Popular Bible Verses from Romanos 5

Share

Peru̶ je̱'e̱ Dios yajni'igu̶xu̶'kypy je̱' ko xchojku̶m xyjyu̶wu̶u̶yu̶m ajku̶xy, oy najty nja'apojkpu̶ja'ayu̶ch ajtu̶m ajku̶xy, Cristo xyñi'i'o'ktuut ajtu̶m ajku̶xy.

Y ka'p mu̶baad xywyin'u̶u̶nu̶m ajku̶xy je̱'e̱ Dios y'oy'ajt je̱'e̱ mu̶dyiibu̶ nju̶jp'ijxu̶mybyu̶ñ ajku̶xy, je̱' ko tu̶ je̱'e̱ Espíritu Santo xyaj'adu̶gu̶u̶y xyajjoottu̶gu̶u̶yu̶m ajku̶xy je̱' ko mu̶k xchojku̶m xyjyu̶wu̶u̶yu̶m ajku̶xy.

Y ka'p adaadu̶'ajty nmu̶xondaakypy ajtu̶m ajku̶xy, nan nmu̶xondaakypy je̱'e̱ tzaachpyu̶ ayo'on nandu'un ajtu̶m ajku̶xy; je̱' ko nejwu̶u̶yu̶mby ko je̱'e̱ tzaachpyu̶ ayo'on nmu̶najx nyajnajxu̶m ajku̶xy, mu̶'it je̱'e̱ mu̶k'ajt nbaattu̶m ajku̶xy neby mu̶baad nme̱kxtujku̶mu̶ñ ajku̶xy, y adaa mu̶k'ajt xyajku'umaybyu̶dzu̶u̶mu̶mb; y ko xyajku'umaybyu̶dzu̶u̶mu̶m ajku̶xy, mu̶'it xyajju̶jp'ijxu̶m ajku̶xy nbadaanu̶m je̱'e̱ Dios y'oy'ajtu̶ñ.

Y du'unu̶tz y'íxu̶ju̶ch, tu̶ je̱'e̱ Dios xyajpokyñi'iwaatzu̶m ajku̶xy, je̱' ko je̱'e̱ Jesucristo tu̶ nmu̶bu̶jku̶m ajku̶xy, jootkujk cham n'ijtu̶nu̶ ajku̶xy mu̶u̶d je̱'e̱ Dios mu̶u̶d je̱'e̱ nWindzú̶n Jesucristo kyu̶xpu̶ ajtu̶m ajku̶xy. Je̱'e̱ Cristo kyu̶xpu̶ je̱'e̱ Dios mu̶u̶d n'ijtu̶m ajku̶xy je̱' ko tu̶ nmu̶bu̶jku̶m ajku̶xy, y ndzu̶naay njugy'ajtu̶mb ajku̶xy tu̶y tu'uda'agy, y nxondaaku̶m ajku̶xy ko nju̶jp'ijxu̶m ajku̶xy nbadaanu̶m je̱'e̱ Dios y'oy'ajtu̶ñ.

Ko najty ka'p mu̶baad ku̶'u̶m nnayyajni'idzooku̶mu̶ ajku̶xy, mu̶'it je̱'e̱ Cristo myiiñ ya naaxwiiñ u̶xtu̶ koonu̶ je̱'e̱ xu̶u̶ jumu̶jt myu̶baad'ajty; oy je̱'e̱ ju̶bu̶kja'ay ni'i'o'ktu'uty.

Y jada'achám tu̶ je̱'e̱ Dios xyajpokyñi'iwaatzu̶m ajku̶xy ko je̱'e̱ Cristo xyñi'i'o'ktuuty ajtu̶m ajku̶xy, y xyajni'idzooku̶mu̶p ni'igyu̶ ajku̶xy mu̶u̶d je̱'e̱ Cristo kyu̶xpu̶ ko je̱'e̱ naaxwiiñjya'ay naty tu̶ydyunaanu̶.

Je̱' je̱'e̱ du'un tyijpy, ko tu'ug je̱'e̱ ja'ay je'eyu̶ je̱'e̱ mu̶dyiibu̶ je̱'e̱ Dios ka'akapxymyu̶doowu̶ñ, y paady je̱'e̱ ja'ay nigu̶xyu̶ pyokytyu̶gu̶u̶ygyu̶xy; peru̶ nan tu'ug je̱'e̱ ja'ay je'eyu̶ nandu'un je̱'e̱ mu̶dyiibu̶ je̱'e̱ Dios kapxymyu̶doowu̶ñ, je̱'e̱ mu̶dyiibu̶ je̱'e̱ ja'ay may yajpokyñi'iwa'adzu̶bu̶ñ.

Y ka'p jye̱'e̱du̶'ajtyu̶ch ko xyajni'idzo'ogaanu̶m ajku̶xy, je̱' ko xondaakp nandu'un ajtu̶m ajku̶xy ma je̱'e̱ Diosu̶ñ mu̶u̶d je̱' gyu̶xpu̶ mu̶dyiibu̶ je̱'e̱ Jesucristo tu̶ tuñu̶ñ, u̶u̶ch je̱'e̱ nWindzú̶n ajtu̶m ajku̶xy, pues je̱'e̱ Cristo kyu̶xpu̶ je̱'e̱ jootkujk'ajtu̶ñ tu̶ nbaattu̶m ajku̶xy mu̶u̶d je̱'e̱ Dios.