FESUAKNA 28
28
Ochaihai tukfam
(Fes 39.1-7)
1“Ni upa Arona le a nâihai Nadaba, Abihua, Eleazara le Ithamara hai kha koihaiin lân, Israelhai lai ata keima ochai ni hrangin khâihai roh. 2Ni upa Arona ta hrangin ochai tukfam songkol irfual mahripom tak siam pe roh. 3Kut sin theithiamna ki inneitirhai murdi koihaiin lân, ki sin tho hranga ochai irthiang an ni theina hrangin. 4Hi tukfamhai hi an inei hrang a ni, lungbom, Efod songkol irfual, songkol sûnga innghâk zât lukôm, diar le kongkhit hai, ni upa Arona le a nâipasalhai innghâk hrang ochai songkolhai nei ri sehai, keima ochai an ni theina hrangin. 5Kut theithiam pâl khatin samul dum, a senduk le a sen le rângachak pat zâi irhmi thûr sai samul dum, an ihmang hrang a ni. 6Efod chu rângachak patzâi irhmi thûr sai samul dum, a senduk le a sen le irpol enhoi taka không hrang a ni. 7Dârsuama inhnia inkhâiin, a hnung tiang le a mân tianga inkhopin, a khilina siam ri se. 8Khaang dên khan kongkhit a sa chi a không inkhat a ni theina hrangin Efod puana khan an inkhop sa hrang a ni. 9Onik lung inhni la’nlân, Israel irchi nam sômhleihni irhming ni irziak hrang a ni. 10A ulian dônin kiruk rukin ni irziak hrang a ni. 11Lung man tam tianga inhriat thei mi inhrilin lân, Israel nâihai irhming lungphêk inhni sinin lân ni irziak hrang a nia, rângachak phûm hrang a ni. 12Lung man tam inhnihai kha dârsuam chunga khan Israel nam sômhleihni inhriat maina hrangin belsa ni sianlân. Arona khan Rengpa makunga a’rhming chu a dârsuama irvâ a ta, Israel namhai chu ki inhriat mai hrang a ni. 13Lung man tam inkhopna hrang rângachak inhni siamin lân, 14rângachak irthît infâi hmangin zîngziri hrui siam sa’n lân, an khopna hranga khan inkhop roh.
Rôpbel
(Fes 39.8-21)
15“Patzâi irhmi thûr sai, samul dum, a senduk, a sen le rângachak pat anga efod anga khôngin, Pathian an koi zoroa ochaihai dâra bâng hrang puan insui theihai enhoi takin ni insuitirhai hrang a ni. 16Thep pumin kil minli nei, khâpkhat vêla chêng ni ri se. 17Lung man tam rân minli inkhop ni sianlân, a rân inkhatna khan Odam lung, Pitda lung, Berekot lunghai om sianlân; 18A rân inhnina khan, emeral, safir le endonuk (lunghlu), 19A rân inthumna khan Lasen, Agate, Amethist hai om sa sianlân; 20A rân minlina khan Tarkois, Onik, Jasper, lunghai om sa sianlân, kha lung man tamhai kha rângachak phêka inkhop ving hrang a ni. 21Lung man tam sômhleihnihai laia an rêngin Israel nam inkhat seng irziak hrang a ni. Israel nam sômhleihni entîrna a ni theina hrangin. 22Rôpbel inkhâina hrang rângachak irthît infâi zîngziri hruiin siamin lân, 23rângachak irkual inhni, rôpbel hmora inkhop hrang, siam sa roh. 24Zîngziri hmor inhni chu rôpbel hmora irkuala khan inkhop hrang a ni. 25A hmor inhni kha lung man tama inhni oma khan inkhopin lân, Efod puan irvâ leh khan irzom ri se. 26Efod dep rôpbel sûng tiang hmora rângachak irkual inhni inkhop sa roh. 27Efod puan irvâna irdîna kop sian, Efod khitna leh khan enhoi taka không sai hmora khan rângachak irkual dang inhni inkhop sa roh. 28Rôpbel le efod rângachak irkual chu pat dum inhrual leh irzomin lân, rôpbel chu a kong irdîna det mat sianlân, a irthôl viat hrang ni mah.
29“Hmun Irthianga khan Arona a hong lûtin rôpbela Israel namhai irhming chuangna chu a hong isong hrang a ni; ama kha keima Rengpa ki mihai nin hriat suaktirtu nih a ti. 30#Nam 27.21; Dhn 33.8; Ezr 2.63; Neh 7.65 Efod songkola khan Urim le Thumim kha om sianlân, ni chongpui hrangin a hong rikipa Arona lung irdîn taka a iom hrang a ni. Khaangin Arona a hong rikipin Efod kha innghâk a ta, Israel mihai hranga ki inuam lam chu siam infel thei a ti.
Ochai tukfam dang
(Fes 39.22-31)
31“Efod hnuaia innghâk hrang songkol irfual chu samul dum rônga không hrang a ni. 32A laitaka lu thunna tiang a ir-ông hrang a ni, a chet thei loina hrangin a hmor kîm hrang a ni. 33-34A hnuai tianga hmor irfuala khan samul dum, a senduk le a sen dûr rângachak silniang kârirthâk a inkhop hrang a ni. 35Kha kha ochai sin a tho zoroa Arona innghâk hrang a ni. Hmun Irthianga Rengpa kuang a lût tiang le a suak tiang silniang chu nok ngai a ta, that ni thei ngai no ni.
36“Rângachak felriai phêka khan, namindetna, kutsabia irziakin, a chunga khan, “Rengpa HRANG TUM,” ti irziak inchuang roh. 37Ochai lukôm maton tiang khan hrui dum leh khit roh. 38Arona’n lukôm leh khan a michala inkhop a ta, khanchu keima Rengpa hin Israelhai irbôlna thil ki kuanga an hong inhlan kai chu lei pom ki ta, an thil inhlanhai khan tho’nchâina nei khomhai sian. 39Arona innghâk hrang songkol hnuaia lukôm pat irhmia không ni sianlân, a kong khitna hrang khom enhoi taka irvôtir ni ri se.
40“Songkol irfual kong khit le lukhumhai, Arona nâipasalhai hrang siam pehai ro; man neia irvôtir hrang a ni. 41Ni upa Arona le a nâihai chu innghâkhai sian, ki sinthotu ochai ni hrangin Oliv sahriak irthûtirhaiin lân, inhlanin lân, ser indanghai roh. 42Pat ze irhmia không, tuman kong hnuai ata a mal dêna sei ni ri se, an inzakpui an lang loina hrangin. 43Arona le a nâihai khan, puan ina an hong lût zoroa, Hmun Irthianga om maichâma ochai sintho hranga an hong zoro khoma, kha kha an ikai ngêt hrang a ni. an inzakpui ngai an lang duai khoma that an ni loina hrangin, hi hi Arona le a’rchihai hrangin kumkhuaa tho hrang dân chu a ni.
Currently Selected:
FESUAKNA 28: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
