Popular Bible Verses from 2 Corintios 4

Share

Manam kë patsachö kawanantsikllapaqtsu yarpakachantsik, sinöqa gloriachö kawanantsikpaqmi. Kë patsachö kawëqa ushakaqllam këkan. Gloriachö kawakïqa wiñëpa wiñëninmi kanqa.

Tsëmi Teyta Diospa willakïninta mana ajayëpa willakuyä. Awkinyashqa cuerpuntsik lasaptinpis shonquntsikchöqa waran waranllam mas jövinnö këkantsik. Kë patsachö kashqantsikyaq jiparpis gloriachö wiñëpa kawanantsikpaqmi alistakïkantsik. Tsë kawëmanqa manam imapis kë patsachö kaqkuna iwalantsu.

Tsëmi imanö jipatsiyämaptinpis mana ajayashpa willakïkäyä. Ima rurëta mana puëdirpis manam alläpaqa llakikuyätsu. Chikiyämaptinpis Teyta Dios manam jaqiyämantsu. Conträ shäriyaptinpis Diosllamanmi imëpis markäkuyä.

Tsë alli willakïqa shonqükunachö këkan allpa mankachö alläpa väliq riquëza këkaqnömi. Noqakuna allpa mankanölla karmi kikïkunapa podernïkunawantsu willakuyä, sinöqa Teyta Diospa poderninwanmi.

Pëkunaqa chaskikuyantsu kë patsachö këkaq dios yarpëninkunata upayätsishqa kaptinmi. Tsëmi Jesucristupa willakïnin aktsinö këkaptinpis pëkunaqa mana rikaq cuenta kar tsë willakïninta käyiyantsu. Jesucristuchömi Teyta Dios imanö kashqantapis käyintsik.

Tsënö këkäyä chipapëkaq aktsitanö alli willakïninta shonqükunaman Teyta Dios churamushqa kaptinmi. Tsënö churamushqa kë patsata kamar tutapëchö atsikyë kananpaq nishqannöllam. Tsëmi Teyta Dios imanö kashqantapis Jesucristuchö shumaq käyikäyä.