Popular Bible Verses from Alo 6

Share

Nũndũ ĩtuvi ya naĩ nĩ kĩkw'ũ, ĩndĩ mũthĩnzĩo wa Ngai nĩ thayũ ũtathela kwĩsĩla kwa Mwĩai waitũ Yesũ Klĩsto.

Naĩ ndyaĩlĩte kwĩthĩwa na ũkũmũ ĩũlũ wenyu ĩngĩ, nũndũ mũitongoew'e nĩ mĩao, ĩndĩ mũtongoew'e nĩ mumo wa Ngai.

Kwoou kwĩsĩla ũvatisonĩ witũ, nĩtwakwie na twathikwa vamwe na Klĩsto, nĩ kana o ũndũ wathayũũkiw'e kuma kwa akw'ũ kwa ũtonyi mũnene wa Ĩthe wake, o naitũ twĩthĩwe tũtonya kwĩkala mwĩkalo mweũ.

O na mũikaeke ĩmutha yenyu o na yĩmwe yĩtw'ĩke ya kwĩkaa naĩ. Vandũ va ũu, ĩnenganei kwa Ngai ta andũ mathayũũkĩtw'e kuma kĩkw'ũnĩ, na mũinengane mamutha menyu onthe kwake matũmĩwe kwa kwĩkaa ũla ũlũngalu.

Nĩtwĩsĩ kana ũmũndũ witũ wa tene nĩwambiwe vamwe na Klĩsto ngelany'onĩ, nĩ kana wendi witũ wa kwĩka naĩ wanangwe tũikasyoke kwĩthĩwa ngombo sya naĩ ĩngĩ.

Kwoou o nenyu ĩyosei ta mwĩ akw'ũ maũndũnĩ ma naĩ, ĩndĩ mwĩkale thayũ wenyu kwondũ wa Ngai nthĩnĩ wa Klĩsto Yesũ.

Twĩasya ata ĩndĩ? Twaĩlĩte kũendeea na kwĩka naĩ nĩ kana mumo wa Ngai wingĩvĩĩe mũno mbee? Aiee, ũu ti w'o! Maũndũnĩ ma naĩ ithyĩ nĩtwakwie, kwoou kũtonyeka ata tũendee na kwĩka naĩ?

Nĩmũkũlya, inyw'ĩ no mwĩsĩ kana ethĩwa nĩmweenengane kwa mũndũ mũtw'ĩke ngombo syake na kũmwĩw'aa, mũtw'ĩkaa ngombo sya mũndũ ũsu mwĩw'aa? Nĩmũtonya kũtw'ĩka ngombo sya naĩ na kwoou mũikw'a, kana mũkatw'ĩka ngombo mbĩwi sya Ngai na kwoou mũituwa kwĩthĩwa alũngalu.

Ĩvinda yĩ navu ĩtina mwaĩ ngombo sya naĩ, ĩndĩ yu nĩngũmũtũngĩa Ngai mũvea nũndũ mwĩthĩĩtwe mwĩ ewi vyũ kwĩanĩsya momanyĩsyo ala mwamanyĩiw'e, na o ta ũu ĩtina wa kũthaw'a kuma naĩnĩ, mũtw'ĩkĩte ngombo sya kwĩkaa ũla ũlũngalu.