Yela 78
78
Korowii ne o nɛra wa
Asaf yel
1N nɛra, hé no waa
maa dɛ baɡle heya,
hé cheɡ deŋne dɛ́ no
waa maa dɛ bol.
2Mɛɛ kpɔ sɛɡlaa
bol waa chaɡle heya,#Mat 13:34-35
waa nomɛlbwa
aa wola jemɛ bwa,
le harɛ nɔ mumpar,
3waa yaa noa dɛ jema,
anɔ la ya naawa
aa bola baɡle yaa.
4Yaa kpɔ sɔh ya bii,
yaa boloo baɡle
ya naanar baa ka ba,
dɛ́ kpɛɛ Korowii kpeɡri
ne o wejena, dɛ o nyokpo
we-ɛɛla waa ɛa.#1Sa 12:7
5O kpɔ o Mmarare tɛ
Israel tena
baa ɛ Jekɔb naanar,
a do le tɛɛ ba.
O baɡle ya naawa ŋɔ,
bá kpɔ baɡle ba ɡe bii,
6ásɛ ya naanar baa ka ba la
hweli le ba be,
ba baa kpeɡ aa,
bá ɡe bol baɡle ba bii.
7Anee dɛ́ ɡel ba kpɔ
ba hwɛɡa dawɛ Korowii nɛ,
dɛ bɛ waa waa ɛa la soh,
dɛ́ na dɛɛ teŋɛ
o Mmarare la ta.
8Baa doe ba kɛŋɔ ba naawa,
ba ɛ bambikpeɡ tena
ne nɛra baa wola waa bu.
Baa ba te kpɔe dɛɛ dawɛ
Korowii nɛɛ kɛrɛdɛ,
ba waa ta kasinteŋ dɔe tɛo.
9Efrem laa tena kpɔ ba tori,
kɛ aa tel laa ta la,
ba berɔ chwa kaa dem.
10Ba ta Korowii fɔo
o ne baa fɔwa la ta teŋɛ,
dɛ vɛh o Mmarare la.
11Ba soh waa waa ɛa,
nyokpowaa waa ɛa baɡ ba
la.
12O ɛ nyokpowaa
ba naawa siwi ta,
Soan harɛ waa chɔa kaa
dɛ do Ijipt harɛ ta.
13O ɡelɔ mpo pere anɛ,
dɛ tɔ ba sie,
asɛ ba valɛ o bini le
kɛŋɔ harɛpɛɛ ken.
O ɡelɔ nee la teŋe che
kɛŋɔ danjwɛɛ diɡ ne ɡal.
14O cheɡɛ bam waa do
jaŋne kaa nyundua ta,
dɛ tɔ ba sie webaŋa,
asɛ jwaana bwa ɡe,
o kpɔ nii
waa tɛra kaa nyundua tɔ
ba sie wɛɛ chaah ba
ba won vala.
15O pere bwea
aa lɔ pua hɛŋle ɡbo harɛ ta
nee kohona le a bini,
kɛŋɔ mpo nee ken tɛɛ ba.#Kaa 17:6; Kur 20:11
16O ɡelɔ nee le bwe ta,
dɛɛ palɛ kɛŋɔ nenapale
ken.
17Kɛ ba teŋɔ ɛ Korowii
wechɔɡa, dɛɛ ɛ
Nemenɛ Korowii deŋnekpeɡ,
pua hɛŋle ɡbo harɛ la ta.
18Ba saahnɔ daah Korowii na,
dɛɛ nyin kondikwaa
ba pɛla aa lawa.
19Ba bol waa yaɡɛ Korowii ŋɔ,
“Korowii ɛɛ won
tɛ yaa kondikwaa
pua hɛŋle ɡbo harɛ ta bonɔ
naa?
20A ɛ kasinteŋ kɛŋɔ
o kpɔ kon lɔ bwe,
asɛ nee fuɡe le kohona.
Aah wɛɛ won tɛ yaa
kondikwaa
dɛ tɛ yan yaa ɛ
o nɛra nɔ ola ja aa?”
21Korowii aa no ba waa la,
o baah diu, bandia kohona
la ɡelɔ nii ba le o nɛra
Israel tena nɛ,
asɛ a ɡwaa ba nɛɛ kohona,
22dɛkalkɛŋɔ ba ta o waa
yaradae,
ba ta lɛɛ do kɛŋɔ
wɛɛ won lɛɛ ba.
