مَتّی 4
4
أمتِحان عیسیٰ
1عیسیٰ بَعَد ما إتْعَمَّد، روح الْإلَه هِدَاه لِلْبَر خاطِر إبْلیس یِمتَحنه. 2عیسیٰ مِن بَعَد أربَعین یُوم وَ أربَعین لِیلَة صِیَّام چان یُوعان. 3وَ إيّه إلْلي یِوَسوِس وَ گال: «لُو أنتَ ابن الْإلَه، گِل لِهَذا الصَّخَر یِصیر خُبُز!» 4عیسیٰ گال: «مِکتوب بي التُّورات إلْلي:
«”الْإنسان مو عایِش بِس عَل خُبُز،
بَل بي کِل کِلمه إلْلي تِطلَع مِن حَلگ الْإلَه.“»
5بَعدِین إبْلیس خِذَه إلَیٰ أورشَلیم، مَدینَه الْمُقَدَّسه وَ حَطّه فُوگ الْمَعبَد 6وَ گِلَّه: «لُو أنتَ ابن الْإلَه، ذِب نِفسِک لِحَدِر، لِأن مِکتوب بي زَبُور داوود:
«”الْإلَه راح یُؤمُر مَلائِکته عَنَّک
وَ ذاکول راح یِکُضّونَک عَلَیٰ إیدِیهُم،
خاف إتطِّگ ریلَک بي صَخره.“»
7عیسیٰ جاوَبه: «هَي هَم مِکتوبه إلْلي،
«”لا تِمتِحِن الرَّب، إلَهَک.“»
8بَعدِین، إبْلیس خِذَه عَلَیٰ یِبِل وایِد عالي وَ راواه جَمیع سَلطَنات الْعالَم وَ مَجِدها 9وَ گال: «لُو إتطیح عَلَیٰ الْگاع وَ تِسجِد لي، إنْطیک هِذِن کِلهِن.» 10عیسیٰ گال: «إبتِعِد یا شَیطان! لِأن مِکتُوب:
«”أعبِد الرَّب، إلَهَک
وَ بِس أخِدمه هُوَّ.“»
11بي ذیچ الْلَحظه إبْلیس تَرَکه وَ فِجأَةً إیَّوا الْمَلائِکه وَ گامُوا یِخِدمونه.
بِدایَة خِدمَة عیسیٰ بي الْجَلیل
12عیسیٰ مِن سِمَع أعْتِقلُوا یَحییٰ، رِجَع لِمَنطَقَة الْجَلیل. 13هُوَّ أوَّل راح إلَیٰ مَدینَة ناصِرَه وَ بَعدِین تِرَک أهناک وَ نِزَل لِمَدینة کَفَرناحوم وَ سِکَن أهناک. کَفَرناحوم چانَت جِنب بَحیرَة الْجَلیل وَ بي أرض أجداد أقوام زِبولون وَ نَفتالي. 14صارَت هَي خاطِر یِتْحَقَّق کَلام إشعیَاء النَّبي اإلْلي چان گایِل:
15«أرض زِبولون وَ نَفتالي،
عَلَیٰ طول طَریق إلْلي یِنتِهي لِلْبَحیرَه،
بي شَرق نَهر الْأُردُن
جَلیل الْأمَم؛
16نَاس إلْلي چانُوا عایْشین بي الظَّلام،
شافُوا نور عَظیم،
وَ عَلَیٰ ذاکول إلْلي چانُوا عایْشین بي ظَلال الْمُوت،
أشرَق عَلِیهُم النُّور.»
17مِن ذاک الزَّمان عیسیٰ أبتِدَء یُوعِظ بي هَي الرِّساله إلْلي: «توبُوا، لِأن إتگَرَّب مَلَکوت السَّماء!»
تِلامیذ عیسیٰ الأوَّلین
18فِرِد یُوم عیسیٰ مِن چان یِتْمَشَّیٰ یِم بَحیرَة الْجَلیل، شاف أثنَین خُوّان واحَد مِنهُم أسمه چان شَمعون، مَعروف بي پِطرُس، وَ الثَّاني آندریاس، إلْلي چانُوا صَیَّادین سِمَچ وَ چانُوا یِذِبّون الْشِبَچ بي الْبَحیرَه. 19گال ألهُم: «أتِبعوني إلْلي راح أصنَع مِنکُم صیَّادین النَّاس.» 20وَ إبْسَع ذِبُّوا الْشِبَچ وَ راحُوا وَراه. 21عیسیٰ مِشه بَعَد إشوَیه، وَ شاف بَعَد أثنَین خُوّان، یَعقوب وَ یُوحَنَّا وَ أبوهُم زِبِدي إلْلي چانُوا بي الْبَلَم وَ چانُوا یِجَهزون شِبَچهُم. وَ عیسیٰ دَعاهُم عِندَه خاطِر یِتِبعونه؛ 22ذاکول إبْسَع تِرکَوا الْبَلَم وَ أبوهُم وَ راحُوا وَراء عیسیٰ.
عیسیٰ یِشفیٰ الْمَرضیٰ
23عیسیٰ چان یِفتَر کِل مَنطَقَة الْجَلیل وَ چان یِعَلِّم بي مَحَل عِبادات الْیَهُود. وَ وَین ما چان ایروح چان یِعلِن بِشارَة الْمَلَکوت وَ چان یِشفي کِل وَجَع وَ مَرَض. 24چا إنتِشرَت سِمِعته بي کِل ذیچ المَنطَقَه وَ حَتَّیٰ هَم وِصلَت إلَیٰ سُوریه، وَ النَّاس یابُوا یِمَّه جَمیع الْمرضیٰ الْمُصابین بي أمراض وَ أوجاع مُختَلِفه وَ هُوَّ شِفاهُم، مِن جُملَتهُم چانُوا الْمِتلَبسین أرواح الْشَیطانیّه وَ الْمَصروعین وَ الْإمگَرُّمین. 25چا مِشُوا وَراه مَجمُوعه چِبیره مِن مَنطَقة الْجَلیل وَ مِن مَنطَقَة دِکاپولیس وَ مِن مَدینَة أورشَلیم وَ مَنطَقَة الیَهُودیَّه وَ مِن شَرق نَهَر الْأُردُن.
Цяпер абрана:
مَتّی 4: ACM
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
©️2024 Korpu Company