Popular Bible Verses from Luke 3

Share

Yowanane mumane kutua bantu bonsu mu mayi, kushisha kutuaye ne Yezu kabidi. Diba divua Yezu utendelela, diulu kubululuka, Mueyelu wa Tshijila kumutulukila ne mubidi bu wa nyunyi wa nkudimba. Ke diyi kumvuika mu diulu ne: — Wewe udi muananyi munanga. Ndi ne disanka bualu buebe.

Kadi Yowanane kubambila bonsu ne: — Meme ndi nnutua mu mayi. Kadi udi mumpite meme ku bukole, nealue. Meme tshiena mukumbane nansha mua kumukopola bisabata. Yeye neanutue munda mua Mueyelu wa Tshijila, ne mu kapia.

Enzayi malu adi aleja ne: nudi bakaje nsombelu yenu. Kanudiambidi munda muenu ne: “Abrahame ke nkambua wetu.” Bualu ndi nnujadikila ne: Mvidi Mukulu udi mua kuandamuna mabue aa, ashale ndelanganyi ya Abrahame!

mBamane kulongolola kasuyi, bua bakosele naku mitshi ku miji. Mutshi onsu udi kauyi ukuama bimuma bilenga, nebaukose, bawele mu kapia.

Ebi bivua bienzeka muvua muambi Yeshaya mufunde mu mukanda wende ne: “Ndi ngumvua muntu wela diyi dikole mu tshipela ne: Longoluelayi Maweja-Nangila njila. Numuenzele njila milulame. Tshibandabanda tshionsu, nutshiuwuje. Mikuna minene ne mikese, nuyipuekeshe. Njila mikonyangale, nuyilulamije. Binina bia mu njila, nubilandakaje. Nanku bantu bonsu nebamone mudi Mvidi Mukulu ubasungidila.