Buka ya Pili ya Makabaeusi 11
11
Pitolemi wa Busilela u tusa Demetriusi wa Bubeli kono u shwa ka nako ye swana ni Alexandere
1Cwale mulena wa Egepita a kopanya mpi ye tuna ya masole ba bañata hahulu sina mushabati wa liwate, ni lisepe ze ñata, mi a lika ku nga naha ya Alexandere ka butali kuli a ekeze ku ya hae. 2A funduka ku ya kwa Siria ka manzwi a kozo. Batu ba mwa minzi ba mu kwalulela minyako, mi ba zwela kwande ku t'o mu katanyeza, kakuli Mulena Alexandere n'a laezi kuli batu ba mu amuhele, kabakala kuli Pitolemi n'e li mukwenyan'a hae. 3Pitolemi ha s'a keni mwa minzi, a beya masole ku o muñwi ni o muñwi. 4H'a fita mwa Azoto a boniswa tempele ya Dagoni ye ne cisizwe hamoho ni ona Azoto ni minzinyana ya ona cwalo ye n'e s'e li matota. A boniswa ni litupu ze ne tanamani kai ni kai, ni mashala a b'a n'a cisize Jonatani mwa ndwa, a nz'a kubukanyizwe ku ezwa mabunda kwatukw'a nzila ya hae. 5Ba taluseza mulena z'a n'a ezize Jonatani ka sepo ya kuli mwendi n'a ka nyaza, kono mulena n'a si ka bulela se siñwi. 6Cwale Jonatani a y'o lumelisa mulena kwa Jopa ka likute la bulena, mi ba lumelisana ni ku ina hamoho busihu kamukana. 7Jonatani a sindeketa mulena mane ku y'o fita kwa nuka ye bizwa Eleuterusi, mi cwale a kutela kwa Jerusalema. 8Mulena Pitolemi a ikungela minzi ya kwa makamba mane ku y'o fita kwa munzi wa Selusia. Ka yona nako yeo kamukana n'a nz'a hulisa mulelo wa hae o maswe wa ku lwanisa Alexandere.
9A luma lindumeleti ku Mulena Demetriusi, a li, “U tahe, lu t'o eza tumelelano ya silikani. Ni ka ku fa mwan'a ka wa musizana ya nyezwi ki Alexandere kuli u mu nyale, mi u ta busa naha ya ndat'aho. 10Ni inyaza kabakala ku fa mwan'a ka ku mutu yo, ya batile ku ni bulaya.” 11N'a mu tameleza taba yeo kakuli n'a shwela naha ya hae muna. 12Ha s'a zwisize mwan'a hae ku Alexandere ni ku mu nyalisa ku Demetriusi, a fapahana ni Alexandere, mane sitoyo sa bona sa zibahale. 13Ku tuha fo Pitolemi a kena mwa Antioke mi a yola bulena bwa Asia. Cwale a ba ni likuwani za bulena ze peli kwa toho ya hae, ili ya Egepita ni ya Asia.
14Ka yona nako yeo Mulena Alexandere n'a li mwa Silisia kakuli batu ba mwateñi ne ba zusize mufili-fili wa petuhelo. 15Kono ha s'a utwa litaba, a kuta kapili ku t'o lwana. Cwale Pitolemi a itwanela mi a mu tula. 16Alexandere a sabela kwa Arabia, mi Mulena Pitolemi a eza mukiti wa ku tula kwa hae. 17Muarabu ya n'a bizwa Zabudiele a puma toho ya Alexandere mi a i lumela ku Pitolemi. 18Mwamulaho wa mazazi a malalu, Mulena Pitolemi a shwa, mi masole ba Maegepita ba ba ne ba li mwa makwakwa ba bulawa ki bañi ba naha. 19Cwale Demetriusi a ba mulena ka silimo sa mwanda ka mashumi a silezi ni ze supile.
