Popular Bible Verses from Isaías 53

Share

Peru tsaynö yarpashqapis noqantsik mana cäsukuq kanqantsikpitam tuksishqa karqan. Jutsata ruranqantsikpitam wañutsishqa karqan. Dios Yayawan alli kawayta tarinapaqmi castigashqa karqan. Yawarninta jicharmi kutikätsimashkantsik.

Llapantsikmi oqrakashqa üshanö kaykantsik. Dios Yayapita witikushqa karmi munanqantsiknö kawaykantsik. Tsaynö kaykashqapis llapan jutsantsiktam DIOS YAYA payman churashqa.

Paymi qeshyaynintsikkunata apashqa. Paymi nanaynintsikkunatapis jipishqa. Jutsa ruranqanpita Dios Yaya castiganqantam yarparqantsik.

Runakuna payta manakaqman churarmi chaskiyarqantsu. Alläpa nanaywanmi ñakarqan. Manam pipis rikayta munarqantsu. Payta chikirmi ni pipis cäsurqantsu.

Alläpa maqayaptinpis manam imatapis parlakurqantsu. Üshata pishtayänanpaq apaqnömi payta apayarqan. Millwanta rutuyaptin üsha wiyaräkunqannömi upällalla wiyaräkurqan. Tsaynö upälla kakurmi ni juk shimillapis parlakurqantsu.

Tsaynö ñakananpaqmi DIOS YAYA munarqan. Consagratsina sacrificiunö wañuptinmi miraqninkuna maytsikaq kayanqa. Tsaypitam atska wata kawanqa. Pay raykum DIOS YAYA munanqannö llapanpis rurakanqa.

Dios Yayapa serviqninqa paypa puntanchömi jatunyarqan. Tsaki patsachö jawäkur tseqllimuq jachanömi wiñarqan. Pay manam kuyakuypaqtsu ni rikapäkuy munaytsu karqan.

Kikin salvakunqanpa rantinmi jutsayuq runanölla wañurqan. Runakuna rayku wañurmi paykunata perdonanäpaq mañakamarqan. Tsaymi payta churashaq mas respitashqa kananpaq. Guërrachö venciqkuna imaykata chaskiyanqannömi paypis premiuta chaskinqa>>.

Ñakanqan allipaq kanqanta rikarmi kushikunqa. Dios Yayam nin: <<Payqa jutsannaq servimaqnïmi. Wañurmi atskaqta perdonanqa. Jutsa rurayanqantam pay apanqa.

Imayka jutsayuqtanömi juzgayänanpaq prësu apayarqan. Payta wañutsiyaptinmi tsurinpis karqantsu. Kuyanqä runakunapa jutsankunapitam alläpa ñakarqan.

Payqa manam ni ima jutsatapis rurarqantsu ni pitapis llullatsirqantsu. Tsaynö kaykaptinmi jutsasapakunata y rïcukunata pampayanqanman pampayarqan.