Папулярныя біблейскія вершы з Anihiburu 11

Падзяліцца

Sị aa hị́ ka ọza ọ́ọ sị ayị tụra Ohomorihi? Ọza ọ̀ọ sị ayị tụra Ohomorihi, ọnị ọ vị ka ọ́ọ yẹ ịnị ayị anị, ọyị jị ọọ ịrẹka ka ịsa ọnị ọnị aa tụra eyi anị aanị, oni vee ree dọ. Dị ọ rẹ yẹ ịnị ayị anị ẹtẹẹtẹrẹ ka ịsa oni oni ò yi re aanị yà ịzọọ ịzẹyịza nị. Anụmẹ ịyẹẹyẹ ẹ́ẹ vavọọ sị ayị tụra Ohomorihi, dị Ohomorihi kà ọda yị wa nị.

Ọza ẹnẹ ẹ̀ yị sị ayị tụra Ohomorihi, ọ yị nyẹngụ zé Ohomorihi eyi vụrụ-vụrụ. Iruvo ọ vị ka ọza ana àa vẹ ịdị Ohomorihi, áa nyị ka ọ̀ vịdị dọ wụ́ da ka Ohomorihi yà ịzọọ, ọnịrị ka ọọ̄ sị ọgụụ yị aza ene èe sì ọọ.

Agụvị ka Yáa sị ayị tụra Ohomorihi, ọnị ọ mẹ ka ya zụ yẹ ka ịrẹyị Ohomorihi ọ sị mẹ ẹhẹ nị; ọnị ọ vị ka ịsa ene hi ịnị ẹhẹ ọnị yaa sị eyi ayịị re aanị, vị ana hụụnị ịsa ọnị ọza ọ̀ yị zụ sị eyi re vẹ.

Abụrahamị ọnị ọ rẹ sị ayị tụra Ohomorihi, agụvị avọọ ộ wụ́ ịrẹyị chire Ohomorihi. Ịnị ụmẹ ọnya Ohomorihi ộ kà a yọ ka ọ̀ kwẹẹtẹ, dị ọ̀ nọ ịnị ẹtẹ ọnya aanị ọnị ọnị vaa sịị yọ. Ịzẹyịza, Abụrahamị ộ kwẹẹtẹ, dị aa yịị na kẹnẹ nị. Ọ yị hyakụ yẹ ịzị ọ daka aa nọ. Ini oze ka Abụrahamị ộ sị ayị tụra Ohomorihi, ọ na ra ịnị ẹtẹ oni Ohomorihi ka ẹ yị zụ nyị ka ọnị ọ yị vaa sịị yọ. Ộ yà ịzọọ anka ọzọga. Ọnị beri Ayiziiki ọnịrị Ijekọvụ oni Ohomorihi rẹ hị́ eku ọnọọ vị ana ra ịnị ajẹngụ kẹnẹ

Inowa ộ sị ayị tụra Ohomorihi; agụvị avọọ ộ sị ụtọ pe Ohomorihi, ọ màa kà a ọnọ agụvị ịrẹyị ana aa vẹ. Inowa ọọ̀yị daka sị eyi re ịsa ẹnẹẹ, ama ộ wụ́ ịrẹyị chire Ohomorihi. Agụvị avọọ dị ọ mẹ ẹpa ọbanyị ọnya ana dọ ọnịrị aneehi anị há nị. Ini oze ọnọọ, ộ jị ịvị yị anẹhẹ. Ohomorihi ộ zaa ịrịka tụ́ ịnị ọnịzẹyịza, agụvị ka ọ́ọ sị ayị tụra Ohomorihi.

Enọkị ọnị ọ rẹ sị ayị tụra Ohomorihi. Agụvị avọọ Óhomorihi sị sị ọọ nọ ẹbẹẹba ireyi-ireyi, dị ò yi sú nị. Ọza o yi kuku re e, agụvị ka Ohomorihi ọ raà sị. Dị a va sị ọọ nọ ẹbẹẹba, â vịdị dọ ivenu tụ́ ọọ ka ebira anị ô zé Ohomorihi eyi.

Ini oze ka Ẹba ộ sị ayị tụra Ohomorihi, ọnị ọ mẹ ka Ẹba ọ̀ mẹ̀ ịsọvọ ene huna Íkeeni nị. Ohomorihi ộ zaa ịrịka ka ọnịzẹyịza ọ vị nị, dị ọ dọ ẹyịza anị nị, agụvị ka ộ sị ayị tụra Ohomorihi. Ẹba ô wusu; ama agụvị ka ộ sị ayị tụra Ohomorihi, aa yịị kà ịrẹyịị yị pooro ve tù ajịnị.

