ma nra, dultipaam thu Isowr ri kjuwm ava kchol da, ka am kma do ava rukka tpa am da, 29tditta ava leiji dulti mii ku khat lee ngi Isowr maiṭhuwm mi napal mdo tlot ma nrang lei. 30Jisu Khrista thungki rin khu thuwna, nenki lousing, nenki rinkindit leh kpinchel ungta mdo ṭenthuw pinlet naki Isowr do seem pik ava Mma; 31ava leiji mdo kjit dok lulu ngi, “Napal ktlo miiva Mukpu leiji napal atlo chaso.”
Currently Selected:
1 KORINTHIA 1: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
