Popular Bible Verses from 2 Timoteo 3

Share

Impinted te Megbevayà is kedsurata te langun he insurat he menge lalag din, ne zekelà is tavang kenita kayi te lalag emun ebpenurù ki, emun edawey ki, wey ke edsambag ki te menge tumutuu wey emun ibpenurù ta is metazeng he ulaula. Pinaag̵i te ked-istudyuwi kayi te lalag ebmetau ki is sulug̵uen te Megbevayà ne egkehimu ta is minsan hengkey he meupiya he ed-ul-ulahan.

Kinahanglan he sevuta nu he timpu te kemereg̵enan haazà is ketepusan he timpu keuzemà te kenè pa edlimasen is menusiyà. Su zutun he timpu leg̵ezen is menge etew wey iyan mahal ziyà te g̵ehinawa zan is selapì. Ebmepelevawen wey ebmepedeligen dan. Edsulaan dan is menge zuma zan; kenè dan ebpemineg̵en is menge lukes dan; ne kenè dan ebpeselamat. Utew lalung sikandan. Kenè dan ebmahalen is menge zuma zan; kenà egkeawà is pauk dan. Bereituk sikandan; kenè dan egkeeg̵en is menge mezaat he kebayà te lawa zan. Utew zan mevurut ne wazà minsan hengkey he meupiya he ulaula he kenè dan egkeepesan. Menge men-aakal sikandan; kenè dan ed-isipen ke hengkey is egkeulaula tenged te kelelalung dan. Menge gelbuwen sikandan. Iyan dan ibpelavi is kelibutanen he kelipey kenà is kebmahala zan te Megbevayà. Uvag sikandan ed-azap te Megbevayà, iyan, kenè dan edtuu he zuen gehem din. Likayi nu is menge etew he iring dutun.