Anihiburu 7
7
Imerikizẹdẹkị Ohirẹsụ irehi Ohomorihi
1 #
Oyn 14.17-20
Imerikizẹdẹkị ọnọọ vị ohinọyị Ịsarẹmị, dị ọ rẹ vị ohirẹsụ irehi Ohomorihi yị Ohomorihi ana nẹba hu keekere nị. Abụrahamị ộ và hụrị ịrẹkụ aa vẹ, ọ mẹ̀ na wụ ohinọyị ẹnyị aanị. Imerikizẹdẹkị ộ va gẹrị ọ, dị ọ mẹ̀ aduwaa yọ nị. 2Dị Abụrahamị sị agẹẹwụ ịsa ọnị ọ dọ yọ nị. Ịpaapa, iruvo ịrẹha Imerikizẹdẹkị ọ vị Ohinọyị Ọnịzẹyịza; ohinọyị Ịsarẹmị ọ vị nị, agụvị avọọ, dị a rẹẹ̄ hị́ ọ ohinọyị ẹngwọọrọ nị. 3Imerikizẹdẹkị ọ yị nyị ada, à vị ọnyị, ọ yị rẹ nyị ịpa ịrẹsụ ọnyọọnyị. Ẹ́ yị nyị ka ẹkụhị aanị-aanị a sị maa nị, ẹ́ yị rẹ nyị ka ịhị aanị-aanị o sú nị. Vị ọ sị mẹẹ anka Ozi Ohomorihi avọọ nị, ọnị ọ vị ohirẹsụ ọbanyị irehi Ohomorihi pooro nị. 4Wéé re ịzị ọnọrụ ọnọọ mẹhị nyị ụbanyị ne tu? Abụrahamị ohiku ayị ộ sị agẹẹwụ ịsa ọnị ọ dọ yọ. 5#Ịrị 18.21Imosiisi ộ mẹ̀ ọda yị anovwoovu Ireevi anaā mẹ ohirẹsụ irehi Ohomorihi ka ẹ̀ẹ dọ Anisirẹrị nịnị agẹẹwụ. Anda ẹnịnị ẹnẹ ẹyaa dọ agẹẹwụ aanị yị vị ezi Abụrahamị. 6Ama Imerikizẹdẹkị ọnị ọ yị vị anovwoovu ẹnịnị, ộ dọ Abụrahamị agẹẹwụ, dị ọ rẹ mẹ̀ aduwa yọ nị. Abụrahamị ọnọọ Óhomorihi hị́ eku yị nị. 7Ẹ yị nyị ka àa jị ọ ịrẹka ka ọza ana mẹ ka ò zé yị ọza o huna ọza ọnị ọ mẹ ka ò zé yị nị. 8Aza anaa dọ agẹẹwụ aanị, eni vee sú. Ama â chẹrẹ ẹ tụ́ ini Iwe Ohomorihi ka Imerikizẹdẹkị oni o yi sú. 9Àa ka na kà a, Ábụrahamị mẹ sị agẹẹwụ yị Imerikizẹdẹkị, vị ọ sị mẹẹ ka vị Ireevi anaā dọ agẹẹwụ, ọnị raa tụ́ agẹẹwụ avọọ nị. 10Ya zụ kà a ka Ireevi yị yà ịnị ẹngụ Abụrahamị ana vị ohiku anị, ụmẹ ọnị Imerikizẹdẹkị sị na gẹrị Abụrahamị. 11Anisirẹrị nịnị ệ dọ Imerikizẹdẹkị ọda, Ánireevi màa mẹ ohirẹsụ irehi Ohomorihi. Ụkọrọ ẹnịnị ọnọọ ọ̀ọ yaanị zụ mẹ ka aza ẹ̀ gụ, ẹ yị yaanị nyị ka à nyị ohirẹsụ ọsa anka Imerikizẹdẹkị; vị a yaanị aa kà a ka anka Eerọnị nị. 12Àa sị oze ana a zịị̄ sị ohirẹsụ irehi Ohomorihii vara, áa nyị ka à rẹ vara ọda. 13Ananyị yị ọnị yaa kà aanị, ọnị vị ana hụụnị ovwoovu ọsa vẹ. Ẹẹ̀ yị nyị ịpa anị ana vịdị mẹ ohirẹsụ irehi Ohomorihi da. 14Yâ yẹ ka Ananyị yị vị ana chị hụụnị ovwoovu Ijuda vẹ. Imosiisi ọ yị hị́ ịrẹha anovwoovu ọnọọ, àaa kà ịrẹyị ini oze ohirẹsụ irehi Ohomorihi.
