EZEKIELA 44
44
Biakbuka ir-enkolna
1Khan hmun irthiang dâi mikot nâi uala khan, nisua tianga nghaa khan a ni hruai lût nôka, a lei irkhâr maia. 2Khan Rengpa’n ki kuang, “Hi dâi mikot hi nin ikhâr mai hrang a ni, nin inhong hrang ni mah. Mi tûte lût thei no nihai, Rengpa Israelhai Pathian kha a hong lûta; khasikin khâr a ini mai hrang a ni. 3Khan rêng chungthu chu Rengpa kuang bai fa hrangin kha khan rêng angin toi a ta, dâi mikot tuala lampuia khan lût a ta, kha ngêt khan a isuak nôk hrang a ni,” a tia.
4Khan nin hmâia hmâr tianga dâi mikot khan a ni hruaia; khan ki hei thîr vêla, irngai ro, Rengpa roiinpuina khan Rengpa in kha a sipa; khanchu khûksadelin ki’rteta. 5Khan Rengpa khan ki kuang thu a hrila, “Mihriam nâipa, irngaitua sabakin lân, ni mithai kha en roh. Rengpa ina thupêkhai murdi chungthu le, khataka dânhai murdi chungthua ki thuhril chu ni mikuarhai khan le’rngaiin lân, in a va lûtna le hmun irthiang irthoka suaknahai kha eninfel sabak roh. 6Khan mi pualoihai, Israel insûngkuahai laia khan hiang hin hrilin lân, Rengpa Pathianin hiang hin a ti. O nangni Israel insûngkua, nin intir omnahai chu ruk ta ri se; 7lungrîla sertan loi le taksa tianga sertan loi, râlhai ki hmun irthianga om hrang le porinchetir hranga ki in ngêta nin hong chôi sika nin intir omnahai hi ruk ta ri se; bai mani, sathâi mani, thisen mani nin inhlan lai khan ki thuthunghai chu nin insiata, nin intir omnahai bôk sana hrang vaiin. 8Khan ki thil irthianghai enkolna sin chu nei mak chêia, khannisian ki hmun irthianga khan nin irthûla ki sintho hrangin mi nin inthanghaia. 9Rengpa Pathianin hiang hin a ti a ni: Mi râlhai lungrîla sertan loi, taksa khoma sertan loi mi râlhai i ang khom Israel irchihai laia lei om tâkhai khom chu, ki hmun irthianga khan an ilût hrang ni ma,” a tia.
Levi irchihai chu deipua bê ni mahai
10Khan, “Israelhai, an millim irzûla an irhmang laiin keima irthoka hlataka fe tâkhai, Levi mihai khan anni sualna kha pêl an ti. 11In sûnga sin zongin, in dâi mikothaia khan enkolin, ki hmun irthianghai khan sinthotu ni an ti; mipuihai ta hranga irbôlna le pum hâlirvôm thil inhlanna hrang kha that an ta, anni sintho pe hrangin an makunga khan ngîr ki ti. 12An millimhai kôla khan a sin an lei tho pe tâk sika khan, Israel sûngkuahai ta hrangin suala irtetna kêng an lei chang ta, khasikin an chunga khan ki kut irlek ki ta, an sualna chu anni ngêtin pêl an ti. Rengpa Pathianin a ti. 13Keima ta hrangin ochai sin chu tho hrangin, keima kôla chu an ihong nâi hrang ni mah. Ki thil irthianga i ang khom, le thil irthiang takhai chu an hong inai hrang ni mah. Khannisian an lei tho tâka, an intir omnahai le an inzakna chu anni ngêtin pêl an ti. 14Khannisianlân annihai chu in sintuhai enkol hrangin siamhai ki ta, khataka sinthônahai murdi le, khataka tho hrang murdihai leh khan,” a tia.
