Popular Bible Verses from 2 Koorin 1

Share

Oo nemi Aguto Jisas Kraisolluro Ganumiyago Gooti toolluno ilomoropiyowano. Ganumiyago su toolluda'ai yiuwi'nokai kalo mamwonyo'moneyokwe pasudo ton lokabodupudekono. Aki Ganumiyago su tool yiuwi'nokai a'mwo abolo jul'nyo bwimo'nodowo'jure tobuurai piyarupto mokwolabiyokwekono. Toro tool nevu a'mwo abolo noonyumwonyu jul'nyo baneki'mo'mdowo'jure tobuuronollu piyarupto nekumokwolabodowodekono. Toro tovino tov nevu a'mwo abolo jul'nyo bwi'mo'mdowo'jure pubuurai nokwo wiyo'mwojumovla'mwalanonogano. Gooti toolluro nemi nekullo'mwojodowodo su tokwe a'mwo abolo su tobuurai aval'no nokwo wiyo'mwojumwalanonogano.

Kuudo neya jaullulo. Krais tool danyu'nyuwuulo subwosunyajukekono. Toro toollu kuumjunmwakuuwo kunol kuruv Krais toolbusuko danyu'nyuwuulo bwotonyo nyubwosunmwalanonogano. Toro subwosuna'ji toga Gooti tool piyarupto nekumokwolabiyo'moneyokwe Krais toollu'aro jurogudo bwotonyo danekullumwojumwalonekono.

Aki toro toonol aro kuudo saurowonogano. Oo nemi yiuno'no noromiyanekubwepinonoldeyo. Saurowonogano. Aki su toro tovino aro adowonogano. “Kuvinono nonekullumo'nonoldeyo.” Adowonogano. Toro kuvi kuruv jul'nyo abaneki'meyajupo su tooraino kavlo tov arokwono. Nevu aro kuudo nyau'mwala'jo. Oo nevnokwenolluro jurogudo tokwe nokwo wiyo'mwoju'nanonogano. Kuudo nyau'mwala'jo. Toro kuvi kuruv Gooti toolno'gwowi a'mwo abolo me'no abollungopo tobuurai aiyo aiko te moduka'mdowodekono. Gooti su toolluno aro kuudo neya uubweyogawano. Yiuno Gooti su toolno nokwo nonekullo'mwojonoldeyo. Su toro kuudo neya uubweyogawaneyokwe tovino jul'nyo su tooro abaneki'meyajuponogano.

Toro te yiuno Gooti su toolno nevuge'aro kevuge'aro tonollu Krais toollu anakuuto tomuu guureji yiunokuudo moguro'mwojanekubweyodowodekono. Aki yiuno Gooti su toolno gamiyo'moneyokwe me'no janekubweyodowodekono. Aki Gooti tool gavnokweyolluro duuwallo tov nemi aro nekubweyodowodekono. Gamoro Kuullo tool nemoro poowokalago tonyu kuulonekumwalodowodekono. Toro te nevu Kuullo su toollu sumdomgu me'no ma'dowadonogano. Sumdomgu kwolda'ai ma'dowado su tov aro tovino nekuduuwallo'mokwono. Lukomgu nevu Gooti toolluro yiuwi'nokai nonekullabiyo'mo subuu'yamju yodowodo su to kunyu kuruv kuvinono nomaranonogano. Su toro tovino nekuduuwallo'mokwono.

Toro te nemoro tagunyo wuulo amara'ji tov yasuwa'nodo'maiyo. Toro kuvi kuruv kemoro sumwoluko tonyu dugoga irovekumokwolabiyo'moneyokweyokwono. Aki kemi ma'no ma'nodo tovuro kirumwallo tovida'ai birolo'nugolokuupino'moneyokweyokwono. Aki su to'busuko kubalno nemoro sumwoluko ton dugoga surovonekumokwolabwo'ji tov yasuwa'nodo'maiyo. Toro kuvi kuruv kemoro sumwoluko kunyu kuruv dugoga irovekumokwolabiyo'mokwono. Kevu nevubusuko danyu'nyuwuulo subwosunpi toga kevu kaveno to'no domollukwovogaulo. Toro amollukwopi toga kemoro sumwoluko tov dugoga nokwo irovekumokwolamwalonokwono.