Шэсьць крокаў да лепшага лідэрстваУзор

Пачні з дысцыпліны

Мая жонка Эймі, мае дзеці й мае супрацоўнікі пацьвердзяць, што падрыхтоўка лідэраў - гэта ня проста нешта такое, што мне надта падабаецца рабіць, гэта таксама вялікая частка мае таясамасьці. Я веру ў тое, што калі паляпшаецца лідэр, то паляпшаюцца ўсе.

Вось табе пытаньне на разважаньне: “Быць лідэрам - гэта проста нешта такое, што мне хочацца рабіць, ці гэта частка таго, кім я ёсьць?”

Твой адказ на гэнае пытаньне мае значэньне, бо бальшыня лідэраў запаўняюць свае пляны разьвіцьця мэтамі накшталт “зрабіць”: “Хачу рабіць больш дзеля маіх дзяцей; буду часьцей рабіць жонцы нешта прыемнае; буду больш падбадзёрваць людзей, якімі кірую.” Але найбольш уплывовыя асобы ставяць сабе мэты накшталт “быць”: “Я буду цярпліваю маці, якая моцна любіць; я буду мужам, які падтрымлівае сваю жонку і любіць яе яксьлед; я буду начальнікам, які зьяўляецца прыкладам усім.”

Найбольш уплывовыя лідэры пачынаюць з “быць”, і іхняе “зрабіць” цячэ адтуль.

Нават паводле сьвецкіх стандартаў, Ісус, пэўна, зьяўляецца найбольш уплывовым лідэрам усіх часоў. Ён дзеяў у публічнай прасторы ўсяго толькі тры гады, але за той час Ён прыдбаў дзясяткі тысячаў пасьлядоўнікаў. Празь дзьве тысячы гадоў, кнігай-бэстсэлерам усіх часоў зьяўляецца тая, якая распавядае пра гісторыю Ягонага жыцьця, і мільярды людзей з усіх канцоў сьвету прысьвяцілі ўсё сваё жыцьцё на тое, каб ісьці за Ім.

Сем разоў у эвангельлі ад Яна Ісус абвясьціў моцныя сьцьверджаньні “быць”. Чытаючы іх сёньня, ты заўважыш, што кожнае сьцьверджаньне выдатна пасуе да таго, што Ён зрабіў і дагэтуль робіць у гэтым сьвеце.

Калі ты ведаеш, кім ты ёсьць, дык будзеш ведаць, што рабіць. Канкрэтна спытай сам у сябе: “Што б зрабіў чалавек, якім я хачу быць?” Незалежна ад таго, што ты вырашыш рабіць, раю пачаць з малога. Невялікія, але рэгулярныя дзеі з часам дадуць вялікія вынікі.

Калі ты хочаш быць руплівым лідэрам, дык, магчыма, ты вырашыш пісаць прынамсі адно натхняльнае паведамленьне ў дзень. Калі хочаш быць арганізаванаю асобаю, дык, магчыма, варта пачаць слаць ложак штораніцы. Калі ты хочаш быць лідэрам, які мае блізкія адносіны з Богам, дык, можа, пачні размаўляць зь Ім штодня. Рабі тое, што дапаможа табе быць лідэрам, якім ты хочаш стаць.

Пагутары з Богам: Госпадзе, Ты стварыў мяне; Ты мяне ведаеш. Калі ласка, дай мне словы зразумець, хто я ёсьць, і сілу ведаць, што рабіць.

Больш інфармацыі пра лідэрства ў маім падкасьце.