MARK 2
2
Jisu Le Terothonyu Nme Thyüngwa Keshü
(Mt 9:1-8; Lk 5:17-26)
1Jon keshanyu siki Jisu le Kapernaum nyu niyülo ntsin a-le ka nme nyu bin tsekethyü mele sha gunla. 2Tson-o temi kechon le ryüo kequen kelo le gü kakhin keti-e temi bin ndila; tsontsin a-le anyugun senthyü so. 3Tsükatsü temi mizi le terothonyu nme pen-o a-ki ryü. 4Lo anyugun le temi dan genyu a-ki yüloshvu lao ka soki a-le kebin ntsen ka bophelo; tson-o terotho gü lo a-jü kesin pe Jisu mhundyü ntsen ka hoshü. 5Tsontsin Jisu le temi tsüdan ketenyen hyulo njüo terotho gü ka, “A nyugü, nkemu jü pe ntsüla sele nye.”
6Ai lesükeshatsin nyu dan peha le tsünyu bin-o anyugun le anyugun nyunki, 7“Temi higü le nyuthyüo hihontse zo hü nla? A-le Sunggigü nkhin bin laso, Sunggigü a-me segü le me kemu jülo gwa tila?”
8Tsontsin Jisu le anyugun kerüchün shalo njüo anyugun ka, “Hagun le nyuthyüo hagun nyuki hihontse kethyü rüchün hü nla? 9Terothogü ka, ‘N kemu dan jüshü pe ntsüla sele,’ tsonkezo lo ‘So-o njü khisen-o tsonchülo chi,’ tsonkezo hihvu hi digü le zo nne kvu tila? 10Ai temi kemu jü pe tsülo nrün kazü hinyu Temi Nyugü kekvu le kebin hagun no shalo kenyü genyu.” Tson-o a-le terotho gü ka, 11“Ale nka zoshü bin nyo, solo-o njü khisen-o nka ki gunlo chi!”
12Tsonshü ntsin a-le anyugun aphu mhundyü ka a-jü khisen chwila. Tsontsin anyugun aphu anyugun dunthyü, lo Sunggigü shwen-o, “Agun le thame kae hihontse kethyü hyu shwimvu.”
Levi Kokelo
(Mt 9:9-13; Lk 5:27-32)
13Tsüsika a-le züda khoki ni gun zhü; lo temi dan aphu a-ki ryülo, tsontsin a-le tha zope anyugun senthyü shü. 14Lo a-le tson gun kezhü ka, Alfia nyugü Levi le khajana keshvubin nyu kebin hyulo-o a-ka, “Asithenlo re.” Lo a-le solo njüo a-sithen tinla.
15Lo tsüsika a-le temi tsügü ka nyu ho titseo binlo, lo tsünyu khajana keshvunyu lo kemunyu kechon le ryüo Jisu lo a-le senthyükelo nyu dan zen-o binlo; anyugun temi kechon le a-sithen kehü genyu. 16Tsontsin lesükeshatsin nyu lo Farisinyu dan le a-le kemunyu khajana keshvunyu zen-o tyütsü kebin hyushü ntsin a-le senthyükelo ju ka, “A-le nyu thyüo khajana keshvu nyu lo kemunyu zen-o tyütsü hü nla?”
17Lo Jisu le jotsü shalo ntsin tsüdan ka, “Kesherhün nyu le dawa keshanyu zengü thame kethyüi ndi, ai kehonyu genyu. Ale kentsen nyu mvule kemunyu kolo titse ryü.”
Nyen-o Kehikethyü Rüla
(Mt 9:14-17; Lk 5:33-39)
18Johan sikethen nyu lo Farisinyu le nyen ryü; lo tsükatsü me le ryüo a-ka, “Nyuthyüo Johan sikethen nyu lo Farisinyu dan sikethen nyu dan we nyen hü, ai nsikethen nyu dan we tsühontse nyen hü mvula?” tson-o ketsoshü.
19Jisu le anyugun ka, “Temi nme le tenulo-o ho kebin ka senhügü le anyugun zen kebin ka a-sin nyu ju no nyenlo gwa ole? Senhügü le anyugun zen kebin then tson loho. 20Ai a-gwünkho le ryü ti, lo anyugun le nyen-o rüshvu ti. 21Temi nme-e phi keshün sengü phiren ge nkhvü kesin hümvu, tsonyatselo sen gü nkhvü keshü phi gü le ligü sürhenla ti, a-kon le a-keshün le a-ren sürhen lahü, tson-o nrhen nshvu kvu lahü. 22Lo temi nme-e vain zü keshün pe thyügi tsun when ka shü hü mvu; tson yatselo thyügi tsun pvürhen lati, tson-o vain zü-e lo thyügi tsun-e nke lati; ai me le vain zü keshün pe thyügi tsun keshün ka shü hünyo.”
Senthyükelonyu Le Sabbath Jon Nyü Lopwe Nrhi Ketyü
(Mt 12:1-8; Lk 6:1-5)
23Tsüsika a-le Sabbath jon nme nyü me lojvü ki tsüjü laryü, a-le senthyükelo nyu ju le tsonchü nsen me lopwe nrhityü sola. 24Tsontsin Farisinyu dan le a-ka, “Hire, anyugun le nyuthyüo Sabbath jon nyü thyüzükemvu thyü hü nla?”
25Tsontsin a-le anyugun ka, “Nduka David le tha tyü nrün ndi kela ka lo nnyon kelo ka a-ko lo a-zen kehü nyu ju tse thyükethyü hagun le thame kae swüshwi mvu ole? 26A-le Abiathar le peshükeda thyü kebin ka Sunggigü ka nyu yüo peshü gü kemvu we tyü kethyü tejvü kemvu, pe me hi kehü tensü tyü, tson-o khipe a-zen kehünyu ju ko tsüo no tyü mvu ole?”
27Tson-o a-le anyugun ka, “Sabbath jon genyu temi thyüshü mvule, temi genyu Sabbath jon thyü keshü le. 28Tsügenyu Temi Nyugü le Sabbath jon so-e Npugü le.”
Цяпер абрана:
MARK 2: REGSBSI
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.