Popular Bible Verses from Jagillo 20

Share

Toro anopo kuvi kuruv Gooti Yawel Mooseseke Erooneke todorallu yogalo aro kuudokaikono. “Kev todorakul mino tov, Oo jurogudokwe tool Gooti Yawel kwoldeyo, Isuraiyolda'ai a'mwo abolo tonyu nokwo kuuduuwallo'bullujukorakikono. Toro kworakul kuruv Isuraiyolda'ai tonyuro sumdo tovi mino kuudo manubweyodubul moro yogalo tovi kisuvolo sumalorakikono. Toro tovino tov moro kwako ikullabiyo'mo subuu'yamju adaikullo su toru'no kev todorakul a'mwo abolo tonyu mamollubworomokaulabullunorakikono.”

“Guu Subuu'yamjo'mo Bookis tovi woboruda'ai yodeko tov maro'bi guuge'aro Erooneke'aro todorakul a'mwo abolo tonyu doju'bworomallulo. Toro ju'bworomaro'bullu sulo bwotonyo pwollu wobo towai i'bwo'nopi muugona'dopure toga guu sulo su toollu kuuguudo duuwiyo'bi wonyo iranyo'mo tov ilowilovabwonokwono. Toro sulowilovabwo'ji tovida'ai yiuwi'nokai a'mwo abolo togai'aro noonyumwonyu wuulo ki'duvolodupudo toorogai'aro ton nokwo nupinogano.” Kuudokaikono.

Toro wuujuno sumaiyokwe Moosesol Gooti toolluro yogalo kuudoka tovi kisuvolo wiyo'no sulo toollu kuuguudo muudokaikono. Toro kwol kuruv yodeko tov bomokaila'no sulo toollu iwago pugasal aromiyokaikono. Toro aromiyoka kuga'gwo kuuno wonyo bwotonyo tov sulo toolluda'ai sulowilovabokakwono. Toro sulowilovaboka tovida'ai yiuwi'nokai a'mwo abolo togai'aro noonyumwonyu wuulo ki'duvolodupudo toorogai'aro ton anopokwono.

Toro kuuloma'no sumaiyokwe Mooseseke Erooneke todoral a'mwo abolo tonyu ju'bworomarolno sulo toollu sumdollu toru su'bwo'nopogano. Toro i'bwo'nodopure tonyu Moosesol surodo'mo tool aro kuudokaikono. “Mi donuu'nyulo. Kevu kisuvolo yodupudo togaikul wonyo iranpino'moneyokwe nav todoronal sulo akalluda'ai wonyo pun neya ikullabwosunonaldukono?” Kuudokaikono.