Buka ya Pili ya Makabaeusi 9
9
Ndwa ya kwa Berezeti ni lifu la Judeasi Makabaeusi
1Demetriusi h'a utwa kuli Nikanora ni mpi ba bulailwe mwa ndwa, a luma hape bo Bakidesi ni Alusimusi lwa bubeli mwa naha ya Judea, mi ba ya ni kalulo ya mpi ya hae. 2Ba ya ka nzila ya Galilea, ba kwalela munzi wa Mesaloti mwa Aribela mi ba u hapa, mane ba bulaya batu ba bañata. 3Mwa kweli ya pili ya silimo sa mwanda ka mashumi a ketalizoho ni ze peli, ba y'o toma mafulo fapil'a Jerusalema. 4Cwale kiha ba zwelapili ku liba kwa Berezeti, ba na ni masole ba mahutu ba likiti ze mashumi a mabeli ni ba lipizi ba likiti ze peli. 5Judeasi yena a toma mafulo kwa Elasa, a na ni masole ba lindume ba likiti ze talu. 6Ha ba bona butuna bwa mpi ya lila ba kenwa ki sabo ye tuna, mi ba bañata ba toba mwa mafulo, mane kwa y'o siyala feela ba ba eza mianda ye supile ni u li muñwi. 7Judeasi h'a bona kuli mpi ya hae i hasani mi ndwa n'e li fakaufi hahulu, a swaba hahulu kakuli n'a si na nako ya ku ba kopanya, mi a zwafa. 8Kono niha n'a zwafile cwalo, a li ku ba ba ne ba siyezi, “A mu yeme! Lu lwanise lila. Lu ta kona ku itiisa ni ku li lwanisa.”
9Batu ba hae ba lika ku mu eleza, ba li, “Ka nako ye ha lu na maata haisi feela ku saba lu sa pila. Cwale mwamulaho lu ta kona ku t'o ba lwanisa ha se lu kopani ni banabahabo luna. Luna feela lu ba banyinyani hahulu.”
10Judeasi a hana, mi a li ku bona, “Ka maata a Mulimu ha ni swaneli ku ba saba! Haiba nako ya luna i fitile, a lu shweñi sinna, lu shweleñi banabahabo luna, mi ku si ke kwa ba ni se si sinya tumo ya luna.”
11Makuta a lila a zwa mwa mafulo, mi Majuda ba yema mwa libaka za bona ba itukiselize ku kopana ni lila. Ba lipizi ba laelwa ku ba makolo a mabeli, ba masho ni tufwililo ba etelela mpi hamoho ni batabani, mi kaufel'a bona ne ba ziba hande ku lwana. 12Bakidesi n'a li kwa neku la kwa silyo. Bahali ba fita mwahal'a makolo a mabeli a lipizi. Lila za liza litolombita za zona. Ba kwa neku la Judeasi ni bona ba liza litolombita za bona. 13Lifasi la nyanganyiswa ki mulumo wa ndwa. Ndwa ya kala kakusasana ku fitela manzibwana.
14Judeasi h'a bona kuli Bakidesi ni maata a matuna a mpi ya hae n'a li kwa neku la silyo, batabani ba ba tiile lipilu kamukana ba kopanela ku yena. 15Ba hasanya likolo la neku la silyo, mi ba ba matisa mane ku y'o fita mwatas'a malundu. 16Kono Maasiria ba kwa neku la nzohoto ha ba bona kuli ba kwa silyo ba hasani, ba kwenuha mi ba latelela Judeasi ni batu ba hae ku y'o ba lwanisa ka ku ba taha kwamulaho. 17Ndwa ya ba tata hahulu, mi kwa holofala ni ku shwa ba bañata kwa limpi ze peli zeo. 18Judeasi ni yena a shwa mi ba ba ne ba siyezi ba baleha.
Kepelo ya Judeasi Makabaeusi
19Jonatani ni Simoni ba nga mwanahabo bona Judeasi mi ba y'o mu pumbeka mwa libita la kukw'a hae mwa Modeini. 20Maisilaele kaufela ba silisa ni ku mu lila hahulu, mi sililo sa hae sa nga mazazi a mañata, ka manzwi a: 21“U shwile cwañi munna ya maata, munna luli ya tusize Isilaele ka pilu ya hae kaufela!”
22Likezo ze ñwi za Judeasi, lindwa z'a n'a lwanile, likezo za hae ze nde, ni mw'a n'a tumezi kamukana, ha li si ka ñolwa, kono n'e li ze ñata hahulu.
Jonatani u etelela baitwaneli
23Judeasi ha s'a shwile, bahedeni ba zwa mwa libaka za maipato za mwa Isilaele kamukana, mi baezalibi kaufela ba bonahala hape sinca. 24Ka yona nako yeo kwa ba ni tala ye tuna hahulu, mi batu ni naha kamukana ba koza ku Bakidesi. 25Cwale yena Bakidesi a keta lila ze tumile ku ba bona babusisi ba naha. 26Bao bona ba batisisa hahulu banabahabo Judeasi, ba ba tisa fapil'a Bakidesi, mi yena a ba kutiseza bumaswe ni ku ba shendaula maswe. 27Manyando a sabisa a kala ku kena mwa Isilaele. Kwa li ku ba ku sa ezahali nto ye cwalo haisali ku felela bupolofita mwahal'a bona.
