Popular Bible Verses from Roma 8

Share

Kailekanta intarépé' sapaoka si Amang Kasuruan mengatu'tul im baya-waya, wosama' méé ing kalooran a sé tou sé menga- upus Sia, sé tinowa-Na iciit im pawasa-wasa-Na.

Ampa'paan percayanku keli, sapaoka em papaté kuma'pa eng katouan, sé malaékat kuma'pa kawasa-kawasa é roh léwo', sé kala'meren intarépé' kuma'pa asi endo mengangai, kawasa-kawasa walina sé an langit kuma'pa sé an untep in tana', kuma'pa sapake' mangé en itu ra'ica méma' icita icatané an upus i Amang Kasuruan, si aituru'-Na ai cita ampa'paano i Kristus Yesus Apo'ta.

Taniitu ka'i kita, kita tawangen i Roh i Amang Kasuruan an tutuw kita ra'ica keter. Ampa'paan ra'ica kailekanta tumambisa en ulitna kita masombayang. Taan e Roh itu in esa masombayang a si Amang Kasuruan torona icita, ang karapi imangimbulu sé ra'- ica icaroma' i nunuwu' é tou.

Ampa'paano in itu sapa en icuata andumoro' im pakasa in itu? Sa si Amang Kasuruan mewali-wali wo icita, si séi e ro'na sumundur icita?

Intarépé', kita sé meesao ang karapi i Kristus Yesus ra'io ka'i ukumen i Amang Kasuruan.

Sa em pakawerot é tou pakakawasané' ing kasalé'an in owak in esa, eng kasiwakana makéré im papaté. Taan sa em pakawerot é tou pakakawasan i Roh i Amang Kasuruan, eng kasiwakana makéré oka ing katouan wo ing kaeluran.

Taan mandé pakasa en itu sangkumenta, kita tantu uli-ulit muntung ampa'paan si Kristus imupuso icita.

Émanenku sapaoka eng kawenduan pasangkumenta intarépé', ra'ica ro'na ipeputé wo i rarayo wo in sisiri' si iwéé oka ai cita asi endo mengangai.

Si séi réén e ro'na itumané icita ang kaupusan i Kristus? Kita tatapke' in icaupus-Na, mandé kita meta'up ing kasusaan, kuma'pa ing kawenduan, kuma'pa paokoien, kuma'pa kaareman, kuma'pa ra'ica mekarai, kuma'pa e makawali ang kawangkuran, kuma'pa im papaté.

Wo si Amang Kasuruan si mati'tir waya ing kararem in até é tou, kailekan-Na ka'i sapa em pinangilek i Roh itu. Ampa'paan e Roh itu mekiupus torona é tou le'nas iciit ing kasalé'an i Amang Kasuruan.

Pakasa en tou sé paakinen i Roh i Amang Kasuruan, séra toya-toyaang i Amang Kasuruan.

Sé tou menonou makiit ing kasalé'an in owak in esa, séra mawerot in andumoro' ing kasalé'an in owak. Taan sé tou menonou makiit i Roh i Amang Kasuruan, séra mawerot in andumoro' ing kasalé'an i Roh i Amang Kasuruan.

Si Toyaang-Na in esa ra'ica pena-nangen-Na en sumangkum ing kawenduan taan aisarakan-Na torona kita im baya. Sa taniitu, tantu iwéé-Na oka ai cita em baya-waya mewali-wali wo Sia.

Wo e Roh i Amang Kasuruan itu kumetero in atéta sapaoka kita toya-toyaang i Amang Kasuruan. Wo sa kita toya-toyaang i Amang Kasuruan, kita awéan hak e makéré im bagéan asé im pakasa sé aitu'tulo i Amang Kasuruan torona é toyaang-Na. Wo terimanta oka en itu mewali-wali wo si Kristus. Wo sa kita mawendu meputé in sinangkumai i Kristus, kita ka'i tumerima oka i rarayo wo in sisiri' kaputé i Kristus.

Wo sé tou pakakawasané' ing kasalé'an in owak in esa, séra menséké'an wo si Amang Kasuruan, ampa'paan séra ra'ica le'tek an ukum i Amang Kasuruan. En ulitna en ukum itu ra'ica kaémaan éra.

Wo ra'ica icitake' in tou, taan pakasa sé niéma' i Amang Kasuruan ang kayo'baan anio' lumeloo keli mengento-ngento' in oras i Amang Kasuruan tumuru' mai in darayo wo in sisiri' a sé toyaang-Na.

Kailekanta, sapaoka akar intarépé' pakasa sé niéma' i Amang Kasuruan mewali-wali mangimbulu wo mawendu meputé ing kawenduan i esa wéwéné e makéré toyaang.