23Kɛ ane a bwa, Korowii nyoa
wobol ɡelɔ nyundua pili.
24O tɛɛ ba kondikwa ane
soo siwi aa le nyundua
baa dɛ yera maana ba di.
25Anomanta, ba di kondikwa
nyundua toroma aa dɛ di,
o tɛɛ ba ba di dɛ vaɡre.
26O ɡelɔ wee leebɔr peu ta,
dɛ che o kpeɡri ta
ɡel weekaŋle harɛbɔr kon
ɡe ta,
27asɛ dɛ ɡel jumbii
ba lee o nɛra la bini.
A warɔ kɛŋɔ
mpo nyoa hɛŋle ken.
28O ɡelɔ a ba lee bela
baa baŋre ba tɛnte
deene la dembaah,
dɛ bar ba tɛnte deene la
bwa.
29Ba diu dɛ vaɡre,
dɛkalkɛ kondikwaa
ba pɛla aa lawa laanee
Korowii kpɔ tɛɛ ba.
30Ba taa dɛ di ba pɛla
kondikwa a ta su ba nyoo
la,
31Korowii baah di ba nɛ,
o kpoo ba bini nɛŋkpeɡa,
bonɔɔna ba bwara
aa kpeɡa kohona
Israel harɛ ta la.
32Kɛ ane a bwa,
dɛ ba ta teŋɔ dɛɛ ɛ
wechɔɡa, o nyokpo
we-ɛɛla la bwa habɔɔ,
ba ta on yaradae.
33Anomanta, o ɡelɔ
ba teŋe sewɛ kɛŋɔ peu
aa taa ba kaa ken,
dɛ piɡri kpɔ wekpeɡa
ba ta ba nɛ.
34O baa kpoo ba bini bane aa,
banɔ la baa kaa la
yon berɛ ba o be,
dɛ́ charɛ ba liire,
dɛɛ soŋo sibeɡra ne.
35Ba liiro kɛŋɔ Nemenɛ
Korowiirii
fa do kɛŋɔ Bwetal dɛɛ tɔ ba
ɡbemɡbe, dɛ ɛ ba Lɛɛ.
36Kɛ dɛ neɡra ɡboo baa neɡro,
ba wobɛlbwa ta kasinteŋ
ɛɛ.
37Baa o waa ta teŋɛ,
baa fɔo o ne baa
fɔwa la ta teŋɛ.
38Kɛ Korowii sune o nɛra nɛ,
o kpɔ ba wechɔɡa kɛ ba,
o ta ban chɔɡɛ.
Keraŋwɛnɛ bwaa o lawɛ
bambile,
dɛ ɡel o bandia nyoa sɔɔh.
39O liiro kɛŋɔ ba ɛ nɛwɛnyina
baa dɛ ba wona sewɛ,
dɛ do kɛŋɔ peu aa taa
baa kaa ken.
40Keraŋwɛnɛ bwaa ba ɛ
deŋnekpeɡ o nɛ,
pua hɛŋle ɡbo harɛ ta,
dɛ teŋɛ ɡel o bambile chɔɡ.
41Saŋ bɛlbwaa ba na dɛ daah
Korowii dɛɛ na,
dɛɛ ir Israel Nɛŋɡoroŋ
la bwaawee.
42Ba soh o kpeɡri kohona
ne tɔpere waa lɛɛ ba le
ba dɔma nɔn ta,
43dɛ ɛ wejena ne
nyokpowe-ɛɛla,
Soan harɛ waa chɔa kaa,
dɛ do Ijipt harɛ ta la wa.#Kaa 7:14—11:10
44O ɡelɔ Ijipt harɛ neerare
bwa berɛ chal,
ba nyin nee dɛ́ nyɔ
kahonɛ.#Kaa 7:20
45O ɡelɔ chwɛɛhne fuɡe le
ba nɛ, dɛ baa ha ba,
asɛ sapone ɡe ba chɔɡ ba
harɛ.
46O ɡelɔ tontombɛ
ba chɔɡ ba kondikwa,
dɛ chɔɡ ba kooni.
47O ɡelɔ dombwea
ba chɔɡ ba ɡrepo,
ne pur daa kooni bwa.
