Popular Bible Verses from 1 I-Korinto 2

Share

Say mika itoro, sota nantongpalan nonta naysolat nonta bayag da, ja kowan to ey, “Sota eg inon‐an tan eg intenengan ni too, tan sota eg sha pay ninemnem ja panmaptengan sha, si‐katoy insagana nen Apo Shiyos so nonta toon ẃaray semek to son si‐kato.” Sajay i kowan to.

Nem sota toon eg emati, enshi son si‐kara sota Ispirito Santo, isonga eg sha eẃatan sota kaitoro ni Ispirito Santo nen Apo Shiyos, ta kowan sha ey enshiy silbi to kono son si‐kara. Eg mebedin na eẃatan sha tep no enshiy Ispirito Santo so ni too, eg ma‐eẃatan tep sota Ispirito Santoy mengi‐odog so.

Jet sota istay eg tayo amta pangkep son Apo Shiyos, inpa‐amta met laeng ni Ispirito Santo nen Apo Shiyos. Ta sota Ispirito Santo, angken sota eda‐med ja nemnem nen Apo Shiyos, toka eẃatin emin.

Jet si‐katejon emati, say ineẃat tayo, sota intoro ni Ispirito Santo ja edapo son Apo Shiyos, aliẃen sota intoro bengat ni too. Inpa‐amta ni Ispirito Santo iyay say eẃatan tayo sota in‐akan nen Apo Shiyos ja kaasi ja panmaptengan tayo.

Jet sota inkowan ko nonta naka mengitosho son si‐kayo, aliẃen inges to sota kepesing ni toon kowan sha ey matekal, ja en‐amis sa esel i shaka osala. Nem say na‐awisan jo, ineẃatan jo ey sota intorok, mismon intorong ni Ispirito Santo nen Apo Shiyos. Isonga say pamatiyo, aliẃen na shi kalaing ni tooy naynadnaran to, no diket shi panakabalin nen Apo Shiyos.