Popular Bible Verses from 1 Korintus 13

Share

Te sasue èèna, dꞌara taleo. Sasue èèna, lii mako. Sasue èèna, dꞌara kura boe. Sasue èèna, padedha boe iisi. Sasue èèna, pamone-pabhèni boe. Sasue èèna, lii sakaa boe. Sasue èèna, neo boe pasegi ngiꞌu unu na. Sasue èèna, nasa malai boe. Sasue èèna, tèka boe dꞌara.

Sasue èèna, taha taruu ètu dꞌara madha jꞌara aaꞌi-aaꞌi. Sasue èèna, parcaya taruu. Sasue èèna, sanao-maena taruu. Sasue èèna, maꞌète boe.

Sasue èèna, karejꞌe dènge ngaa dhu lèke, aa dꞌèi boe bia ca bèka.

De limuri ne, abhu tèlu jꞌara dhu èdhi hudꞌi tao, dhu taha taruu. Nuka: èdhi hudꞌi parcaya taruu Lamatua; èdhi sanao-maena taruu, na, pe Lamatua ator aaꞌi-aaꞌi jꞌajꞌi beꞌa; aa èdhi hudꞌi pasue taruu. Nèti tèlu jꞌara se, dhu dedha risi ka, sasue. Lula sasue ka dhu hua risi nèti aaꞌi-aaꞌi.

Sasue dènge boe too-lane. Te, ngaa dhu dhèu rèti lii padhai Lamatua peka le, nèbhu-nèbhu parluu heka. Aa dhu dhèu padhai pake lii rupa-rupa, bèli-camèdꞌa parluu heka kahèi. Aa ladhe ngaa dhu dhèu dꞌèlu-mèu sèra reꞌa, nèbhu-nèbhu guna heka kahèi.

Ladhe sèmi jaꞌa bisa padhai lii pake lii aaꞌi-aaꞌi, nèti dhèu rai-haha do, lii nèti ana pajuu Lamatua nèti sorga, te ngaa dènge boe sasue ciki sa ètu dꞌara jaꞌa, kolo-karisi na ngaa? Lii padhai jaꞌa sèra mola mèu lao, sama sèmi babha dhu lii cère-cère, do nuka sèmi dere dhu lii dhèru-dhèru di.

Ladhe sèmi jaꞌa dènge karunya ho lole peka lii moa Lamatua mi dhèu unu Na, aa dhu keꞌa aaꞌi rahasia, dènge keꞌa aaꞌi jꞌara-jꞌara dhu dhèu dꞌèlu-mèu se reꞌa, aa ladhe lalèka jaꞌa èra mi Lamatua toke jaꞌa bisa pahari eele ledhe nèti era na, te ngaa jaꞌa dènge boe sasue ciki sa, na, gaguna na ngaa? Rui-jꞌajꞌèra jaꞌa guna boe mi ngaa èci sa.

Ladhe jaꞌa pahie eele aaꞌi mèdha-panyau jaꞌa, ho sèna ka kabꞌua ra pangaꞌa dhèu unu aadꞌo, do, soro ngiꞌu jaꞌa sèna ka jꞌajꞌi mi korban, te ngaa ladhe jaꞌa dènge boe sasue ciki sa, gaguna na ngaa? Jaꞌa dènge boe jꞌara dhu tao jaꞌa ngedꞌe. Te sèra sa parcuma! Guna boe ngaa-ngaa.

Conto sèmi: lodꞌo jaꞌa ana iiki era, jaꞌa padhai lii sama sèmi ana iiki. Ngangee jaꞌa sama sèmi mia dhu ana iiki pangee. Te ngaa limuri ne, jaꞌa dhèu eeꞌa le. Nèti èèna ka, tatao jaꞌa sèmi heka ana iiki.