48O kpoo ba nae dombwea ne,
dɛ ɡel bwaala kɔr kpoo ba peera.
49O kpɔ o bandia kohona
ba ta ba nɛ,
dɛ ɡel ba waa do sum
kohona, a do kɛŋɔ
baa tomɛ toroma ŋɔ,
bá ba kpoo ba ken.
50O ta ɡelɛ o bandia nyoa sɔɔh,
kɛɛ dɛ́ kpɔ ba bwara kɛ ba,
o kpoo ba weechɔɡa ne.
51O kpoo Ijipt harɛ
bibanloɡla, dem bɛlbwa ta.
52Asɛ dɛ tɔ o nɛra sie
kɛŋɔ peteɡre ken,
dɛ kpɔ ba valɛ
pua hɛŋle ɡbo harɛ ta.
53O tɔ ba sie dɛ nyiŋi
ba nɛɛ kɛrɛdɛ ba ta ɔmɛ,
kɛ ba dɔma la te,
mpo bɔle ba nɛ, dɛ kpɔ ba
kaa.
54O kpɔ ba ba
o harɛ waa do ɡoroŋ ta,
deŋɡarere harɛ nɛra
aa soɡe a ta,
o yo dɛ lɛa la.
55O tɔ sie doŋi nɛra
baa soɡe harɛ la ta,
dɛ bɔne harɛ la denaa ta
tɛ Israel tena,
dɛ kpɔ ba ka so ba deene
la ta.
56Kɛ ba ɛ Nemenɛ Korowii
deŋnekpeɡ, dɛ daahno na,
ba vɛh o Mmarare ta teŋa.
57Ba deŋne kpeɡri, baa
waa bu kɛ ba naawa ken,
ba waa ta kasinteŋ dɔe.
58Ba kpɔ bela baa dɛ tomɛ
ba voɡa dɛɛ muɡli o baah,
dɛ kpɔ ba voɡa dɛɛ ir
o bwaawee.#1Ko 11:7
59Korowii aa no ba waa la,
o baah diu kɛrɛdɛ,
anomanta, o vɛh
Israel tena kwaraa.
60O ɡel o Tɛnte Dea waa lɔ
Silo,
waa ɡela ba baŋro
o ɛ o dobɔr harɛ nɔ ta la.#Jos 18:1
61O ɡelɔ ya dɔma ba kpɔ
Korowii Ne Nɛwɛnyina Fɔo
Daka la.
Onee cheɡa tɛ
o kpeɡri ne o jirima.
62O baah di o ɡbaɡba nɛra nɛ,
dɛ ɡel ba dɔma kpoo ba.
63O ɡelɔ ba kpoo
ba bonɔɔna laa ta,
ba toli ta baala dɔe dɛ yalɛ.
64Ba kpoo ba sɔfore laa ta,
ba ta ɡelɛ ba luhaahna wi.
65Belaa Korowii ir, a do
kɛ nɛn waa ir dom ta ken,
kɛŋɔ nɛn o bwara aa
kpeɡa,
dɛ nyɔ sen a dɛɛro,
o bwara yon ir la.
66O ɡelɔ o dɔma peɡre,
ba di sihiih saŋ bɛlbwa
dɛɛ la.
67O vɛh Josef naanar,
o ta Efrem dea nɛra leɛ.
68Kɛ Juda dea nɛraa o le,
ne Saayɔn Bwejen waa dɛ
nyin bela kohona la.
69Belaa o ma o Dea,
o do jaŋne kɛ bwejena ken.
O mao o che kɛ harɛ
waa tao nɔ, dɛ che kiŋkiŋ
saŋ bɛlbwa dɛɛ la.
70O le o bonɔɔ Devid
ɡɛ saŋ waa dɛ nyiŋi
peera nɛɛ kpɔɡ bini,#2Sa 7:8
71dɛ ba o ne ŋɔ,
ó ba tɔ o nɛra Israel tena
baa ɛ o kapɛrɛ nɛra la sie,
kɛŋɔ peteɡre.
72Devid nyiŋi ba nɛɛ
bambile bwa ne,
dɛ tɔ ba sie wejema ne.
Избрани в момента:
Yela 78: mzw
Маркирай стих
Копиране
Сравни
Споделяне
Искате ли вашите акценти да бъдат запазени на всички ваши устройства? Регистрирайте се или влезте
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.