FESUAKNA 29
29
Ochai namindet dân
(Lev 8.1-36)
1“Keima sin tho hranga ochai sin tho hrang, Arona le a nâihai ni irserindang hrang dân chu, hiang hin ni a ti; sehrâtchal tuai inkhat le kêlbelra chal inhni demnaboi kaiin lân, 2chol kop loi bai oliv hriaka irpol leh, sahriak pol sai bai phêk satakin siamin lân, 3annihai kha kok sûnga thunin lân, sehrâtchal inhni ni hong ichôi hrang a ni.
4“Arona le a nâihai chu ki omna puan in kot bâia hong hruaihaiin lân, dân anga irthârna tui irsil hrangin hrilhai roh. 5Arona chu ochai tukfam, songkol irfual, Efod songkol, Efod hnuaia songkol irfual rôpbel le kong khit irkipin. 6A lua lukôm, “Rengpa HRANG TUM,” iti inkhumtir roh. 7Irthû a nang zoroa hmang zât oliv hriak kha la’nlân, a lua buakin irthûtir roh. 8A nâihai kha hong hruaihaiin lân, songkol innghâkhai sian, 9an konga kongkhithai khitin, an lu tiang khom lukhum inkhumtirhai roh. Khaang taka khan Arona le a nâihai chu ni inamindethai hrang a ni. Anni le an irchihai chu ochai hong ni thei mai ta an ti. 10Sehrâtchal tuai ki omna puan in kôla hong kaiin lân, Arona le a nâihai chu sehrât lu chunga kut irnghat hrangin hrilhai roh. 11Puan in kôla khan, ki kuang sehrâtchal chu that roh. 12Sechal thisen kha la’nlân, maichâm kila khan ni kut mitin leh polin lân, a ban la om chu maichâm kôla khan bun ving roh. 13A rîl tuamtu, a hlap murdi le a mithin a sa tak, a bê inhni a thâi kop kha la’nlân, sual irbôlna hrangin maichâma hâlirvôm roh. 14Khanchu a hme, a vun, le a rîlhai chu dâi pên tiang hâlirvômin lân, sual irbôlna thil inhlan a ni sikin hâlirvôm ving hrang a ni.
15“Belrachal inkhat kaiin lân, Arona le a nâihai chu an lu chunga an kut irnghat hrangin hrilhai roh. 16Thatin lân, maichâm irhîl kha thisen inthek ro, 17hme kha irchan indi’n lân, a sûngkua le a hnungzâng tianga a malhai chu irsûkinfâi ro, a lu le a ke danghai chu a chunga khan se roh. 18#Efe 5.2; Fil 4.18 A rêngin thilinhlan belra chu ni inhlan hrang a ni, hi thilinhlan mirimhoi hin ki milung a inchuktir ngai a ni.
19“Belrachal inkhat kai sa’n lân, serindangna hmang ngai kha, Arona le a nâihai chu an lu chunga kut irnghat hrang ti pehai roh. 20Thatin lân, a thisen chu Arona le a nâihai mikuar chang tianga silnianghaia, kut chang tiang kutpui hmora, kepui chang tiang hmora nâlin lân, a ban la om chu maichâm irhîl kha inthek roh. 21Maichâm thisen irthûna hmang ngai oliv hriak senkhat la’nlân, Arona le a puanhai chunga le a nâihai le an puanhai chunga khan inthek roh. Khanchu ama le a nâihai an puanhai murdi keima hranga serindang ni ta an ti. 22Kêlbelra irmei satak, a sûngkua tuamtu a hlap, a mithin sanatak, a bê inhni a thâi kop le a chang tianga malpui kha âtin lân, 23bai inhlan khamphulua sia chu a zât kipa bai tiam khat seng oliv hriak le inhmet bai tiam khat le chol kop loi bai tiam la’nlân, 24kha fâk le nêk thil murdi kha Arona le a nâihai kuta fe’n lân, ki ta hrangin thilpêk bîk nghi hrangin, thâr hrangin ni ihrilhai hrang a ni. 25An kuta irthokin la’nlân, maichâma hâlirvôm thilinhlan chunga khan sia’n lân, ki ta hrangin thilinhlanna nei roh. Ni thilinhlan mirimhai hin a ni inlômtir ngai a ni. 26Hi belrachal mier#29.26: Atûnlai chongin chu a rôp irbu ei iti hi a ni hi la’nlân, ki ta hrangin thilpêk bîk ni hrangin thâr roh. Khaangin hihai hi ni dongtum ni a ti. 27Ochai namindet zoroa kêlbelrachal mier le a malpui thârin ki kuang thilpêk bîk ni inhlan hrang a nia, ochaihai ta hranga thâr hrang a ni. 28Israel nâihai irhîlin thil an inhlan kha la’nlân, a mier le a malpui chu ochaihai dongtum kumtuanga hranga ki indet a nia, hi hi Rengpa’n thilpêk bîk mipui ata ki idong chu a ni.
