Popular Bible Verses from Efesus Uram 5

Share

Sunda Er Imtamnyi biryi boukwe kusurur mabwe nermabwe kundarur ati, nun Nai Imtamnyi biryi teleb dinyi kiknirur to, sunbabyi neiktoto teleb dinyi akwe kununa teleb. Tonda, sunci boukwe weik kibdandoka kubdarur. Ara, nun Du Yesus Kristus biryi nunsi boukwe weik kibsou to, sunbabyi neiktoto boukwe weik kurdana teleb. Ati, nun Du Yesus biryi nunti, “Lebkwan,” tenen Erdamnyi karebdandoka co lase deici dibmou. Nun Du biryi, “Ni dibkwan ara Ni Nai Imtamnyi bisi Ni damnyi dama ato deibdankwan,” tenen Erci Erdamnyi karebdanmou. Ara, nun Nai Imtamnyi bira nun Du Yesus biryi karebdanmou dama asi asing eiboka Er kanya teleb kubkwamwe ati, nun Du Yesus biryi Erdamnyi karebdandoka co lase deici dibmou.

Ura, ni kwit yabwe! Sunci sun damnyi diboka kalikdamunci, “Una kuboka teleb dinyi kunubtibyi do?” tenen lilibmunci, teleb dinyi akwe kununa teleb. Ati, sunci ninyi kanya bon kum nang ato kubmunyei. Eda, bikdob uram bingna nang ato kibdamunci, teleb dinyi akwe kunubdarur. Ukuryok talak ara ninyi ilinto malyi kun dinyi kuraming ati, sunci tanglona kum uca, “Nun Nai biryi nunsi Teleb Uram lak ena kikib tum karebmasir do?” tenen tenebmunci, sunci Teleb Uram asi tuba-tuba lak ebdarur.

Tonda, sunci anggur me yibmun ba, walina talebsicei. Anggur me ilinto yibmunyi uca, sunci, “Ner talyi yobtinyi,” tenen kanya bobmunyei ati, sunci anggur me yibmunyei. Eda, sunci walina talen dinyi nirya asi takloboka Er Imtamnyi Kanya Roh Kudus aryi sun kanya dam asi langdeirisina teleb. Sunda dib tenen nang mamun ebdamunyi ura, Er Imtamnyi biti si weik en mot asi semna teleb. Ara, sun kanya kilkil kubsiribok, Er Imtamnyi si ererdeirin mot amuma-amuma semna teleb. Sunci tuba-tuba, “Ei nun Nai,” eboka nun Nai Imtamnyi si weik ena teleb. Ara, nun Nai biryi nunti karebmasici dinyi nirya ara Nun Du Yesus Kristus si deici aryi nunci nun Nai Imtamnyi si weik eboka, “Ei nun Nai,” ena teleb.

Ati, sunci ninyi kanya bon kum nang ato kubmunyei. Eda, nun Nai Imtamnyi biryi teleb tenesurur to asi sunci bikoka teneiboka kunubdarur.

Ba, sun ner don nang ara sun nerabwe asi boukwe kimna teleb. Nun Du Kristus biryi nun dib tenen nang asi boukwe weik tenen Erdamnyi nunti karebdanmou to kuboka sun sal nang ara sun nerabwe yuk-yuk asi boukwe kiboka sun damnyi karerdana teleb.

Minob talak ara sunbabyi kunuk dam aryi kun nang ato kurandauci, malyi dinyi kurandau ati, ato ebman. Ato kurandau bok, nun Du Yesus biryi karebsou uca, sunda ukuryok berengna dam kuraming nang ato kuboka nun Du Yesus bisi milindarur. A deyok aryi, sunci, “Kunuk dam dinyi malyi kun dinyi nirya bai donokmoubwe,” tenen sunci berengna dam kun nang ato kubmuncok, teleb dinyi akwe kunubdarur.

Tonda, sunci nun Du Yesus Kristus biti, “Nun iya weik sienyi kurur,” tenen ilil kusina teleb. Nun Du bisi ilil kubsiribok, sunci Er Uram asi kunuboka sun kanya luknubmunci, sun mamun ati, “Ni nai yabwe,” tenen sun wenena uram asi kekebdandarur.

Sun ninyi doansingnyi nerabwe ara nun Du Kristus Yesus Uram kekeboka kunubninto kuboka sun akenyi yabwe uram kekeboka kununa teleb.

Ba, sun ner doamingnyi nang ara sun damnyi boukwe kimdarandum to, sun nerabwe asi boukwe weik kimna teleb. Tonda, sun nerabwe ara, “Ni akenyi,” tenen sun akenyi yabwe uram yuk-yuk asi kekeboka kununa teleb.

“A deyok aryi, sal aryi er nai ab er kwin asi takloboka er ner dobdiryi, sun bitinyi ara antaniboka tub tentok ato kuna teleb.” (Kejadian 2:24) Ato eboka Er Imtamnyi Uram aryi nunsi eteresurur.

Ura, sun malyi kun nang aryi malyi kuramingnyi to sunci miliboka kubmunyei. A nang aryi malyi kuramingnyi to ara kunuk dam dinyi akwe kuraming. Ato dinyi ara talyi dinyi akwe kurur. Sunci a malyi kun dinyi kunubmunyei. Eda, sunci, “A dinyi ara malyito,” eboka malyi kun nang asi wenebdarur.