Ochaihai
15 #
Fes 28.39-43; Lev 16.4 Khan, “Ochai Levi irchihai, Zadoka nâipasalhai, keima irthoka Israelhai an rot lai khoma ki hmun irthiang enkolna sin neituhai kha. Keima sintho hrangin ni hong pe an ta; sathâi le thisen kha inhlan hrangin ki kôla khan ngîr an ti, Rengpa Pathianin a ti. 16Ki hmun irthianga khan lût an ta, ki sintho hrangin ki dokâng hong nâi an ta, ki sin chu tho an ti. 17Khan, irhuan sûng lai taka khan dâi mikota an lût tena chu hiang hin ni a ti. Puan zâiirhmi puan leh irvo an ta, irhuan sûng tianga le dâi mikot sûnga sin an tho laiin, an chunga samul puan an irbel hrang ni maka. 18An lua khan puan zâiirhmi lukômhai kôm an ta, an konga khan puan zâiirhmi kekok bun an ta, kongkhit an ihmang hrang ni mah. 19#Lev 16.23 Khanchu mipuihai omna tualzôl pêninta uala khan an fe mânin, biakbuka an sinthôna silkai kha khekpai an ta, tentan irthianga khan an imâksan hrang a ni. Silkai danghai leh irvo an ta, an silkai irthianghai leh khan mipuihai dengtheina an intungtir loina hrangin.
20 #
Lev 21.5
“Ochaihaiin an lu an ivoi inkol hrang ni maka, an sam khom an inseitir hrang ni ual ma, a ruk bakin kêng an ihôi hrang. 21#Lev 10.9 Khanchu ochaihai khan tualzôl sûnginta uala an lût mânin uain an iin hrang ni mah. 22#Lev 21.7,13-14 Ochai tukhomin nupang mâka om rêng rêng an ilua hrang ni ma, Israel dôngmate irthiang mani, aninole, ochai dangin a ithisan, meithâi vai kêng an ilua hrang. 23#Lev 10.10 Ochaihai khan ki mipuihai chu thil irthiang le irthiang loi danglam dânhai le Pathian dâna irthianghai le irthiang loihai chu irchutir an ti. 24Khanchu thubuaihai a oma niin chu, ochaihai khan ki dân ang takin roirêl an ti. Khanchu, ki kûthai chu ki dânhai le ki thu angin hmang an ti. Ki sabat nî khom chu an ivong irthiang hrang a ni.
25 #
Lev 21.1-4
“Khan, ochai chu a pa mani, a nâi mani, a urêngpa mani, aninole a farnu pasal la nei loi mani a ni noa ni’n chu mithi ruak tônin a iporinche hrang ni mah. 26Khanchu a’rthiang nôk hnung tena chu sûn sari sûng nghâk a ta. 27Khanchu biakbuk tualzôl sûnginta uala khan lût a ta, ar thâr irthiangna hrangin thil inhlan a ti. Biakbuka sin a tho nôk theina hrangin, kei Rengpa Pathian hin ki iti a ni. 28#Nam 18.20 Khanchu ochaihai khan irchon nei an ta, kei hi an irchon chu ki nia, Israel ram sûnga rênghaiin irchon nei no nihai, kei hi an thil nei tinrêng chu ki ni. 29#Nam 18.8-19 Bu thilinhlanhai, sual ta hranga thilinhlanhai tho’nsualna thilinhlanhai kha ochaihaiin fa an ta, khanchu Israel rama thilinhlan tinrênghai chu an ta ni a ti. 30Ochaihai khan a ra maton tak laia a satak le thil dang ki kuanga an inhlan murdihai kha dong an ta, khanchu mipuihaiin bai an sin rikipa, bai sin maton tak kha ochaihai kuang thilinhlanna hrangin pe an ta, khanchu ki satvurna chu an insûnga khan tung a ti. 31#Lev 22.8 Khanchu ochaihai khan va mani, ramsa mani, a binga thi mani, aninole ramsa danghai ithat mani chu an ifâk hrang ni ma,” a tia.
Currently Selected:
EZEKIELA 44: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