Demetriusi ni Jonatani ba utwana
20Ka yona nako yeo Jonatani a kopanya banna ba Judea ku y'o lwanisa Sisabelo sa mwa Jerusalema, mi ba eza limishini za ndwa ze ñata za ku itusisa kwa ku si lwanisa. 21Kono batu ba bañwi ba ba maswe, ba ba ne ba toile sicaba, ba ya ku mulena mi ba y'o mu bulelela kuli Jonatani u lwanisa Sisabelo. 22Mulena a nyemiswa ki litaba zeo. A sa utwa feela cwalo, a ya kwa Pitolemaisi. A ñolela Jonatani ku mu bulelela kuli a tuhele ku lwanisa Sisabelo, mi a tahe kapili kwa Pitolemaisi a t'o katanyeza mulena, kuli ba t'o ambolisanela kwateñi.
23Jonatani h'a utwa cwalo a laela kuli ba zwelepili ku lwanisa Sisabelo. Kih'a keta bahulu ba Isilaele ni baprisita ku ya hamoho ni yena. 24A nga ni gauda, silivela, liapalo ni limpo ze ñwi ze ñata mi a itombola, a ya kwa Pitolemaisi ku y'o bonana ni mulena mi a hapa pilu ya hae, mane a mu tabela. 25Ba bañwi feela ba kwa bafetuheli ne ba til'o mu tameleza litaba. 26Kono mulena a mu eza hande sina mo ne ba mu ezelize b'a n'a yolile, mi a mu hulisa hahulu fapil'a balikani ba hae kaufela. 27A mu tiisa ku ba yena muprisita yo muhulu, hamohocwalo ni litulo ze ñwi z'a n'a s'a na ni zona, mi a mu kenya mwa Sitopa sa Balikani Bapili.
28Jonatani a kupa kuli mulena a takule Judea mwa mutelo, hamohocwalo ni linaha ze talu za Samaria, mi a mu sepisa kuli u ta mu fa mali a muwaya-waya a eza mianda ye milalu.
Liñolo la bubeli
29Mulena a lumela mi a ñolela Jonatani mañolo a kuli ku ezahale cwalo ka yona nako yeo, a li, 30“Na, mulena Demetriusi, ni lumelisa wena mwanahesu Jonatani ni sicaba sa Majuda.
31“Lu se lu ñolezi mwanahabo luna Lasitenesi ku mu zibisa za hao, mi cwale lu ku lumela liñolo le li swana ni le lu mu lumezi ku ku zibisa za teñi. 32Manzwi a mwa liñolo leo ki a, ‘Na, Mulena Demetiriusi, ni lumelisa mushemi wa ka Lasitenesi. 33Ni ku zibisa kuli ba sicaba sa Majuda ki balikani ba luna mi ba eza hande liswanelo za bona ku luna. Cwale kabakala likezo za bona ze nde ku luna, lu hupuzi ku ba bonisa busepahali bwa luna. 34#1 Mak 10.30 Lu ba file maata a ku busa naha ya Judea ni likiliti ze talu za Afarema, Lida, ni Ramataima, ili ze ngilwe kwa naha ya Samaria mi li kenyizwe kwa Judea hamoho ni ze mwatas'a zona kamukana kuli li be za ba ba eza litabelo mwa Jerusalema, bakeñisa mali a mitelo a n'a fiwanga mulena ka silimo ni silimo, ni mali a fa lico ni a litolwana. 35Haili ka za litukelo za luna za bulishumi ni mitelo ze n'e lu lukela ku fumana fa lizwai ni mitelo ya naha, ku tuha kacenu le lu ba lukuluzi kuli ba si ke ba li tela hape. 36Ku zwa kacenu ha ku na se si ka ngiwa ku zona kuya kuile.
