Popular Bible Verses from Exodus 20

Share

“Ŋarra dhuwala Garraynydja Godtja nhumalaŋgu Waŋarrnydja, ŋunhiyina ŋunhi ŋarra nhumalanha dhawaṯmaraŋala ŋulaŋuru wäŋaŋuru Yetjipŋurunydja, ḏirrwiḏirrwi-mulkanharamirriŋurunydja. Yakana yanana nhuma yurru yukurra buku-ŋal'yun wiripuŋuwunydja waŋarrwu malaŋuwu, liŋgu ŋarrapi dhuwala waŋgany yana waŋarrnydja nhumalaŋgu.

“Yakana nhuma yurru waŋarrkuma ga maḏayin' ḻakarama ŋula nhä yolŋuwuŋu goŋbuy ŋamaŋamayunara, yakana yana nhuma yurru djäma wäyinguma ga yolŋukuma ga moḻŋukuma ga guyakuma ŋula nhäkumanydja nhumalaŋguway buku-ŋal'yunarawunydja. Yaka märr-ŋal'yurra ga waŋarr-ḻakaraŋa ŋula nhänhanydja, liŋgu ŋarra dhuwala Garray nhumalaŋgunydja waŋarr God. Ŋarranydja djäl nhumalaŋgu, nhuma yurru ŋarrakuway walŋu yana dhulŋuŋu. Ŋuli nhuma Yurru märr-ŋal'yun wiripuŋuwunydja waŋarrwu ga raŋgawu, ŋarranydja yurru ŋaramurryirrina ŋuriŋinydjayi mel-ḏi'yunna, bala nhuma Yurru ŋayaŋu-yätjthirri ŋuriŋina nhumalaŋgala gatjpaḻ'yunarayuna; nhe ga nhuŋu djamarrkuḻi' ga walalaŋgu djamarrkuḻi' yurru bitjandhi liŋgu ŋayaŋu-yätjthirrina yukurra ŋuriŋiyinydja ŋunhi nhe ŋarranha nyinyaŋdhurruna nhäŋala, bala ḏiltjina-wekaŋala ŋarraku.

“Nhuma yurru märr-ŋal'yurra nhokalaŋuwala ŋäṉḏi'mirriŋuwala ga bäpa'mirriŋuwala, märr nhe yurru walŋa nhina weyinga ŋunhala nhumalaŋgalanydja wäŋaŋura, ŋunhi Garrayyu wekaŋala nhumalaŋgu.

“Guyaŋiya Nhinanharamirrinydja ŋunhi Walu, ga yaka meṉguŋa, liŋgu ŋunhiyinydja walu ganaŋ'maranhara Garraywu.

“Yaka yana nhuma yurru Garraynha yäku-ḻakarama waŋa yänanydja wakalkurrunydja, ga ŋunhi nhe yurru ŋula yolkala dhawu'-nherraṉ Garraywalanydja yäkuyu, bala yurru nhuma rumbalkuma yana ŋunhiyi dhäruktja, yakana yana buku-dhumukthiyanydja meṉguŋanydja. Liŋgu Godthunydja nhuna yurru ḻakarama yätjnha yana nhe, bala dhä-ḏir'yunna yurru, yakana ŋayi yurru waŋa bitjandja ‘Bäythi’ bitjandja, ŋunhi nhe yurru Garraynha yäku ḻakarama yana wakalkurrunydja.

Nhuma yurru djämanydja ḏämbumirriyu ga waŋgany-bäythinyara munhanydja ŋupan, bala ŋuriŋinydja wiripuŋuyunydja waluyu nhinanharamirriyunydja, ganaŋ'maranharana ŋunhiyinydja ḏaykun' buku-ŋal'yunarawuna yana nhokalayŋuwu Garraywu Waŋarrwuna. Nhuma yurru yakana djäma ŋuriŋiyinydja waluyu; nhuma yurru nhinana yukurra yana galkunmirrina, nhe ga nhipala gäthu'mirriŋu walala, ga nhuŋu djämamirri walala, ga wäyin nhuŋu, ga ŋunhi yolŋu mulkuru ŋunhi ŋayi yukurra nhina nhokala wäŋaŋura.

“Ga yaka mel-ŋamathiya ŋula nhä malanha wiripu-guḻku'wa yolŋuwa; nhanbala wäŋa, nhanbala miyalknha, nhanbala djämamirrinha, ga nhanbala wäyin, ŋunhiyinydja ŋuripa bili nhanbala, yaka nhuma yurru ŋoy-ŋapuyurra ḏukṯukthiya.” Ga bitjarrayina ŋayi Garrayyu romdja nherrara nhanukalayŋunydja ŋayi yolŋu'-yulŋuwu.

“Yaka ḻakaraŋa bothiya wiripuŋunha yolŋunha.

“Yaka nhuma marramba'thiya.

“Yaka nhuma baymatthurra rakunyguŋanydja ŋula yolŋunha.

“Ga yaka manaŋiya, ga djaw'yurra dhulŋuŋunydja ŋula nhä yolpa.