1 Bakorinte 8
8
Puzo ka lico ze fiwa milimu
1Cwale lu talime taba ya lico za ku yumbangeta milimu.
Ki niti kuli “kaufel'a luna lu na ni zibo,” sina mo mu bulelela. Kono zibo ye cwalo i fa hahulu mutu buikuhumuso, kono lilato, lona, li tiisa tumelo ya hae. 2Mutu ya hupula kuli u na ni s'a ziba, hande-nde h'a si ka ziba kale mw'a lukela ku zibela. 3Kono mutu ya lata Mulimu, yo Mulimu wa mu ziba.
4Cwalehe, taba ki ye. Kana lwa lumelelwa ku ca kwa lico za ku yumbangeta milimu? Lu ziba hande kuli milimu ya maswaniso i yemela lika ze siyo, ni kuli Mulimu ki a li muñwi feela. 5Ku na ni ze bulelwa kuli ki milimu kwahalimu kamba fafasi, mi ki mo ku inezi, ku na ni “milimu” ni “malena” ba bañata. 6Kono ku luna, niti kikuli Mulimu ki a li muñwi feela, yena Ndate ya bupile linto kaufela, yena ye lu pilela. Mi hape ku na ni Mulena a li muñwi feela, yena Jesu Kreste, ya bupisize lika kamukana, ni yo lu piliswa ka yena.
7Kono ha si batu kaufela ba ba ziba niti ye. Batu ba bañata ba twaezi hahulu milimu ya maswaniso. Mane ni la kacenu le, ha ba ca lico ze, ba sa hupula kuli ki ze filwe milimu. Ba na ni lizwalo le li fokola, mi ba ikutwa inge lico zeo za ba silafaza. 8Nihakulicwalo, lico ha li koni ku lu suteleza ku Mulimu. Niha lu sa ci kwateñi, ha lu na ku sinyehelwa ki se siñwi. Mi ha lu na se lu ta fumana, niha lu ka li ca.
9Kono mu tokomele kuli tukuluho ye mu bonisa mwa likezo za mina, i si ke ya wiseza ba tumelo ye fokola mwa sibi. 10Haiba mutu wa lizwalo le li fokola a ka ku bona, wena ya na ni ye bulelwa zibo, u cela mwa sibaka mo ku pailelelwa milimu, kana a si ke a tiya pilu ku ca lico ze filwe milimu, na? 11Mi kamukwaocwalo, mutu ya fokola yo, ili mwanahenu, yo Kreste a mu shwezi, u ta sinyehelwa ki bupilo sakata kabakala zibo ya hao! 12Ka ku foseza cwalo banabahabo mina, ni ka ku holofaza lizwalo la bona le li fokola, mu foseza yena Kreste kasibili. 13Ka libaka leo, haiba sico si kenya mwanahesu mwa sibi, na kasibili, ha ni sa tola ni ca nama ya ku yumbangeta milimu hape, kuli mwanahesu a si ke a kena mwa sibi.
Цяпер абрана:
1 Bakorinte 8: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.