37Cwale u eze liñolo le li swana ni lona le, li fiwe Jonatani, mi li beiwe fa lilundu le li kenile, ili fa sibaka se si bonahala.’ ”
Demetriusi wa Bubeli u piliswa ki makuta a Jonatani
38Mulena Demetriusi h'a bona kuli naha n'e li mwa kozo ka nako ya puso ya hae, ni kuli ne ku si na ba ba ne ba mu lwanisa, a lukulula makuta a hae mi a hapeleza batu kaufela ku kutela kwa minzi ya bona, haisi feela mpi ya balicaba b'a n'a ngile mwa lioli za mwa macaba. Ka ku eza cwalo a toiwa ki makuta a n'a sebelize ni bo kukw'a hae. 39Tirifo, ya n'a li yo muñwi wa batusi ba Alexandere h'a bona kuli makuta kamukana n'a ñoñoleha bakeñisa Demetriusi, a ya ku Muarabu ya n'a bizwa Iamuleku, ya n'a hulisize Antiokusi mwan'a Alexandere yo munyinyani. 40A mu kupa hañata kuli a lumelelwe ku yolisa mushimani yo fa bulena mwa sibaka sa ndat'ahe. A mu bulelela za muhupulo wa Demetriusi ni mw'a halifiselize makuta a hae. A ina kwateñi nako ye telele.
41Ka yona nako yeo Jonatani a kupa Mulena Demetriusi kuli a zwise masole mwa Sisabelo sa mwa Jerusalema ni ku zwisa makuta a limpi mwa minzi ye silelelizwe, kakuli kamita ne ba lwanisanga Isilaele. 42Demetriusi a alaba Jonatani, a li, “Ha ni na ku eza feela cwalo ku wena ni sicaba sa henu, kono ni ka ku hulisa hahulu haiba ni fumana sibaka. 43Cwalehe, ka nako ye u ni lumele mpi kakuli masole ba ka kaufela ba ni tobezi.”
44Jonatani a mu lumela masole ba likiti ze talu ba lindume. Ba ya ku yena mwa Antioke. Ha ba fita ku mulena, a taba hahulu h'a ba bona. 45Bañi ba munzi ba kopana hamoho fahal'a munzi. Palo ya bona ne li likiti ze mwanda ka mashumi a mabeli, mi ba lela ku bulaya mulena. 46Mulena a sabela mwa ndu ya hae, mi batu bona ba kwala linzila za muleneñi mi ba kala ku lwana. 47Cwale mulena a biza Majuda ku t'o mu tusa. Bao, kaufela bona ba mu beya mwahali, mi ku zwa fo, ba hasanela mwa munzi. Ka lona lizazi leo ba bulaya batu ba likiti ze mwanda kwa bañi ba naha. 48Ba cisa munzi mi ba hapa tutu ni ku pilisa mulena ka yona nako yeo. 49Bañi ba naha ha ba bona kuli Majuda ba hapile munzi, ba palelwa mi ba itilelela ku mulena, ba li, 50“U lu fe kozo, mi Majuda ba tuhele ku lu lwanisa.” 51Ba nepela lilwaniso za bona fafasi mi ba koza. Majuda ba lumbiwa hahulu ki mulena ni batu kamukana ba mwa mubuso wa hae. Ha ba se ba bubanile mwa mubuso wa mulena, ba kutela kwa Jerusalema ba nze ba lwezi ze ne ba il'o hapa. 52Mulena Demetriusi a zwelapili mwa mubuso wa hae, mi naha ya iketa mwa puso ya hae. 53Kono z'a n'a sepisize kaufela za ba buhata feela. A fapahana ni Jonatani. A tokwa ku fa Jonatani se siñwi ka z'a n'a tusizwe ki Jonatani kamukana, mi a kala ku mu kataza ka linako kamukana.
Jonatani u hanyeza Demetriusi
54Mwamulaho wa zeo, Tirifo a y'o kuta a na ni mushimani yo munyinyani, yena Antiokusi, mi a t'o yoliswa ku ba mulena. 55Makuta kamukana a n'a zwisize Demetriusi a kena ku Antiokusi, mi a lwanisa Demetriusi. Cwale yena a tulwa mi a saba. 56Tirifo a hapa litou hamohocwalo ni Antioke.
