Popular Bible Verses from Romanos 12

Share

Ka'p du'un mdzu̶naay mjugy'ajtku̶xy mu̶u̶d je̱'e̱ ju̶bu̶kjoot je̱'e̱ ju̶bu̶kwinma'añ neby adachambu̶ naaxwiiñjya'ay chu̶naaygyu̶xy jyugy'ajtku̶xyu̶ñ. Tu̶gachjyaty winmaaygyu̶xnu̶ wan je̱'e̱ mdzu̶naay mjugy'ajtu̶ñ du'un tyu̶gajtzku̶xnu̶ch y mnejwu̶u̶ygyu̶xu̶ch neby je̱'e̱ Dios tzokyu̶ñ mja'ay'ajtku̶xu̶chu̶ñ, je̱' u̶u̶ch du'un ndijpy, neby mnejwu̶u̶ygyu̶xu̶chu̶ñ je̱'e̱ oybyu̶, je̱'e̱ mu̶dyiibu̶ je̱'e̱ Dios kyu'umaaybyu̶ñ y je̱'e̱ mu̶dyiibu̶ oy wa'adzu̶ñ.

Y du'unu̶tz mu̶gu'uktu̶jk ajku̶xy, cham nmu̶nukxtaakku̶xy je̱' ko je̱'e̱ Dios tu̶ xypya'a''ayoogu̶xy ko mnaygyu̶'u̶ye̱jku̶gu̶xu̶ch ku̶'u̶m amuumdu'ugjoot ma je̱'e̱ Diosu̶ñ du'un neby je̱'e̱ juugypyu̶ windzu̶gu̶'u̶ñdyu̶ñ, mmu̶duungu̶xu̶ch je̱'e̱ Dios oy wa'adz y du'un neby je̱'e̱ Dios ku'umáyu̶ñ. Adaa je̱' je̱'e̱ jaanchpyu̶ windzu̶gu̶'u̶ñ je̱'e̱ mu̶dyiibu̶ mu̶baad mye̱jkku̶xy ma je̱'e̱ Diosu̶ñ.

Jootkujk tzu̶naaygyu̶x jugy'ajtku̶x; cham je̱'e̱ oy'ajtu̶ñ mju̶jp'ijxku̶xy, je̱'e̱ mu̶dyiibu̶ myajmo'owaangu̶xpu̶ñ; mekxtujkku̶x mu̶k ma je̱'e̱ tzaachpyu̶ju̶ñ, ka'p je̱'e̱ Dios mu̶bu̶jktzowu̶u̶ m'u̶xmajtzku̶xy.

Ka'p mnayyegyii xymyu̶mada'agu̶ch je̱'e̱ ju̶bu̶kpu̶. Ni'igu̶ miich je̱'e̱ ju̶bu̶kpu̶ mu̶mada'ag mu̶u̶d je̱'e̱ oybyu̶.

Naychojku̶gu̶x amíñ u̶xyu̶py neby tu'kpuya'ay tu'kpudo'oxypyu̶ju̶ñ, naymyu̶jpu̶daaku̶gu̶x y naywyindzu̶gu̶u̶yu̶gu̶x amíñ u̶xyu̶py.

Naychojku̶gu̶x amíñ u̶xyu̶py tu'ug'aa tu'ugjoot. Najtz'ixu̶u̶ygyu̶x je̱'e̱ ju̶bu̶kpu̶ y panú̶kxku̶x je̱'e̱ oybyu̶.

U̶xtu̶ mabaad naty madaakku̶xy mduungu̶xy je̱'e̱ oybyu̶; tzu̶naaygyu̶x jugy'ajtku̶x oy yajxón nigu̶xyu̶ y ka'p je̱'e̱ tzip ma'ad maa, u̶xtu̶ mabaad madaakku̶xyu̶ñ.

“Mu̶gu'uktu̶jk je̱'e̱ mu̶dyiibu̶ u̶u̶ch oy ndzojkpy nju̶wu̶u̶ybyu̶ñ, ko naty pu̶n nej xytyuungu̶xy, ka'p ku̶'u̶m myaj'awimbijtu̶gajtzku̶xu̶ch, je̱'e̱ Dios miich je̱'e̱ yajku̶'u̶wanu̶u̶ygyu̶x y je̱' tzaachtyunu̶u̶ju̶p; je̱' ko du'un je̱'e̱ Dios ñaky myu̶na'añ: “U̶u̶ch xypyaatp ndu̶ydyúnu̶chu̶ch je̱'e̱ ja'ay; u̶u̶ch nyajkumu̶dówu̶py, du'un je̱'e̱ Windzú̶n Dios myu̶na'añ.”

