Popular Bible Verses from حِزْقِيال 1

Share

وَ دَاهُو أَنَا شِفْت رِيحْ أَمْ زَوْبَعَانَةْ جَايَةْ مِنْ مُنْشَاقْ. وَ جَابَتْ سَحَابَايْ كَبِيرَةْ مُحَوَّقَةْ بِضَيّ التَّمْرُقْ مِنْهَا بَرَّاقَةْ. وَ فِي أُسُطْهَا فِي شَيّءْ يِرَارِي مِثِلْ نَحَاسْ صَافِي. وَ فِي لُبّ السَّحَابَايْ، شِفْت شَيّءْ الْيِشَابِهْ أَرْبَعَةْ مَخْلُوقِينْ وَ شَكِلْهُمْ مِثِلْ شَكِلْ الْإِنْسَانْ. وَ أَيِّ مَخْلُوقْ عِنْدَهْ أَرْبَعَةْ وِجِهْ وَ أَرْبَعَةْ جَنَاحَيْ. وَ رِجْلَيْهُمْ عُدُلْ وَ مَشَّايَاتْهُمْ مِثِلْ ضَلَافَيْ الْعِجِلْ وَ يِرَارُوا مِثِلْ نَحَاسْ صَافِي. وَ تِحِتْ أَيِّ جِنْح، فِيَّهْ إِيدْ مِثِلْ إِيدْ إِنْسَانْ. أَيِّ نَايِطْ مِنْ نَوَايْطَهْ الْأَرْبَعَةْ عِنْدَهْ إِيدْ وَ وِجِهْ وَ جِنْح. وَ أَيِّ مَخْلُوقْ، جَنَاحَيْه يِلَمُّسُوا مَعَ جَنَاحَيْ الْمَخْلُوقْ الْآخَرْ. وَ وَكِتْ الْمَخْلُوقِينْ يَمْشُوا، مَا يِنْلَفْتُوا وَ لَاكِنْ يَمْشُوا عَدِيلْ قِدَّامْهُمْ.

وَ أَيِّ مَخْلُوقْ عِنْدَهْ أَرْبَعَةْ وِجِهْ. مِنْ قِدَّامْ، عِنْدَهْ وِجِهْ هَنَا إِنْسَانْ وَ بِالزَّيْنَةْ، عِنْدَهْ وِجِهْ هَنَا دُودْ وَ بِالْإِسْرَةْ، عِنْدَهْ وِجِهْ هَنَا تَوْر وَ مِنْ وَرَاءْ، عِنْدَهْ وِجِهْ هَنَا صَقُرْ. وَ دَوْل وُجُوهُّمْ. وَ أَيِّ مَخْلُوقْ عِنْدَهْ جَنَاحَيْ إِتْنَيْن مُمَطَّطِينْ فَوْق وَ يِلَمُّسُوا مَعَ جَنَاحَيْ الْمَخْلُوقْ الْآخَرْ. وَ جَنَاحَيْه الْإِتْنَيْن الْآخَرِينْ كَمَانْ، يِغَطِّي بَيْهُمْ جِسْمَهْ.