57Cwale Antiokusi yo, yo munyinyani, a ñolela Jonatani liñolo, a li, “Ni ku fa maata a ku ba muprisita yo muhulu, ni kuli u buse likiliti ze ne, mi hape ni ku keta kuli u be yo muñwi wa Balikani ba Mulena.” 58A mu lumela mikeke ya gauda, mi a mu lumelela ku nwela mwa sinwelo sa gauda, ni ku apala siapalo sa bulena ni pini ya mendulu ya buhulu. 59A keta mwanahabo yena Simoni ku ba muzamaisi yo muhulu wa mpi, ku zwa kwa mululwani wa Tire mane ku y'o fita kwa milulwani ya Egepita.
60Jonatani kih'a funduka mi a zwelapili mwa litolopo za mwabuse bwa Nuka ya Yuferati mi mpi ya Siria kamukana ya t'o kena ku yena ku mu tusa. A taha mwa Ashikeloni mi a amuhelwa ki bañi ba naha, ka likute le lituna. 61Ku zwa fo a zwelapili ku ya kwa Gaza, kono batu ba Gaza ba mu hanisa ku kena. Cwale a u beya mwahali mi a cisa libaka za ona za mwa matuko ni ku hapa tutu ya zona. 62Cwale batu ba Gaza ba kupa kozo ku Jonatani, mi yena a lumela, kono a nga bana ba bashimani ba manduna ba bona, a ba lumela kwa Jerusalema ku y'o ina kwateñi ka swalelele. Cwale yena a zwelapili ku ya mwa naha mane a y'o fita kwa Damaseka.
63Jonatani n'a lemuha kuli bazamaisi ba mpi ya Demetriusi ba se ba fitile kwa Kadeshi mwa Galilea, ba na ni mpi ye tuna, ka mulelo wa ku mu paleliswa ku zwelapili mwa lieto la hae. 64A y'o ba katanyeza. A siya mwanahabo yena Simoni mwahal'a naha. 65Simoni a beya munzi wa Beti-Zuri mwahali, mi a u lwanisa ka zazi ni zazi a nz'a kwalezi bañi ba ona mwahali. 66Ha ba kupa kozo ku yena, a ba lumelela, kono a ba zwisa mwa munzi. A ina ni ku beya mwateñi masole.
67Ka yona nako yeo Jonatani ni mpi ya hae, ha ba se ba tomile mafulo kwatukw'a Lisa la Genesareti, ba funduka kapili mi kakusasana ba fita mwa libala la Hazori. 68Mpi ya balicaba bao ya t'o ba lwaniseza mwa libala i nze i beile makuta a n'a ipatile mwa malundu. Mpi ye tuna ha ne i taha, i libile Majuda. 69Makuta a n'a ipatile a punya, mi a ba beya mwahali ni ku kala ku ba lwanisa. 70Batu ba Jonatani kamukana ba saba, ku tokwa ni ya n'a siyezi, haisi Matatiasi mwan'a Abisalomi ni Judeasi mwan'a Kalufi, be n'e li bona bazamaisi ba mpi ya hae. 71Jonatani h'a bona cwalo a pazula liapalo za hae, a isasa liluli kwa toho mi a lapela. 72Cwale a kutela mwa ndwa mi a tula lila. Zona za saba. 73Cwale batu ba hae ba ba ne ba sabile ha ba bona cwalo, ba kuta mi ba t'o mu swalisa kwa ku matisa lila mane ku y'o fita kwa Kadeshi ko ne ku na ni mafulo a lila, mi ha ba y'o fita kwateñi ba y'o toma mafulo hona ko. 74Ka lona lizazi leo ba bulaya batu ba ba bata ku ba ba likiti ze talu kwa lila. Cwale Jonatani a kutela kwa Jerusalema.
Цяпер абрана:
Buka ya Pili ya Makabaeusi 11: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.