Nay'amu̶jaaduunu̶gu̶x, ka'p mnuux'ajtku̶xy y mu̶duungu̶x je̱'e̱ Windzú̶n Jesucristo tu'ug'aa tu'ugjoot.

Mu̶u̶d je̱'e̱ mu̶dyiibu̶ u̶u̶ch je̱'e̱ Dios tu̶ xyajni'ipú̶kyu̶ñ mu̶u̶d je̱'e̱ y'oy'ajtu̶ñ. Cham du'un miich nigu̶xyu̶ nnu̶maaygyu̶xy ko ka'p ni tu'ug mu̶j ku̶xp ku̶'u̶m mwinmaaygyunajxku̶xy je̱'e̱ mu̶dyiibu̶ ka'p nimu̶naaxu̶u̶ mu̶baad mbaatku̶xyu̶ñ. Nidu'ug nidu'ug ku̶'u̶m winmaaygyu̶x oy yajxón, du'un neby je̱'e̱ Dios je̱'e̱ tuung tu̶ xymyooygyu̶xyu̶ñ kipxy mu̶u̶d je̱'e̱ mu̶bu̶jku̶ñ.

Ka'p je̱'e̱ ju̶bu̶kpu̶ myaj'awimbijtu̶gajtzku̶xy ma je̱'e̱ mmu̶gu'ugu̶ñ, je̱'e̱ mu̶dyiibu̶ naty tu̶ xymyu̶duundu̶gooygyu̶xyu̶ñ. Jatytyimytyuungu̶x je̱'e̱ oybyu̶ ku̶xyu̶ wan maaju̶ch.

Tzu̶naaygyu̶x jugy'ajtku̶x tu'ugyu̶ nixim niyam. Ka'p mu̶j ku̶xp mnayjyu̶wu̶u̶yu̶gu̶xy, yuung naaxypy naybyu̶daaku̶gu̶x, du'un neby je̱'e̱ mu̶dyiibu̶ yuung naaxypy ja'ay'ajtku̶xpu̶ñ. Ka'p mnaygyu'umaayu̶gu̶xy ko ku̶xyu̶ tii mjajtku̶xy.

Y nandu'un: “Pu̶nu̶ jii je̱'e̱ mmu̶dzip yu'o'ogyii, yajkáy yaj'u'ug; y pu̶nu̶ tu̶tzu̶u̶yu̶p, yajnu̶u̶'u'ug; y du'un du'un mu̶k myajtzo'oydyúnu̶ch neby tu̶ xytyuñu̶ñ.”

Mu̶gápxku̶x mu̶u̶d je̱'e̱ oyjyoot oywyinma'añ je̱'e̱ mu̶dyiibu̶ xy'u̶xwu̶dijtp xypyawu̶dijtku̶xpu̶ñ. Mu̶gápxku̶x mu̶u̶d je̱'e̱ oyjyoot oywyinma'añ y ka'p je̱'e̱ ju̶bu̶kpu̶ myajmu̶dzojkku̶xy. Xondaakku̶x mu̶u̶d je̱'e̱ mu̶dyiibu̶ xondaakku̶xpu̶ñ y ju̶u̶ygyu̶x yaaxku̶x mu̶u̶d je̱'e̱ mu̶dyiibu̶ ju̶u̶ygyu̶xp yaaxku̶xpu̶ñ.

Pube̱jtku̶x je̱'e̱ mu̶dyiibu̶ ku̶xyu̶ tii yajmayjyajtku̶xpu̶ñ, je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ; yajja'ttaakku̶x je̱'e̱ mu̶dyiibu̶ naty xykyu'ijxp xymyu̶gápxku̶xpu̶ñ.

Du'un neby je̱'e̱ tu'ugpu̶ nni'kx ngopt ajtu̶m ajku̶xy abu̶kyjyaty mu̶u̶du̶ch neby mu̶baad tyuñu̶ñ, y ka'p je̱'e̱ kú̶xyu̶bu̶ ni'kx kopt tu'ugyu̶ tyuñ agu̶ tu̶gachjyaty je̱'e̱ tyuñ, y nandu'un u̶u̶ch ajtu̶m ajku̶xy oy nja'animáyu̶ch ajtu̶m ajku̶xy, tu'ugyu̶ nyajpaatu̶m ajku̶xy ma je̱'e̱ Crístoju̶ñ y tu'ugyu̶ amíñ u̶xyu̶py nyajpaatu̶m ajku̶xy, du'un neby je̱'e̱ ku̶'u̶ teky je̱'e̱ ni'kx ka'a'u̶xmáchu̶ñ.