Buka ya Pili ya Makabaeusi 8
8
Ku tuma kwa Baroma
1Cwale Judeasi a utwa za ku tuma kwa Baroma, maata a mpi ya bona, ni bunde bwa bona kwa batu kamukana ba ba bata ku utwana ni bona, ni kuli ne ba bata ku eza bulikani ni mañi ni mañi ya taha ku bona ka muhupulo wo. 2Mi kaniti ne ba na ni maata hahulu. Hape n'a bulelezwi ka za lindwa za bona ni mo ne ba ezelize Magaulusi ba ba ne ba tuzi, mi ba ba tomela ku tela mutelo. 3N'a utwile ka za ne ba ezize kaufela mwa naha ya Sipeini, ha ba nga mikoti ya silivela ni ya gauda. 4N'a bulelezwi mo ne ba ikeza malena ba naha kamukana, nihaike inge ne i li kwahule ni naha ya bona, ka mulelo ni mutundamenyi wa bona. N'a bulelezwi ka za malena ba ba ne ba zwanga kwa mafelelzo a lifasi ku t'o ba lwanisa, kono ba nze ba tulwa maswe ki Baroma ni ku sinyehelwa hahulu. N'a utwile ka za ba bañwi ba ba ne ba tela mutelo ku bona ka silimo. 5Filipi, Perseusi mulena wa Makitimi, ni ba bañwi ba ba ne ba na ni bundume bwa ku lwanisa Baroma, ne ba tuzwi maswe mane ba felelwa ki maata. 6Judeasi hape n'a bulelezwi kuli Antiokusi yo Mutuna, mulena wa Asia, ya kile a ba yela kuli a y'o ba lwanisa a na ni litou ze mwanda ka mashumi a mabeli, ni masole ba lipizi ni ba likoloi, hamoho ni mpi ye tuna ya masole ba mahutu, kaufela ne ba tuzwi ki Baroma. 7Yena Antiokusi ne ba mu ngile a sa pila mi ba mu tomela mutelo o mutuna hamohocwalo ni ba ba ne ba mu yolanga, ni kuli u swanezi ku zwisa batu ba swalelele. N'a utwile ni za tumelelano. 8Naha ya India, hamoho ni Media, ni Lidia, ni linaha ze ñwi za zona ze nde hahulu ze ne ba ngile ku Antiokusi, ba li file Mulena Eumenesi.
9Hape Judeasi n'a bulelezwi kuli Magerike ba kile ba lela ku lwanisa Baroma. 10Bona ba lemuha kapili, ba ba lumela mpi ya muzamaisi a li muñwi feela, a y'o ba tula ni ku bulaya ba bañata, mane a hapa basali ni bana. Ba nga tutu ni naha ya bona, ni ku lutulula makwakwa a bona, mi ba ba eza batanga ku fitela ni kacenu le. 11Judeasi a utwa hape kuli ba macaba kamukana, ni lioli ze ne li itwanela ku bona, ne ba timelizwe ni ku hapwa.
12Kono ko ne ku pila balikani ba bona ni ba ba ne ba itingile ku bona, ne ba ba tusa hande ka swanelo. Ba tula malena kamukana ba kwahule ni ba fakaufi, mi ba ba ne ba utwa za maata a bona ba saba hahulu. 13Ha ba lata ku tusa mutu kuli a be mulena, kaniti haisi a be mulena, kono ye ba sa lati, ha ba lelile ku mu tulula, u ta bona feela kuli u tulukile. Maata a bona n'e li a matuna hahulu. 14Nihakulicwalo, ha ku na ku bona ya kile a bewa kuwani kamba siapalo sa bulena kuli a bonahaze buhulu bwa hae. 15Ne ba tomile feela kuta ya manduna ba mianda ye milalu ka mashumi a mabeli, ba ba ne ba kopana ka zazi ni zazi ku ambolisana ka za puso ya sicaba. 16Muso wa bona n'o keta mueteleli ka silimo, mi u na ni ku busa feela mwaha u li muñwi. Mutu yo u na ni maata a ku busa naha kamukana, mi n'a kutekwa ki batu kaufela ku si na muna.
Swalisano ya Majuda ni Baroma
17 #
2 Mak 4.11
Judeasi ha s'a ketile Eupolemusi mwan'a Joani, wa mba ya Akosi, ni Jasoni mwan'a Eliazare, a ba luma kwa Roma ku y'o eza tumelelano ya silikani ni tusano ni Baroma. 18N'a eza cwalo kuli mwendi ne ba ka ba zwisa joko fa maheta, ha ba ka utwisisa kuli mubuso wa Magerike n'o hapeleza Isilaele ku kena mwa butanga. 19Linumwana bao ba zamaya musipili o mutelele ku ya kwa Roma, mi ba y'o ipiha ili bona fapil'a manduna ka manzwi a, ba li, 20“Judeasi Makabaeusi ni banabahabo, hamoho ni Majuda, ba lu lumile ku mina kuli lu t'o eza ni mina litumelelano za kozo ni swalisano, ni kuli lu ñolwe kuli lu batusi ni balikani ba mina.”
21Litaba zeo za tabisa mi za lumelelwa ki bazamaisi ba Kuta ya Roma. 22#1 Mak 14.18 Ba ba alaba ka liñolo le ne ba ñozi fa litapa la kopa mi ba li lumela kwa Jerusalema kuli Majuda ba y'o li buluka kwateñi, i be bupaki bwa tumelelano ya kozo ni swalisano.
23“Mbuyoti i be kwa Baroma ni Majuda kuya kuile mwa bupilo bwa bona mwa liwate ni fafasi. Mukwale kamba sila li be kwahule ni bona! 24Lu nge kuli ndwa i ta kala ku tahela Roma pili, kapa ye ñwi ya linaha ze tusana ni yona mwa mubuso wa yona kamukana. 25Fohe, sicaba sa Majuda si na ni ku tusa ka mo ku ka tokwahalela. Si swanezi ku eza cwalo ka pilu ya sona kaufela. 26Ba si ke ba tusa lila kamba ku ba fa lico, lilwaniso, mali kamba lisepe. Wo ki ona muhupulo wa Baroma, mi Majuda ba swanezi ku kuteka buitamo bwa bona ba sa lifiwi se siñwi.
27“Kamukwaoswana, haiba ndwa i kala ku tahela sicaba sa Majuda pili, ni bona Baroma ba swanezi ku tusa mo ba konela kaufela ku ya ka mo ku tokwahalela. 28Kono lila li si ke za tuswa ka lico, lilwaniso, mali kapa lisepe. Wo ki ona muhupulo wa Baroma, mi ba ta kuteka buitamo bo, ba sa picauki.
29“Ze ki zona litumelelano ze ne li ezizwe ki Baroma ha ba lumelelana ni Majuda. 30Haiba ha ba nze ba swalisana cwalo, i be ba bañwi ba bata ku ekeza kamba ku zwisa se siñwi, ba ta lumelelwa ku eza cwalo ku si na butata, mi se si ka ekezwa kapa ku zwiswa, si ka latelelwa.
31“Haili ka za bumaswe bw'a n'a ezize Mulena Demetriusi ku bona, lu se lu ba ñolezi litemuso, ze li, ‘Kiñi ha mu beile balikani ni batusi ba luna Majuda mwa joko ya manyando? 32Haiba ba ka bilaela bakeñisa mina hape, lu ta ba tusa mi lu ta mi lwanisa mwa liwate ni fafasi.’ ”
Цяпер абрана:
Buka ya Pili ya Makabaeusi 8: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.