Popular Bible Verses from Romanos 6

Share

Je̱'e̱ poky kyuju'uñ je̱' je̱'e̱ o'ku̶ñ ye̱jkp, peru̶ je̱'e̱ Dios myay'ajt je̱'e̱ mu̶dyiibu̶ je̱'e̱ Dios ñi'iyejkypyu̶ñ, je̱' je̱'e̱ juugy'ajtu̶ñ ye̱jkp je̱'e̱ wiinu̶u̶xu̶u̶bu̶ ko tu'ugyu̶ n'ijtu̶mu̶ch ajku̶xy mu̶u̶d je̱'e̱ Cristo Jesús, u̶u̶ch je̱'e̱ nWindzú̶n ajtu̶m ajku̶xy.

Y je̱'e̱ poky ka'p je̱'e̱ mu̶k'ajt okmu̶dajtnu̶ch ma miich ajku̶xyu̶ñ, je̱' ko ka'p je̱'e̱ Moisés y'ane̱'e̱mu̶ñ xy'ane̱'e̱mgu̶xnu̶, je̱'e̱ Dios y'oy'ajt cham xy'ane̱'e̱mgu̶xnu̶py ni'imay'ajt kyu̶xpu̶.

Y ko tu̶ nnu̶u̶be̱jtu̶m ajku̶xy nan kipxy tu̶ nnaaxtu̶gu̶u̶yu̶m ajku̶xy mu̶u̶d je̱'e̱ Cristo, y o'ku̶mu̶p ajku̶xy neby njuugypyu̶jku̶mu̶chu̶ñ ajku̶xy y ndzu̶naay njugy'ajtu̶mu̶ch ajku̶xy mu̶u̶d je̱'e̱ jembyu̶ jugy'ajtu̶ñ, du'un neby je̱'e̱ Cristo je̱'e̱ Tyeedy yajjuugypyu̶jku̶ju̶ñ mu̶u̶d je̱'e̱ oybyu̶ myu̶k'ajtu̶ñ.

Ka'p je̱'e̱ mni'kx mgopt mye̱jkku̶xy ma je̱'e̱ pokyu̶ñ, neby je̱'e̱ ju̶bu̶kpu̶ mu̶baad xyajtuungu̶xyu̶ñ. Ni'igu̶ nayye̱jku̶gu̶x ma je̱'e̱ Diosu̶ñ, du'un neby je̱'e̱ ja'ay mu̶dyiibu̶ tu̶ y'o'ogyu̶ñ y mu̶dyiibu̶ tu̶ jyuugypyú̶kyu̶ñ ja'adu'ook, y ye̱jkku̶x je̱'e̱ mni'kx mgopt ma je̱'e̱ Diosu̶ñ neby je̱'e̱ oybyu̶ mu̶baad mduungu̶xyu̶ñ.

Nejwu̶u̶yu̶mby neby ijty jeky'ajty nja'ay'ajtu̶mu̶ñ ajku̶xy; yajcruutzpe̱jtu̶ je̱' mu̶u̶d je̱'e̱ Cristo, ka'pu̶ nduun'adu̶u̶tzu̶mu̶ch ajku̶xy je̱'e̱ ni'kx kopt y'adzojku̶ñ y ka'pu̶ je̱'e̱ poky nmu̶duun'adu̶u̶tzu̶mu̶ch ajku̶xy, du'un neby je̱'e̱ tuumbu̶ ni'idoogypyu̶ wyindzú̶n mu̶duñu̶ñ.

Y du'unu̶tz miich nandu'un ajku̶xy, nayyajnajxu̶gu̶x o'ogy poky kyu̶xpu̶, peru̶ juugy ma je̱'e̱ Diosu̶ñ; cham tu'ugyu̶ myajpaatku̶xy ma je̱'e̱ Cristo Jesúsu̶ñ.

¿Nej mu̶baad nmu̶naanu̶m? ¿Tzu̶k ni'igyu̶ pokytyuun'adu̶u̶tzu̶m ajku̶xy neby je̱'e̱ Dios je̱'e̱ y'oy'ajtu̶ñ ni'igyu̶ yajni'igu̶xu̶'u̶gu̶chu̶ñ? ¡Ka'p, ka'p du'un mu̶baad nmu̶naanu̶m ajku̶xy! Ka'p je̱'e̱ poky mu̶k'ajt okmu̶dajtnu̶ ma u̶u̶ch ajtu̶m ajku̶xyu̶ñ, ¿neby mu̶baad ni'igyu̶ pokyjyooty ndzu̶naay njugy'ajtu̶mb ajku̶xy?

Miich mnejwu̶u̶ygyu̶xypy oy yajxón ko pu̶nu̶ mnaygyu̶'u̶ye̱jku̶gu̶xp neby je̱'e̱ tuumbu̶ ni'idoogypyu̶ ma je̱'e̱ windzú̶n tu'ugu̶ñ ko mgapxymyu̶doowaangu̶xy, je̱'e̱ windzú̶n naty du'un mmu̶duungu̶xypy je̱'e̱ mu̶dyiibu̶ naty mgapxymyu̶doogu̶xypyu̶ñ. Y du'un nandu'un ni'ipaatpu̶ pu̶nu̶ mgapxymyu̶doogu̶xypy je̱'e̱ poky, je̱'e̱ poky naty du'un mmu̶duungu̶xypy je̱'e̱ mu̶dyiibu̶ naty mgapxymyu̶doogu̶xypyu̶ñ, je̱'e̱ mu̶dyiibu̶ ju̶bu̶ktuum yajka'ab yaj'o'kp yajtu̶goobyu̶; peru̶ pu̶nu̶ mgapxymyu̶doogu̶xypy je̱'e̱ Dios, je̱'e̱ Dios naty du'un mmu̶duungu̶xypy je̱'e̱ mu̶dyiibu̶ naty mgapxymyu̶doogu̶xypyu̶ñ neby mu̶baad tu̶y tu'uda'agy mdzu̶naay mjugy'ajtku̶xyu̶ñ.

Peru̶ Dioskujuuyu̶p je̱'e̱ Dios ko je̱'e̱ u̶xpu̶jku̶ñ tu'ug'aa tu'ugjoot tu̶ mgu'ubu̶jkku̶xy je̱'e̱ mu̶dyiibu̶ tu̶ myajmooygyu̶xyu̶ñ; oy je̱'e̱ poky jékyu̶p tu'ktiempo mmu̶duungu̶xy ko je̱'e̱ Dios tyu̶y'ajt najty ka'p mnejwu̶u̶yu̶ ajku̶xy. Peru̶ tu̶ m'awa'adzpu̶dzu̶u̶mgu̶xnu̶ ma je̱'e̱ poky ijty mmu̶duungu̶xyu̶ñ y tu̶ mbadu̶gu̶u̶ygyu̶xnu̶ neby mu̶baad tu̶y tu'uda'agy mdzu̶naay mjugy'ajtku̶xnu̶ju̶ñ.