Áa nyị ohirẹsụ irehi Ohomorihi ọsa anka Imerikizẹdẹkị
15Ịsị ẹ mẹ ka ya yẹ ịsa ẹnẹnị hu avọọ, ọ vị ka áa nyị ka ohirẹsụ irehi Ohomorihi ọsa anka Imerikizẹdẹkị ọ̀ vẹ nị. 16Ẹ yị vị oze ọda Ovwoovu ọ sị vị ohirẹsụ irehi Ohomorihi. Ịsị ọ sị vị ohirẹsụ irehi Ohomorihi vị ana jẹẹ ịrẹsụ ụkata ọyịyara pooro zịna-zịna. 17#Ahẹ 110.4Â chẹrẹ ẹ tụ́ ini Iwe Ohomorihi ka: Ẹwa vị ohirẹsụ irehi Ohomorihi pooro zịna-zịna anka Imerikizẹdẹkị nị. 18Ịrẹyị oni Ohomorihi vịdị mẹ ọda anị, ọ raà kụ́ ọ kwooze agụvị ka ẹ yị nyị ụkata, ẹ yị rẹ nyị ọgụ yị ọza. 19Ọda Imosiisi ọnọọ ọ yị zụ mẹ ka ọza gụ. Ama ịsị Ohomorihi kụkụ sị vẹ, ọnị sị eyi tụra booro aanị o hu nị, agụvị ka ini oze anị ya zụ gụrị Ohomorihi. 20Ịsa ọsa ọ rẹ vị ka Ohomorihi ộ hị́ eku ka Ijeesu ọ vaa vị ohirẹsụ irehi Ohomorihi nị. 21#Ahẹ 110.4A mẹ̀ sị anovwoovu Ireevi ka ẹ̀ vị ohirẹsụ irehi Ohomorihi, ọza ọ yị hị́ eku yị wa. Dị Ijeesu ọnị va vị ohirẹsụ irehi Ohomorihi, Ohomorihi ộ hị́ eku yọ ka: Ọnị Ohomorihi ọ raà hị́ eku, ọnị ẹ yị vaa vara ayị ka: ẹwa vaa mẹ ohirẹsụ irehi Ohomorihi pooro zịna-zịna nị. 22Agụvị eku ọnọọ, Ijeesu sị zụ̀ ka oto oni Ohomorihi wo o zoza hu nị. 23Ohirẹsụ irehi Ohomorihi ana vọ ẹnị ẹ́ẹ rụrụ, agụvị ka eyee sú, ẹ yị zụ yà ịnị ụkọrọ ẹnịnị pooro zịna-zịna. 24Ama Ijeesu ọnị vị ana yára pooro zịna-zịna. Agụvị avọọ, ẹ yị nyị ka ọza ẹnẹsa ọ̀ na dọ ọ ịrẹsụ, dị ọ̀ọ mẹ ohirẹsụ irehi Ohomorihi. 25Ọza ana àa zị oze ịnị ụvọ anị vẹ ịdị Ohomorihi, ọ zụ dọ wa há ịnị ụmẹ tụra ụmẹ, agụvị ka ọ́ọ yàra pooro zịna-zịna ka ọnị ọ̀ọ da ịpẹẹ yị Ohomorihi agụvị ẹnịnị. 26Ijeesu ọ vị ohirẹsụ ọbanyị irehi Ohomorihi ene rere yi nị. Ọnịnị ọ vị nị, ọ yị mẹ̀ ịsa odivi vụrụ-vụrụ. Ohomorihi ọ raà sị ọ hụụnị akakana ọnịvị nịnị, dị ọ sị ọ tụ́ ẹbẹẹba keekere nị. 27#Ire 9.7Oni e yi véné ohirẹsụ ẹbanyị irehi Ohomorihi ana vọ. Ẹ yị nyị ka ọ̀ọ mẹ̀ ịsọvọ eyinị-eyinị yị ịvị ẹngụ anị da, ọnịrị agụvị ịvị aza ana vọ. Ụpẹ ọnya gene-gene ọnị mẹ̀ ịsọvọ anị nị, ụmẹ ọnị ọ sị ẹngụ anị mẹ̀ ịsọvọ. 28Ọda Imosiisi ộ nyị aza ẹnẹ ẹ̀ yị gụ ka ẹ vị ohirẹsụ ọbanyị irehi Ohomorihi. Ama oto oni Ohomorihi wo, ọ tụra ọda vẹ nị. Ọnị ọ nyị Ozi Ohomorihi ana a mẹ ka ọ gụ pooro zịna-zịna nị.
Цяпер абрана:
Anihiburu 7: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.