Popular Bible Verses from 1 KORINTUS 13

Share

Hun lu' pika kelunan adang lu' kebit kenin ngan nolong réh, bé' lu' sa'at kenin, ngan ngajung usah lu' ngan bau kenin. Hun lu' pika kelunan bé' lu' mahéng ha' ngan réh, bé' lu' nyelepéé' kenin ngan suti' kenin, bé' lu' mihau kesa'at réh hun réh menyat jian ngan lu'.

La'ah hun lu' pika kelunan omok lu' ngeretep dalem kekat penusah, pu'un lu' ngelan kelunan inah pu'un teneng, ngan pu'un lu' kebit kenin dalem kekat ineu'-ineu' penganeu' lu'.

Hun lu' pika kelunan bé' lu' murung hun réh sa'at barék, bang uleu' murung hun réh pu'un teneng barék.

Bang kekat éh omok petem reken, inah éh, pengelan ngan pengepelum ngan penika Tuhan lem kenin kelunan, bang éh ja'au jin belah néh, iah inah pika.

La'ah penika éh jin Tuhan pu'un pelinguh. Pu'un kelunan éh bara' tong kuraa'-kuraa' tebaraa' uban Tuhan mena' tebaraa' inah ngan réh, bang kekat tebaraa' inah metok awah. Pu'un kelunan pané lem kuraa'-kuraa' arong ha' éh bé' kejam kelunan, uban pengena' Tuhan ngan réh, bang adang kekat ha' inah juk béé kepéh. Pu'un kelunan éh jam seruh mu'un, ngan kekat penyeruh réh inah juk béé kepéh.

Na' péh akeu' omok pané palaa' kuraa'-kuraa' arong ha' kelunan ngan ha' meliket péh uban pengena' Tuhan ngan ké', bang hun akeu' bé' pika kelunan, adang akeu' barei'-okoo' gung éh miha' awah ngan ha' atui awah.

Na' péh akeu' jam nebaraa' kelunan ngan lenaa' mu'un uban pengena' Tuhan ngan ké', kenat péh na' péh akeu' omok jam tong kuraa'-kuraa' pengeloo' kenin Tuhan éh pelim jin kelunan lepah rai, ngan na' péh akeu' pu'un pengelan tong Tuhan éh sukup mu'un ke' ké' omok nyohoo' tokong piso, bang hun akeu' bé' pika kelunan, seleket ké' bé' pu'un maneu' kenat.

Na' péh akeu' mena' kekat livah ké' ngan kelunan kari, ngan kejeraa' kelunan motong usah ké', bang hun akeu' maneu' kenat awah ngan bé' pu'un penika, seleket ké' bé' pu'un maneu' kenat ke' éh.

Hun akeu' anak keto pu'un akeu' pané pekua' kemalai irah anak, ngan kekat kenin ké' ngan penyeruh ké' pu'un éh pekua' kemalai irah anak awah, bang hun iteu' uban akeu' lepah ja'au, kekat penganeu' ké' hun ké' anak keto rai, bé' akeu' maneu' éh kepéh.