29“Arona ochai tukfamhai hi a thi tena chu a nâihai kuang ochai ni hranga an phunhai zoroa an innghâk hrang a nia, an kuta ni ipêkhai hrang a ni. 30Arona nâi irthûla ochaia namindet khan sintho hranga ki omna puan in hmun irthiang a fe zoroa sûn sari sûng chu hi puanhai hi a irbel hrang a ni.
31“Arona le a nâihai namindetna hrang, kêlbelrachal hme chu lâkin hmun irthianga but roh. 32Anni khan ki omna puan in mikot bula khan khamphulu sûnga bai la om le khan fa ri se. 33Anni namindetna sual irbôlna hme chu an ifâk hrang a ni; khalâi irthiang a nia, ochai vaiin an ifâk thei hrang a ni. 34I mani, hme mo bai mo zîng dênin fa loiin a la omin chu, hâlpai ving hrang a ni; hme ser a ni sikin, a dâi chu fa hrang ni ta mah.
35“Thu nang ki ipêk ang takin Arona le a nâihai chu sûn sari sûng chu ni iserindanghai hrang a ni. 36A sûn tin sual irbôlna hrangin, sehrâtchal inkhat inhlan ngêt ni ta, kha leh khan maichâm kha a ithâr hrang a ni. Khanchu oliv hriak pol ni ta, irthiang taka ni isiam hrang a ni. 37Khaang khan sûn sari sûng chu, a sûn tin tho ngaiin lân, khanchu maichâm kha hor thiang ving a ta; mihriam mo, a dang khomin a tôn murdi a’rthiangna irtha khan a ipol ving hrang a ni.
A sûn tina thilinhlan
(Nam 28.1-8)
38“Zoro la hong om mai hrangin a sûn tin maichâma kêlbelrate inhni ni inhlan ngai hrang a ni. 39Zîng tin belratehai laia inkhat inhlan ni ta, a dang kha khohloi tiang inhlan ngai roh. 40Belrate matona leh khan baidi a sa chi her khat le oliv hriak irthît sai litar khat ni inhlan hrang a ni. 41Belrate inhnina kha chu khohloi tiang inhlan nôkin lân, ama leh khan baidi oliv hriak le uain khom zîng tianga dôr kha inhlan nôk roh. Hi hi keima Rengpa kuanga fâk nêk thilinhlan chu a nia, a mirimhai hin a ni inlômtir ngai a ni. 42Zoro la hong thiaia hin, hâlirvôm thilinhlan hin ki omna puan in kotbâi kôla khan inhlanin a iom mai ngai hrang a ni, kha hmuna khan kêng ki mihai zuang irtongpuihai ngai ki ta, nangni ki ichongpui hen hrang a ni. 43Kha hmuna khan Israel mipuihai irtongpuihai ki ta, ki ompuina vâr irkhêl khan a hmun kha irthiangin siam ki ti; 44puan in le maichâm chu ser irthiang ki ta, Arona le a nâipasalhai khom chu ochai sina ki sin tho hrangin serindanghai ki ti. 45Israel mihai laia lêng ki ta, an Pathian ni ki ti. 46An laia ki lêng theina hrangin Aigupta ram ata anni hruaisuaktu Rengpa an Pathian kha ki nih ti inhria an ti. Keima hi Rengpa an Pathian chu ki ni.
Currently Selected:
FESUAKNA 29: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
