Popular Bible Verses from 2 Kawˇrenˍhtuˆ li‸ 5

Share

Hkʼe te leh, chaw teˇ gʼaˇ Hkri‸ awˬ hkʼaw lo chehˇ ve kʼo, yawˇ lehˬ chaw awˬ suhˉ hpeh‸ la peuˬ, Awˬ piˍ teˇ hpaˍ mehˉ kʼai peuˬ leh, hkʼa peu-eˬ awˬ suhˉ hpeh‸ la peuˬ.

Hkri‸ lehˬ, venˇbaˆ hta‸ maˇ shiˍ jaw htawˇ, yawˇ awˬ hkʼaw lo ngaˬ hui Gʼuiˬsha ve hteˇ ve cawˇ ve hpeh‸ la tuˬ, ngaˬ hui awˬ pon Gʼuiˬsha yawˇ hta‸ venˇbaˆ hpeh‸ la piˇ lawˬ ve yoˬ.

Awˬ lawn kʼo, ngaˬ hui te kʼai chehˇ ve lehˬ mehˆ shiˍ mawˬ ve hta‸ pa taw maˇ heˆ, yonˍ ve hta‸ pa taw yoˬ.

Awˬ ceuˬ chi hkʼa peu-eˬ lehˬ, Gʼuiˬsha lo tawˆ la ve yoˬ. Yawˇ lehˬ, Hkri‸ awˬ hkʼaw lo ngaˬ hui yawˇ hta‸ cawˇ da‸ hawˍ da‸ tuˬ te laˇ peuˬ. Chi hkʼoˆ ka‸ shu yawˇ hta‸ cawˇ da‸ hawˍ da‸ la tuˬ, yawˇ ngaˬ hui hta‸ te tcuh laˇ ve yoˬ. Yawˇ lehˬ Hkri‸ awˬ hkʼaw lo chehˇ leh, miˬguiˬ yaˇ yawˇ hta‸ cawˇ da‸ hawˍ da‸ la tuˬ te ve yoˬ. Yawˇ hui ve venˇbaˆ yawˇ hui awˬ hkʼoˆ hta‸ yawˇ maˇ taˍ. Shu yawˇ hta‸ cawˇ da‸ hawˍ da‸ tuˬ ve awˬ lawn maˍ piˇ tuˬ, yawˇ ngaˬ hui hta‸ te tcuh laˇ ve yoˬ.

Hkʼe te leh, ngaˬ hui Hkri‸ ve awˬ tan te shehˍ hpaˇ hpeh‸ ve yoˬ. Gʼuiˬsha ngaˬ hui hta‸ cuˇ leh nawˬ hui hta‸ kuˬ yuˬ ve yoˬ. Gʼuiˬsha hta‸ cawˇ da‸ hawˍ da‸ loˬ teh‸, Hkri‸ ve awˬ tan te leh ngaˬ hui nawˬ hui hta‸ lawˬ hkawˉ ve yoˬ.

Yawˇ lehˬ, a sha‸ te‸ chehˇ ve chaw hui a shu yawˇ awˬ to awˬ pon maˇ kʼaw‸ te‸ leh, yawˇ hui awˬ pon hkanˍ suh leh kʼaw‸ te‸ tu la ve awˬ shehˍ hpaˇ teˇ gʼaˇ awˬ pon te‸ chehˇ tuˬ, chaw hkʼa peu-eˬ awˬ pon hkanˍ suh ve yoˬ. Hkʼe te leh, ya‸ nyi hkʼaw‸ nawˉ kʼo, chaw yaˇ hui shu hta‸ shawˍ taˍ ve hkʼe, ngaˬ hui lehˬ chaw teˇ gʼaˇ hta‸ ka‸ maˇ shawˍ taˍ. Ponˬ laˬ htaˇ ngaˬ hui Hkri‸ hta‸ chaw yaˇ hui shawˍ taˍ ve hkʼe ceh shawˍ taˍ chehˇ ve htawˇ, ya‸ nyi hkʼaw‸ nawˉ kʼo, yawˇ hta‸ oˇ hkʼe maˇ kʼaw‸ shawˍ taˍ.

Hkri‸ ve ha‸ pehnˇ ve teˇ ceuˬ lehˬ, ngaˬ hui hta‸ vawˆ taˍ leh shiˍ kʼai sheh kʼai chehˇ ve yoˬ. Awˬ lawn kʼo, chaw teˇ gʼaˇ lehˬ, chaw hkʼa peu-eˬ awˬ pon hkanˍ suh ve pa taw, chaw hkʼa peu-eˬ suh peuˬ teh‸ ngaˬ hui dawˇ cheˆ taˍ peuˬ.