Popular Bible Verses from Isaías 61

Share

Ñandejára espíritu oĩ che pype, che poravo haguére imba'erã. Ha'e che mondo araha haguã ñe'ẽ iporãva mboriahu kuérape, ambopy'a guapy haguã ojepy'apývape, amomarandu haguã isãsotaha oikóva iñapytĩmby ha ojepoitaha iñakã sãvagui, amyerakuã haguã Ñandejára ára ou porãva opavavépe. Upe ára Ñandejára omyengoviataha hembiapo vaikue umi ore rehe ija'e'ỹvape. Che mondo ambovy'a jey haguã ovy'ave'ỹvape, ame'ẽ haguã Siongua ojepy'apývape, jeguaka iñakãre guarã tanimbu rangue, mba'e ryakuã porã py'a rory reruha jahe'o rangue, ñemomorã purahéi vy'a'ỹ rangue. Oñembohérata hikuái “Teko joja urunde'y”, Ñandejára oñotỹ vaekue ohechauka haguã heko mimbipa.

Ha che retãgua ohasa asy jo'a haguére, ñemotĩme ha jejahéipe, upéva rekovia hetã ohupyty jo'áta mba'e repyeta, ha oguereko renyhẽta vy'a opave'ỹva.

Che renyhẽ py'a rorýgui Ñandejára imba'e porãgui! Opa apopo Tupã che rayhúgui! Ha'e che mosãso haguére ha che moingo teko jojápe. Ajogua ku menarã oñemonde katéva térã tembirekorã imba'e jeguágui henyhẽva.

Umi taperekue ha umi óga guasu ojeity vaekue, oñemopu'ã jeýta ha umi táva ojero'apáva oñemyatyrõ jeýta.

Yvýpe hokyháicha umi mba'e reñói ha opu'ãháicha umi yvotyty, péicha Ñandejára omoheñóita teko joja, ha ha'e ojererohorýta opa tetã renondépe.

Ha peñembohérata Ñandejára pa'i kuéra, Tupã rembiguái. Tetã nguéra mba'e repyeta pene mba'éta, ha imba'e jeguaitápe peñembojeguáta.

Che Ñandejára, ahayhu teko joja, ha ndacha'éi monda ha jejukáre. Amyengoviáta chupe kuéra hekopete, ha añe'ẽ me'ẽta hendive kuéra opa árape guarã.