Popular Bible Verses from Efesios 5

Share

Dachi Akõreba ichi warrarã ãrea kʉ̃ria b̶uu. Maud̶eeba machi ichi kĩra nureásturu. Jomaurã kʉ̃riásturu Cristoba dachi kʉ̃ria b̶uu unubid̶a kĩra. Kʉ̃riad̶eeba dachi kakua ara ichi beabisii Dachi Akõremaa ãnimara baa dearuu kĩra. Dachi Akõreba mau biꞌia unusii.

Maud̶eeba kauwa nibásturu. Adua nuree kĩra nibarã́sturu, maumaarã kʉ̃risia kuitaad̶eeba nibásturu. Machiba poyaa wauduucha biꞌia wáusturu, nau ewarid̶e ẽbẽrarãba ne joma kachirua waubadaud̶eeba.

Ituaba biu nibarã́sturu. Mauba kachirua aude waubibarii. Biu nibad̶ai audeara Dachi Akõre Jaurid̶eeba nureásturu. Dachi Akõre bed̶ead̶e b̶ʉ kub̶uu karibadau, ãbarãba karibadau maud̶e Dachi Akõre Jauriba karibi b̶uu chiya karibad̶ai baita ãbua karísturu. Dachi Mechiumaa sõd̶eeba karísturu biꞌia berread̶ai baita. Dachi Mechiu Jesucristo trʉ̃d̶eeba ewaricha dachi Bajãad̶ebena Akõremaa ne joma baita ichíturu kid̶ibai ásturu.

Kʉ̃risiaswãe nuree kĩra nurearã́sturu, maumaarã ãrea kuitásturu kãare Dachi Mechiuba waubi b̶uu.

Mukĩrarã wẽra bara nuree, machi wẽra kʉ̃riásturu, Cristoba dachi kʉ̃ria b̶uu unubid̶a kĩra. Kʉ̃riad̶eeba dachi baita ara ichi ida beabisii.

Naed̶e machi pãriud̶ebena basii, maamina id̶ibae Dachi Mechiu ome panuud̶eeba machi ʉ̃d̶aad̶ebenarãbʉ. Maud̶eeba ʉ̃d̶aad̶ebena warrarã kĩra nibásturu.

Cristo wapea panuud̶eeba arab̶aud̶e chiya ijã́sturu.

Wẽrarã kima bara nuree, machi kimarãba jara panuu ijãa panásturu, machiba Dachi Mechiu Cristo bed̶ea ijãa waubadau kĩra.

Mau ʉ̃rʉbena kuitaabi b̶umina machicha machi kima kʉ̃ria nuread̶ai panuu ara machi kʉ̃ria panuu kĩra. Maud̶e wẽraba ichi kima wapeadee b̶uai b̶uu.

Dachi Akõre bed̶ead̶e naka b̶ʉ kub̶uu: «Mau baita mukĩraba chi akõre maud̶e chi nawe b̶ʉiped̶a ichi wẽra ome ãbua b̶eei. Maka kakua ara ab̶a b̶uu kĩra nuread̶ai».

Pãriud̶ebenarãba kachirua waubadaud̶eeba ne bia neekau. Maud̶eeba arab̶au waurã́sturu, maumaarã kuitaabiásturu ãchiba waubadau kachiruabʉ.