Popular Bible Verses from Pilipaai 1

Share

Nɨmɨ mena dara yawɨ'manɨge. Gotɨyai sarɨmɨnyɨ wawɨnya nawɨ'nya' mena yɨhivanɨ'. Sai wawɨnya' kuna kuna yɨwawojɨ wawɨnya sa' yɨ'mwannyɨna yade Yɨrɨka yune Kɨraazɨtɨya Jizaazaregaa'na.

“Sarɨmɨre tewaanya yɨhɨvu'nyabwi naanga naanga kuna yɨma'nana! Nebulya'na jawɨranganyidesɨ yuya sɨmunya tewaanya naangejɨ naanga kuna yɨhɨmaremwaalana!” dena nɨmɨ Naangerɨ sara yɨdaangadɨnyainyɨ. Nabaai gevwi gevwi nayaa yawɨranganya'neihɨrɨ yɨhɨmaremwaaladengɨ. “Kɨraazɨtɨyarɨne Yɨrɨkerɨkɨ sarɨmɨ nawɨ'nya tewaanyaihi yɨwetawakya maayaihi dɨmwaalyideihɨlyɨra,” dena Naangerɨ wɨdadɨnyainyɨ.

Sare' darevɨdaa'nyɨnyɨ. Nɨmɨ gaala mwaala'mujɨyainyɨ Kɨraazɨtɨyalyɨ ye'mwannamwaaihe. Nabaai nɨmɨ bala'mujɨyainyɨ Kɨraazɨtɨyarɨne yaya' dɨragɨnna makɨlɨdeinyɨ. Yɨ sa' nɨmɨre mwaalyabwi wavɨlavade nɨmɨnyɨne'nanyɨ.

Sarɨmɨnyɨna yawɨ'dɨnyagaa' gazagaasagaa' nɨmɨre Gotɨyarɨ “Su! Su!” wɨdadɨnyainyɨ.

Yuya yɨma'nadengɨ sarɨmɨ “Kɨraazɨtɨyare yagaala tewaanyavɨ lɨmwadaanyainera,” dadɨvɨ' Gotɨyarera yɨpɨnebwi nayaa yɨda'maraangebwina jɨla! Sarevɨ nɨmɨ yɨhwanganaawɨdeinyɨ dɨngaka? Sarɨmɨnyɨ kuna yɨbwa'nɨdeinyɨ dɨngaka? Yɨ sareinyɨ sarɨmɨnyɨna kadɨka sara wɨ'nya'ne'na sara jɨla! Dara wɨ'nya'neinyɨ nyɨvu'nɨvanɨ'! Sahwara avaaizɨmunya'na daa'dɨvɨ' yagaala tewaanya' lɨmwaga'manɨgasarera. Yɨ yuyara, yagaala tewaanya'na kwɨya'mwera dɨragɨnna lɨmwange'na dɨhaa'bwata yɨmanɨgasarera. Malyavɨ ye'mwannadɨvɨtabaaibɨ' yuyara sara yɨvanɨgasarera.

Yɨ “Yɨma'nadenna tɨlɨjaaya baihanarɨma!” yawɨ'dɨ dazanna yemwaaimanɨge. Dare' yemwaaimanɨgeinyɨ. Nɨmɨ wagɨla maalɨka aane pɨmɨlɨ' kɨmɨlɨ' maarɨdeinyɨ mɨ'. Aawa. Yuyagaa' sara yadɨnyabaaibɨ' dahaa' yuya nɨmɨre kɨlaakejɨkɨ yɨdevɨ Kɨraazɨtɨyarɨne yaya' makɨlya'neinyɨ dɨragɨnna daa'dɨ nayaa jalɨkurakɨma! “Nɨmɨ gaala mwaaimujainyɨ sara yɨdeinyɨ dɨngaka? Nɨmɨ baimuja kwainyɨ sara yɨdeinyɨ dɨngaka?” dena nayaa yɨvanɨge.

Sare' dare'nanyɨ. Sarɨmɨnyɨna Kɨraazɨtɨyare wawɨnya ya'ne'na Gotɨyai tewaanyabwi yɨhɨzaavanɨkelyɨ. Kɨraazɨtɨyarɨ dɨragɨnna lɨmwagya'ne gavebwina yɨhɨzaavada mɨ'. Aawa. Gamɨnyɨ daanga maarya'ne kɨbulyɨ yɨhɨzaavanɨkelyɨ. Sarevɨdaa'nyɨ yagaala tewaanya' kuna dɨlɨmwagarila!