Popular Bible Verses from 1 Koorin 12

Share

Nevu yiuwi'nokai Jisasolluro a'mwo abolo tonol imgu amgu wiyo'mwoju'numwalano'moneyokwe Gooti toolluro Kuullo tool womdo judo'no judo'nodo ton pwolno puru'monodo tonollu nekubweyodowodekono.

Yovekurajo su tovino kavlo tov arokwono. Kevu yiuwi'nokai togaikul Krais toolluro kulako to'busuko imo'nodupudogaikikono. Aki yiuwi'nokai pwolno puru'monodo togaikul kulako su tovida'ai suvlatodeyo judo'no judo'nodo tonbusuko imo'nodupudogaikikono.

Toro te nemoro kulako tovida'ai puruv danyu'nyuwuulo amaro'ji tov yiuwi'nokai kulako tovida'ai judo'no judo'nodo kun kuruv danyu'nyuwuulo aval'no ibwosungoulapinogano. Aki nemoro kulako tovida'ai puvi ilaiyo toru sulomorumwallupi tov yiuwi'nokai kulako tovida'ai judo'no judo'nodo kun kuruv ilaiyo aval'no ipinogano.

Toro te kevu neya duu'nyulo. Gooti toolluro Kuullo tool a'mwo pwollu pi'mwo kuudo tokwe dumul'mwojo'moneyokwe womdo tov wiyodowodekono. Aki puruv, kuudo aguto tokwe moruujo'moneyokwe womdo tov Gooti toolluro Kuullo tool a'mwo pwollu wiyodowodekono. Aki puruv, a'mwo pwollu Gooti toolluno kuudo me'no uubweyodowodo tovi gudupolallo'moneyokwe womdo tov wiyodowodekono. Aki puruv, Gooti toolluro Kuullo tool yiuno gamoro jurogudo tokwe to'no nobollo tovi ikullo'moneyokwe womdo tov a'mwo pwollu wiyodowodekono. Aki Kuullo su tool a'mwo pwollu duuwallo jurogudo ton wuuduuwallumwalono'moneyokwe womdo tov wiyodowodekono. Aki puruv, a'mwo pwollu Gooti toolluro proofet yogalo moruujo'moneyokwe womdo tov wiyodowodekono. Aki puruv, a'mwo pwollu Gooti toolluro Kuullo toolluda'aiyo'mdukoneyokwe tovino pi'mwono jagillo'moneyokwe womdo tov wiyodowodekono. Aki puruv, a'mwo pwollu yogaljo judo'no judo'nodo tonyuda'ai kuuguudo moruujo'moneyokwe womdo tov wiyodowodekono. Aki puruv, yogaljo judo'nodo su tonyuda'ai moruudodopure tovino kavlo ton mollovodo'mwojajo'moneyokwe womdo tov a'mwo pwollu wiyodowodekono.

Yiuwi'nokai womdo go'no go'nodo su togai Jisasolluro a'mwo abolo pwolno puru'monodo tonyu yado uumwodeyodowodo su tool Gooti toolluro Kuullo avalo pwolnodo tookono. Kuullo su tool gavnokweyolluro kuudo tovi uumjunowo'ji womdo go'no go'nodo ton yado uumwodeyodowodekono.

Gooti toolluro su toro yokwollosodowodo tov aro tovinokwono. Nemoro kulako tovuro yiuwi'nokai suvlatodeyo judo'no judo'nodo su ton go'no go'no nomdukuu'nupiyo. Toro kuvi kuruv yiuwi'nokai kulako tovida'ai ton sumwoluko aval'no wosunopi imgu amgu neya domollomwalnogaulo.

Gooti toolluro Kuullo tool Jisasolluro a'mwo abolo tonyu yasuwa'wino judo'no judo'nodo tollovo me'no wiyodowodekono. Yasuwa'wino wiyodowodo su tollovo judo'no judo'nodollovogano. Toro kuvi kuruv Kuullo avalo toolluro wiyodowodogano. Aki su toro tollovogai nevu go'no go'nodo tomgu'aro womdo imovla'mdowado kuvi kuruv yiuno Aguto avalo toolluno to'no womdo wiyodowadonogano. Aki nevu yiuwi'nokai Gooti toolluro womdo go'no go'nodo su tonyu momjumovlaiyo'moneyokwe jurogudo go'no go'nodo ton ma'dowado kuvi kuruv Gooti yiuno avalo toolluda'ai to'no ma'dowadonogano.

Toro te Gooti tool gamoro mollu'bwoto tonyu aro ajesokaikono. Muudu'nodo tooro kuurotokwe toorogano. Su toorai iwapi tooro proofet toorogano. Aki lukomguda'ai tooro ibwasokwe toorogano. Aki toruda'ai Gooti tool gamoro mollu'bwoto tonyu yasuwa'wino pun kwiyokaikono. Pworo duuwallo jurogudokwe toorogai'aro nobollo tonyu ikullokwe toorogai'aro a'mwo abolo pubuurai wiyo'mwojokwe toorogai'aro mido mollomwalokwe toorogai'aro a'mwo abolo gabovo tonyuro yogaljo tonyu moruudodupudo toorogai'aro yiuwi'nokai su toorai Gooti tool yasuwa'wino kwiyokaikono.

Kevu neya duu'nyulo. A'mwo pwolluro kulako tovi yiuno suvlo'mdeyo oo ato'mdeyo judo to'no mwo'dowodokwono. Toro kuvi kuruv a'mwo su toolluro kulako tovuro suvlatodeyo judo'no judo'nodo bwotonyago ton wo'dupudogano.

Toro kuvi kuruv nemoro kulako tovida'ai pubuuro jurogudo neya mimo'nodupudo su tobuuro nonaguto'mno'juki nemoro kulako tov ilaiyo mimo'nowo'jujukokwono. Aki nemoro kulako tovida'ai pubuuro wollainyo imo'nodopure kubuuraino kuruv kulako to'gwowi supto bwotonyo yodowodokwono.

Aki a'mwo pwolluro kulako tovi yiuno sumdo judo toolno so'mowopiyo'ji tov a'mwo su tool noonyumwonyu yogalo tonyu ku'nono muu'numwalonekono. Aki a'mwo pwolluro kulako tovi yiuno kaduko judo toolno so'mowopiyo'ji tov a'mwo su tool buro'nyo buro'nyo sudo tonyu ku'nono muunmwalonekono. Nemoro kulako tovi su toro sumo'nowo'jujuko'mno'juki nevu ilaiyo mimo'nowa'jujukonogano. Toro kuvi kuruv Gooti tool gavnokweyolluro kuudo tovi uumjuno'no nemoro kulako tovida'ai yiuwi'nokai suvlatodeyo judo'no judo'nodo ton sokwollomunyutovanekubweyokaikono. Nemoro kulako tovi yiuno suvlo'mdeyo oo ato'mdeyo to'no so'mowopiyowo'jujuko'mno'juki kulako kuunodo mimo'nowo'jujukokwono.