28Cwale balikani ba Judeasi kaufela ba kopana mi ba li ku Jonatani: 29“Haisali a shwela mwanhenu Judeasi ha ku si ka ba ni ya swana ni yena ya n'a ka etelela kuli batu ba itwanele kwa lila, ili yena Bakidesi ni ba ba toile sicaba sa luna. 30Cwale ka ku latelelela hande swanelo, kacenu lu ku ketile mwa sibaka sa hae ku ba mubusi ni mueteleli, ni kuli u n'o yanga ni luna mwa lindwa.” 31Ku zwa ka lona lizazi leo Jonatani a lumela ku ba mueteli mi a busa mwa sibaka sa mwanahabo yena Judeasi.
Jonatani mwa Lihalaupa la Tekoa
32Bakidesi h'a utwa cwalo a lela ku bulaya Jonatani. 33Kono mulelo wa zibwa ki Jonatani, hamoho ni mwanahabo yena Simoni, ni batusi ba hae kamukana, mi ba sabela mwa lihalaupa la Tekoa, mi ba y'o tibelela kwatukw'a kasa ka Asifara. 34Bakidesi a ziba taba yeo ka la Pumulo, mi ni yena a sila Jordani ni mpi ya hae kaufela.
35Jonatani a luma mwanahabo, ye ne li yena muzamaisi wa liutiso, ku y'o kupa balikani ba bona Manabata kuli ba ba ngele libyana za bona. 36Kono bana ba Jambiri, ba ba ne ba zwa kwa Medeba, ba ba tabanisa ka sipundumukela, ba hapa Joani ni lika kaufela z'a n'a na ni zona, mi ba ikela. 37Ha ku se ku ezahalile cwalo, mwamulaho kwa bihelwa Jonatani ni mwanahabo yena Simoni kuli bana ba Jambiri ba na ni mukiti wa linyalo, ni kuli ne ba sindeketa munyaliwa ili mwan'a mulena ya kutekeha hahulu wa Mukanana. Ba mu zwisa mwa Nadaba, ba latelelwa ki batu ba bañata. 38Jonatani ni bahabo ha ba se ba hupula mali a mwanahabo bona Joani, ba y'o ba lalela kwapili mwa malundu. 39Ha ba nze ba libelezi cwalo, ba bona ku taha batu ba bañata ba talize lilata mi ba lwezi tutu ye ñata hahulu. Munyali, batu ba hae, hamoho ni banabahabo ba t'o katanyeza ba sinawenga ka tulupa ni balizi hamoho ni lilwaniso cwalo. 40Majuda ba ba kena ka sipundumukela ku zwa mo ne ba ipatile mi ba ba bulaya maswe, mi ba ba ne ba siyezi ba baleha mi ba y'o ipata mwa malundu. Ba siya milwalo ya tutu ya bona kamukana mi ya hapiwa. 41Kamukwaocwalo sinawenga sa fetulwa sililo mi lipina za balizi ba bona ni zona za fetuha mulumo wa sililo. 42Cwale Majuda ha ba se ba kutiselize lila bumaswe bakeñisa mali a mwanahabo bona ba kutela kwa mataba a Jordani.
Ku silwa Jordani
43Kapili-pili Bakidesi ha s'a utwile cwalo, a taha kwa munanga wa Jordani ka la Pumulo a na ni mpi ye maata. 44Jonatani a li kwa batu ba hae, “Yemañi! A lu itwaneleñi, kakuli kacenu ha ku swani ni maabani kamba maloba. 45Mu bone kuli lu ta lwana lu talimani ni lila kafa ni kafa, kakuli lu fulalezi mezi a Jordani mi kwa neku le liñwi ki liwatata feela ni likota, mi ha lu na ko lu ka sabela. 46Ye ki yona nako ya ku kupa tuso ku Mulimu kuli a mi pilise kwa maata a lila za luna.”
47Ndwa ya kalwa ki Jonatani ya n'a libile ku yena Bakidesi, kono Bakidesi a kutela mwamulaho ni batu ba hae. 48Cwale Jonatani ni ba hae, ba tulela mwa Jordani mi ba tapa mane ba y'o ombokela mwabuse. Kono lila za tokwa ku ba latelela. 49Ka lona lizazi leo Bakidesi a shwelwa ki batu ba ba bata ku ba ba sikiti.
