Popular Bible Verses from 2 Korintus 1

Share

La mangkurru sumanga'ki' lako Puang Allataala, Ambe'-Na Puangta' Puang Isa Almaseh. Iamo Ambe' to ngkamasei na tuli mpakatana too tolino. Ia mpakatanakan ke nakannakan mangrupa-rupa kamaparrisan. Na ia joo pangpakatana kitarima jio mai Puang Allataala, la kipangpakatanan pole' lako tau laen to maparri' toda.

Ia to kamaparrisan naperasai Almaseh, moi kami' buda todamo mangka kiperasai. Susi unakan tuli mperasai pangpakatana, nasaba' Almaseh.

Ia to kiperasai susi to kumua la matemokan sanga mangkamokan dipapassanni pangsessa kamatean. Apa dipasusikan joo, dikua nadanggi' kipattuan kaleki', sangadinna mpattuankan Puang Allataala to mpatuo tomate.

Iamo mpamawatangki' sola ngasan antamatappa' lako Almaseh napileiki' naputau mesaki'. Ia toomo mpaassahki' menjaji ampun-Na tonna benki' Roh Allataala menjaji butti lako kita' kumua la nabenki' to sininna apa mangka nabasseanki'.

Ia ke maparri'kan, ia joo la mpakatana kamu' ammisalama'. Ia ke dipakatanakan, dipakatana toda kamu', ammimemmawatang toda lan kamasussan susi to kiperasai.