Popular Bible Verses from 1 Timoteo 2

Share

Ixin nakuaxinxon Ndo Dio jii, ko nakuaxinxon thi runichjaxin ná ngain ndo, ko mee Jesucristo thi biguan inchin naa xii, thi xrajon beꞌen ngain ntha cruz ixin kjuengijna ná kain ná, ko jiꞌi kuꞌen ngain nchaꞌon ukuinchieꞌe ndo ixin rukuꞌen.

Saꞌo nthatsaꞌan ñao ra ixin danchieꞌe ra Ndo Dio ixin kain chujni, ko nichjeꞌe ra ndo ko danchieꞌe ra ndo ixin sajon ndo kain thi rugundeꞌe na̱, ko jañaa thexruxiꞌin ra ko nchesayeꞌe ra ndo. Ko danchieꞌe ra ndo ixin kain chujni chunda juachaxin thetuꞌan ngain nunthe ko ni thetuꞌan kain rajna ixin ndakua sunthe ná ko tsetoꞌa ná ko kain nchaꞌon tsjee ná Ndo Dio ko jian sakjiꞌo ná chujni.

Ko rinaꞌo ixin nguii thi te ni xii, rutsiin raa na̱ ko runichjee na̱ Ndo Dio ko xruꞌin jianꞌa seꞌe ngain anseen na̱, ko teduñaoꞌa na̱ ko tsetukaoꞌa na̱ chujni. Ko kai rinaꞌo ixin ni nchrii sintengaa nchra lunthue nchra kunixin jian juaxraxaon inchin jikininxin, ko tsjamataon nthauꞌe nchra thi jikininxinꞌa sikon chujni. Ko tsethe xrajaa nchra inchin jikininxin, setheaꞌa nchra oro ko changi anto renthe ko sengaꞌa nchra luntho anto renthe. Icha jian rutsujin nchra kunixin thi jian ncheꞌe nchra inchin jikininxin ncheꞌe nchrii nchesayeꞌe Ndo Dio.