Popular Bible Verses from Filipos 2

Share

Ya uray sinuy oyyoonyu, foon pu kumà mipangatuwan na long-agyu winnu mampachayawanyu. Tan na oyyoonyu kuma, waschi osa ipafafanan long-agna ta ifilangnan furunnà nangatngatu nu siya. Siya anaponyun fumaruwan na fufurunyu wi foon pu kà afus na fumaruwanyu.

Turachonyun somsomò Jesu Cristu à mansomsomòyu

wi à siya, uray nu isunà Apudyus, foon pù impapilitna wi mamangchon ta kina-Apudyusna, tan inchulinnan kinangatuna, ad namfalin taku wi isun chitau ad ingwanan long-agnà isù sanilun Apudyus. Ad impafafanan long-agna wi mamtog an Amana uray nu sachin inyatoyna fa nilansaana ta kros.

Awad à Apudyus an chiayu wi mangatod ta karobfonganyu ya somsomòyu wi mangwa ta piona.

Ad sachin nangipangatuwan Apudyus an siyà angatuwan wi maid pu miyisuwan na kinagatuna. Siyan chumatong na padcha wi losani iingkaw ad langit ya luta, uray na nanattoy ya chaan, ya uray na losani maila ya achi pun, maid pu achi mampalintumong ta sangwanan Jesus wi manaychayaw ta kinangatuna. Ad maid pu ko takù achi mangipudnu wi à Jesu Cristun Ap-apun na losan. Ad siyan michayawan Amatauy Apudyus.

Susunud, uray sinuy oyyoonyu, achiayu ngumuytungut ya achiayu ko makais-isì ta maid arwinganyu ya maid kuma ipafasur na taku an chiayu wi anà Apudyus, uray miyas-aslang-ayu ta takud asnay luta wi amod na kinarawingcha. Tan isuayù fituwon wi sumilaw wi mallawag ta takud asnay luta.

Chiayuy susunud wi ay-ayatò, pintogyun losani intudtuchù an chiayu ta iningkawà an chiayu, siyan sinchumallu kuma ta sanay maichà, wi maid umisianyu. Ipapatiyu wi mangwa ta losani pion Apudyus ya lispituwonyù siya ya umoogyat-ayu kuma wi sumurngasing ta piona à masaraknifanyu.