Bakidesi u yaha makwakwa. Lifu la Alusimusi
50Bakidesi a kutela kwa Jerusalema mi a yaha makwkwa mwa Judea, ili mwa Jeriko, Emausi, Beti-Horoni, Betele, Timina, Paratani, ni mwa Tefoni. Makwakwa ao n'e li a mamota a matelele ni minyako ye n'e na ni mikwalelo. 51A beya masole mwa munzi o muñwi ni o muñwi ku sabisa Isilaele. 52Hape a beya munzi wa Beti-Zuri mwa lukwakwa, hamoho ni Gezari ni Sisabelo sa mwa Jerusalema, mi a beya mwateñi makuta a masole ni lico, hamoho ni lilwaniso cwalo. 53A nga bana ba baeteleli ba naha ku ba swalelele mi a ba beya mwa Lukwakwa lwa mwa Jerusalema ba nze ba libelelwa ki masole.
54Mwa silimo sa mwanda ka mashumi a ketalizoho ni ze talu, mwa kweli ya bubeli, Alusimusi a laela kuli ku lutululwe limota la lapa la mwahal'a sibaka se si kenile, ili ku sinya musebezi wa bapolofita. Alusimusi a kala ku li lutulula. 55H'a sweli ku eza cwalo a tahelwa ki butuku bwa ku oma luñañali, mi musebezi wa hae wa pala. Mulomo wa hae wa ngangatela, mi ku kokonyana kwa hae ko kwa mu palelwisa ku bulela kamba ku supeza batu ba mwa ndu ya hae lika z'a bata. 56Ha ku si ka nga nako ye telele mi a shwa a nz'a nyanda cwalo. 57Bakidesi ha s'a bona kuli Alusimusi u shwile, a kutela ku mulena, mi naha ya Judea ya ba mwa kozo ka lilimo ze peli.
Betibasi u bewa mwahali
58Bahedeni kamukana ba lumelelana ka mulelo, ba li, “Cwale hona fa Jonatani ni batusi ba hae ha ba sa itibezi ni ku pila mwa kozo ka sepo ye tiile, ki yona nako ya luna ya ku y'o tisa Bakidesi. Yena wa kona ku t'o ba swala kaufela bona ka busihu bu li buñwi. 59Cwale ba ya ku yena mi ba y'o lumelelana. 60Kapili Bakidesi a funduka a na ni mpi ye tuna, mi a lumela manzwi a kunutu ka butali kwa batusi ba hae kamukana ba mwa Judea kuli ba swale Jonatani ni batusi ba hae. Kono ba palelwa ku eza cwalo kakuli mulelo wa bona n'o zibahalile. 61Yena Jonatani ni batu ba hae ba swala ba mashumi a ketalizoho kwa batu ba mwa naha be n'e li bona baeteleli ba mulelo wo, mi ba ba bulaya.
62Jonatani ni Simoni kiha ba zwa hamoho ni batu ba bona, ba ya kwa Betibasi mwa lihalaupa. Kwateñi ba y'o yaha sinca libaka ze n'e li se li sinyehile mwa sibaka seo, ba si sileleza ka lukwakwa. 63Cwale Bakidesi h'a utwa cwalo, a kopanya mpi ya hae kaufela mi a zibisa batu ba hae ba mwa Judea. 64Kiha s'a y'o beya munzi wa Betibasi mwahali, a u lwanisa ka mazazi a mañata ni ku toma lilwaniso ze tata. 65Kono Jonatani ni batu ba ba likani feela, ba zwa mwa munzi mo, mi ba siya mwateñi Simoni ni ba bañwi. Jonatani ni ba hae ba ya mwa naheñi feela. 66A tula Odomera ni banabahabo, ni bana ba Fasironi ba nze ba li mwa litende za bona. Bao bona ba kala ku lwana mi ba mu lwanela. 67Ka yona nako yeo Simoni ni batu ba hae ba ba ne ba siyezi ba punya mi ba zwa mwa munzi, mane ba cisa limishini za ndwa. 68Ba lwanisa hahulu Bakidesi mane ba mu tula. A swaba hahulu kabakala ku fumana kuli mulelo wa hae wa ku lwana ni ku bulaya n'o si ka tusa se siñwi. 69A libisa bunyemi bwa hae kwa babeteki bao ba ba ne ba mu susuelize ku kena mwa naha.
A bulaya ba bañata ku bona mi cwale a hupula ku kutela kwa naha ya habo. 70Jonatani ha s'a zibile zeo, a luma lindumeleti ku y'o ambolisana ni yena ka za kozo, ni kuli a lukulule batu ba n'a sweli. 71Bakedesi a lumela cwalo, mi a konka kuli h'a na ku kutela ku lika ku lwanisa Jonatani mwa mazazi a bupilo bwa hae. 72Mwamulaho ha s'a kutisize ku Jonatani batu kamukana, b'a n'a sa z'o hapa mwa naha ya Judea, a kwenuha mi a kutela kwa naha ya habo, mi ku zwa fo h'a si ka kutela ku sutelela fakaufi ni mululwani wa bona ni kamuta. 73Ku tuha fo ha ku na mukwale o kile wa supa Isilaele, mi Jonatani a yaha mwa Mikamashi mw'a n'a il'o kala ku atula batu, ni ku zwisa Isilaele mwa buhedeni.
Цяпер абрана:
Buka ya Pili ya Makabaeusi 9: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.