Popular Bible Verses from Galasi anmàn-bɔ̀ 5

Share

Tɛ́n eci léyi Ɛnhɛ́n Prɔnprɔn kɛ tán nɔn, dú ɛcüɛ̀n, pɔpüɛ̀, anwɔwɔ, ɛnbɔrɛ-ẅɛ̀n-hɛ́n, anvrɛn-ci-hán, ɛnbɔrɛ-wɔ-ci-hán, ɔmùan-zri-dì, ɛnbɔrɛ-wɔ̀ mán edomɛ̀n-ẅɛ̀n-hɛ́n. Annanwɔrɛ mɛ̀n lɔ, ɛnyànmàn ke sɩ́ kɛ́n eci-hán-ci ndɔ hɔ̀n lɔ ezì!

Nyàn ankà léyi mɛ́n ẅɛ̀n mɛ lɛ dɔ́ nyɛ̀n nɔn: nyɛ́n teze Ɛnhɛ́n Prɔnprɔn kɛ̀ nyrɔn ny'ɛwúvà lɔ kɩ nyɛ́n sɩ̀ vru die nyɛ́n mumù ny'ɛwúvà ankà-tro lɔ nukùɛ.

Ɛnhɛ́n Prɔnprɔn tán bɔ̀ ɛwúvà; bɔ̀ teze nɛ̀n, nɛ̀n nyrɔn bɔ́ esùnan lɔ.

Anwrɔn hɔ̀n léyi dú Zhezü Krisì tɛn nɔn, yɔ hán yɔ mumù y'ɛwúvà ankà-tro mán y'ɛci-gbangbàn-hán lɔ fɛn wú Zhezü gban-hán-tɛ̀ wú.

Ye nyri anvrɛnvrɛn mɛ̀n, ɔmu le bɔ́ mumù bɔ́ ɛwúvà-ci-hán ke yé n'edomɛ̀n nɔn: eci-gbangbàn-hán mɛ̀n, ɛnbrámɛ̀n-ci-hán mɛ̀n, mán ɛwúvà-gbangbàn-ẅɛ̀n mɛ̀n, antɛ̀-buri-wɔ-sɛ̀n mán seke-kɔhɔ̀n-hán mɛ̀n. Anwrɔnẅì ke gbri y'edomɛ̀n, ke sî y'edomɛ̀n ankà kɩ kɛ kɔ́n ecüì-hi, yɔ dú ɛmɛ̀nhyì mán annankran kɔrɛ-levri wú. Yɔ grɔ y'edomɛ̀n ɔkpɔsɔ ɔkpɔsɔ ezì-kɛ́n-mɛ̀n; ɛci kɛ cüɛn yɔ ɛvɛ̀, yɔ kɔ́n ɛntàn kɩ yɔ zî ɛci ɛvrivri, kɩ yɔ hán eci nyàntɛn ndɔ hɔ̀n kɛ cá. Me bi dɔ́ nyɛ̀n zɛtɛ̀ lɔ, hán ɔmu le mɛ́n gɔ̀ hán nɔn: anwrɔn hɔ̀n léyi kɛ hán ɔmu lɔ nɔn, ke sɩ̀ cɔ́ ɛyri Anhobɩ́ Nɛ̀ncüì-dúyri.

Tɛ́n, nyɛ tɛn, anwrɔn-nɛ́n-muan-ẅì hɔ̀n, ye bi nyɛ̀n ô nyɛ́n ẅɛn ny'edomɛ̀n. Tɛ́n nyɛ́n bɩ bɩ́ ny'edomɛ̀n-ẅɛ̀n ndɔ lɔ nyɛ́n srɔ ɛkɔrɛ̀-levri ci, ô nyɛ́n hán ny'ɛnkruemɛ̀n ci léyi ny'ɛwúvà mumù lɔ ke ji nɔn. Tɛ́n nyɛ́n teze ny'edomɛ̀n nyɛ́n tán ɛcüɛ̀n, ô nyɛ́n dú nyɛ́n dùku ny'eci-bɩ̀tan kɔhɔ̀n mɛ̀n.

Ɔmuhi bɔ́ mumù bɔ́ ɛwúvà ankà-tro lɔ kɛ kɛ́n Ɛnhɛ́n Prɔnprɔn tɛn lɔ ezì: kɩ Ɛnhɛ́n ẅɛn ankà-tro hɔ̀n léyi kɛ kɛ́n bɔ́ dùku bɔ́ ɛwúvà tɛn lɔ ezì: yɔ dú y'edomɛ̀n ezì kɛ́n mɛ̀n, kɛ hán tán kɩ nyɛ́n sɩ̀ hán eci léyi nye ji nɔn rɔ́.

Ɔmuhi ɛnyànmàn totɔtɔ̀n lɔ fɛn bɔ́sɔ ɛnyànmàn zri ndɔ lɔ mɛ̀n: “Ke ji le ɛ̀ cüɛn ɛnyran-wrɔnẅì kɛ̀ hán vɛ́n mumù hɔ́.”

Bɔ́ bɩ́ ẅɛn ɛgbugbu, bɔ́ bɩ́ hán ɔmùan-gbú-ci, bɔ́ nyran hɔ̀n ci ke bɩ́ cüɛn bɔ̀ ɛvɛ̀.

Krisì srú bɔ̀ die ô bɔ̀ srɔ anwrɔn kora hɔ̀n annanwɔrɛ mɛ̀n. Nyɛ́n ẅɛn nɛ̀n ɛshishiemɛ̀n, nyɛ́n bɩ́ vru teze ny'edomɛ̀n nyɛ́n hɔ́n anwɔ̀nẅiemɛ̀n.