Popular Bible Verses from EKSODOS 10

Share

Te U TRAI u la ong ha u Moses, “To leit shapoh ha u Pharaoh: namar nga la pyneh ïa ka dohnud jong u, bad ïa ka dohnud ki shakri jong u, ba ngan ïoh pyni ïa kine ki dak phylla jong nga ha khmat jong u: bad ba me ruh men pynsngew ha la ki khun, bad ha u khun jong u khun jong me, ïa kiei kiei kat kiba nga la leh ha ka ri Ijipt, bad ïa ki dak phylla jong nga ïa kiba nga la trei hapdeng jong ki; khnang ba phin ïoh tip ba ma nga, nga long U TRAI.”

Te U TRAI u la ong ha u Moses, “To rah ïa la ka kti sha bneng, ba ka jingdum kan long halor ka ri Ijipt, ka jingdum ruh kaba da lah ban tba.” Bad u Moses u la rah ïa la ka kti sha bneng; te ka la long ka jingdum tliw tliw lai sngi ha ka ri Ijipt baroh; kim ïaïohi shuh paralok hi, lymne uno uno ruh um shym la ïeng na la ka jaka lai sngi: hynrei, ha ki khun Israel baroh la don ka jingshai ha ki jaka shong jong ki.

Te u Moses u la kner ïa la u diengduh halor ka ri Ijipt, bad U TRAI u la pynmih ïa ka lyer na mihngi halor ka khyndew ha kata baroh shi sngi, bad baroh shi miet; ynda la mynstep te, ka lyer na mihngi ka la wallam ïa ki puit. Kita ki puit te ki la ïakiew halor ka ri Ijipt baroh kawei, bad ki la ïashong ruh ha ki phang baroh jong ka ri Ijipt: kiba jynjar eh; mynshuwa kita, ym pat ju don ki puit kat kita, lymne hadien jong ki yn ym long shuh kat kita.