1 THURCHI SUINA 2
2
Juda Irchihai
1Jakoba’n Reubena, Simeona, Levi, Juda, Isakara, Zebulun, 2Dana, Josefa, Benjamina, Naftalia, Gada le Asera a neihaia. 3Juda hin nâipasal ringa a nei; Kanaan nupang Batsuii leh nâi inthum Era, Onam le Sela a neihai. A nâilutîr tak Era hi a sual hrai sikin Rengpa’n a thatpaia. 4A moinu Tamari leh nâi inhni Pereza le Zera a neihai sa. 5Pereza hin Hezrona leh Hamula a neihaia. 6Zera hin nâipasal ringa; Zimria, Ethana, Hemana, Kalkola le Dara hai an ni. 7#Jos 7.1 Zera irchi laia mi Karmia nâi Akhara hin Pathian ta hranga ser ir-uptir hlat a tum tâk sikin Israelhaiin an lei tuanga. 8Ethana hin Azaria a inei a ni.
Reng Davida Irchihai
9Hezrona hin nâi inthum Jerameela, Rama, le Kelubaia a neia. 10Rama hin Aminadaba a neia. Ama hin Juda nam laia mi roiinpui tak Nasona a neia. 11Nasona hin Salmona a neia, ama hin Boaza a neia. 12Boaza nâi chu Obeda a ni, Jesaia neitu a ni. 13Jesaia hin nâipasal sari a neia; a ulian dônin Eliaba, Abinadaba Simea, 14Nathanaela, Radaia, 15Ozema, Davida. 16An farnuhai chu Zeruii le Abigaili an ni. Zeruii hin nâipasal inthum Abisaia, Joaba, Asahela hai an ni. 17Abigaili hin Amasa a neia, a pasal chu Ismaela irchia mi Jethera a ni.
Hezrona Irchihai
18Khan, Hezrona nâipa Kaleba’n a dôngma Azubi, Jeriotha nâinu ata khan nâi a neihaia; Khan, hihai hi a nâipahai chu an ni: Jesera, Sobaba le Ardona. 19Azubi thi zoiin Kaleba’n Efrati dôngma’n a nei nôka, nâipasal Hura an neia. 20Hura’n Uria a neia, ama hin Bezalela a nei nôka. 21Kum sômruk a niin Hezrona’n Makira nâinu Gilead farnu dôngma’n a neia. Nâipasal Seguba an neia. 22Seguba khan Jaira a neia, hi mi hi Gilead rama khua sômhni inthum chunga rêng a ni. 23Gesur hai le Amor haiin kha hmuna ram, khua sômruk kha an lâka, Jair le Kana khua le a kôlvêlhai chu an lâka. Kha khuaa omhai kha chu Gilead-a le Makira irchihai an ni. 24Hezrona chu a thia, a nâipa Kaleba’n a pa dôngma a ithisan Efrati chu dôngma’n a neia, nâipasal Asura an neia, ama hi Tekoa khua indingtu masatu kha a ni.
Jerameela Irchihai
25Hezrona nâipa ulian tak Jerameela’n nâipasal ringa a neia, a uliantak chu Rama a ni, a danghai chu Buna, Orena, Ozema le Ahija hai an ni. 26Rama hin nâipasal inthum Maaza, Jamina le Ekera hai an ni. 27Jerameela hin dôngma dang Atari a neia, nâipasal Onam an neia. 28Onam hin nâipasal inhni Samaia le Jada a neia. Samaia khom hin nâi inhni, Nadaba le Abisura a neia 29Abisura hin dôngma Abihaili a neia, nâi inhni Abana le Molida an neia. 30Abisura upa Nadaba khom hin nâipasal inhni Seleda le Apaima a neia, Seleda chu nâi nei loiin a thia. 31Apaima’n Isia a neia, Isia’n Sesana, Sesana khan Ahlaia a neia; 32Samaia sangpa Jada’n nâipasal inhni Jethera le Jonathana a neia, Jethera chu nâi nei loiin a thia, 33Jonathana’n nâipasal inhni Peleta le Zaza a neia. Hihai hi Jerameela irchihai chu an ni. 34Sesana hin nâipasal nei maka, nâinupang vai a nei a ni. Siahlo Aigupta mi Jarha an neia, 35Ama hi a nâinu an luatira, nâipasal Ataia an nei. 36Ataia hin Nathana a neia, ama hin Zabada a nei a ni. 37Zabada hin Eflala a neia, ama hin Obeda a neia. 38Obeda hin Jehua a neia, Jehua’n Azaria a neia, 39Azaria hin Heleza a neia, ama hin Eliasa a neia. 40Eliasa hin Sismaia a neia, ama hin Saluma a neia. 41Saluma hin Jekamia a neia, ama hin Elisama a nei a ni.
Kaleba Irchihai
42Jerameela upa Kaleba nâi ulian tak chu Mesa a ni, Zifa irchibul chu a nia. Zifa hin Maresa a neia, ama hin Hebron a neia. 43Hebronin nâipasal minli, Tepua, Kora, Rekema, le Sema hi an neia. 44Sema chu Rahama pa a ni, Rahama hin Jorkeama a neia, Sema upa Rekema’n Samaia a neia. 45Ama hin Maona a neia, Maona hin Bethzura a neia. 46Kaleba’n chu lâksîr Efaii a luaa, ama leh hin nâi inthum, Haran, Moza, Gazeza hai an nei a ni. Haran khom hin nâipasal Gezeza ngêt a phua nôk a ni. 47Mi inkhat Jadaii khan nâipasal kiruk, Regema, Jothama, Gesana, Pelet, Efa le Saafa hai hi an neia. 48Kaleba hin lâksîr dang Maaki a nei nôka, nâipasal inhni, Sebera le Tirhana a neipuia. 49Zoro sôtvit hnunga nâi inhni Saafa le Seva a neipui nôka, Saafa hi Madmana khua indingtirtu a nia, Seva hi Makbena le Gibea khua chuan masatu a ni. Kaleba’n nâinupang Aksaii a nei a ni. 50Hi mihai khom hi Kaleba irchi an ni; Kaleba le Efrati nâi ulian tak chu Hura a ni. Hura nâipasal Sobala chu Kiriath-jearim khua indingtu a ni. 51A nâipa Salma chu Bethlehem khua indingtu a ni, a nâi mi tumtak Harefa chu Bethgadar khua indingtu a ni. 52Kiriath-jearim indingtu Sobala chu Haroe le Menuhot-ah omhai a chimriphai irchibul a ni. 53Kiriath-jearim-ah omhai Ithra hai Put hai, Sumat hai le Misra hai irchi a ni sa. Zera le Estaol khuaa omhai khom, hihai hi an irchi suanpâr a ni sa. 54Bethlehem khua indingtu Salma chu Netofat, Atrot-beth-Joab khuaa omhai irchi sûnga mi a ni. Manahat-ah om a chimriphai dôr chu Zor-hai irchi sûnga mi an ni. 55Lekha irziak mi, Jabez khuaa om Tirat-hai, Simeat-hai, Sukat-hai le Kenhai leh hin irchi khata mi an nia, Rekab-hai leh hin an irneipol a ni.
Currently Selected:
1 THURCHI SUINA 2: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