Isera ọnị ọ rẹ sị ayị tụra Ohomorihi, agụvị avọọ di o zụ zyẹẹ, dị ọ ma ozi ọnya nị. Ịnị ụmẹ ọnọọ, Isera osi huna ọza ana vọrọ ka ọ̀ kụkụ zụ ma ozi. Ama Isera ộ sị ayị tụra Ohomorihi ana ka ọnị vaa mẹ̀ ịsa ka ọnịzẹyịza ọ vị nị.

agụvị ka Abụrahamị ee zí eyi ẹkụra ọnọọ oni Ohomorihi sị dà, ana ahịka vị ọ nyayịnẹ jẹẹ geri-geri nị.

Imosiisi ọnị ọ rẹ sị ayị tụra Ohomorihi. Ọnị ọ mẹ ka ọ mẹ̀ sị vịra, asị ọ zẹẹ ka àa hị́ ọnị ka ozi ohinọyị Anijipiti ọnẹẹ ọ ma ọnị nị. Ọ vana dọ ka ọnịrị aza Ohomorihi è duduu rị ụya, àa sị ka ọnị ọ va naa rị ẹhẹ chee, dị ọ̀ mẹ ịvị. Ô ro ka ọza òo sị eyi wụ̀ ọza agụvị Ikirisiti, ọ́ọ nyị ụbanyị huna avaba ụbanyị ene hi Ijipiti, agụvị ka Imosiisi ọ́ọ sị eyi tụ́ ịnị ọgụ ana aa vẹ ị́rẹma. Ịnị ka Imosiisi ọ sị sị ayị tụra Ohomorihi, ọ mẹ ka ọ̀ hụrẹ Ijipiti. Ọ yị hyakụ hí angwa ka ohinọyị ọnọọ aa kụ́ ayị. Ộ jẹẹ pe Ohomorihi geri-geri, agụvị ka vị ọ sị mẹẹ ka vi ee re Ohomorihi ọnị ọza ò yi zụ re avọọ nị.

Abụrahamị ộ sị ayị tụra Ohomorihi. Ọnị ọ mẹ ka Óhomorihi mẹ̀ zama a re, ọ̀ dọ ka ọnị ọ̀ sị Ayiziiki, dị ọnị ọ̀ sị mẹ̀ ịsọvọ hi Ohomorihi nị. Abụrahamị Óhomorihi hị́ eku nị, ama ô tenyi ẹngụ ka ọnị ọ̀ sị ozi anị ikonya mẹ̀ ịsọvọ hi Ohomorihi.

Ịrahabị ọsẹrẹka ộ sị ayị tụra Ohomorihi. Ọnị ọ mẹ ka asị a wụ ọọ beri aza ana mẹ akamawụ hi Ohomorihi nị. Aza ene ne yi ẹtẹ ọnọọ re, ọ́ọ dọ wa pe ẹngụ tụ́ ịnị ẹngwọọrọ.

Anisirẹrị nịnị ẹ́ẹ sị ayị tụra Ohomorihi. Ọnị ọ rẹ mẹ ka ẹ̀ zụ jịnẹ Irehu Ovivi anka èe rere zị ụsẹ ị́rẹsụ eteesu avọọ nị. Anijipiti nịnị mẹ̀ ka ẹnị aa sị eyii sì waa mẹẹ, enyi ộ mụnẹ wa.

Anisirẹrị nịnị ẹ rẹ sị ayị tụra Ohomorihi. Ọnị ọ mẹ ka e mè si jesi kara ọvọ ana kara Ijeriko gụ ẹkụhị ịhịmba, ọvọ ọnọọ ò wú và hi ẹtẹ nị.

Ịnị ka ọ sị sị ayị tụra Ohomorihi, ọ mẹ ka ọ̀ sị Eche Ọyịparahu hi ẹtẹ nị. Di o che anya sẹ́ ẹbanoze nị, ka à yị vị avọọ, anggẹẹrị ana wụ ezi ịpaapa aza, va kanyị ẹnị.

Ijosẹẹhụ ọnị ọ rẹ sị ayị tụra Ohomorihi. Ọnị ọ mẹ ka óni mèe ree vee sú, ọ̀ kà ịrẹyị ini oze ka Anisirẹrị nịnị vaa hụrẹ Ijipiti nị. Dị ọ kà a yị wa ịsị a vọrọ ka ẹ̀ mẹ ẹchụkụ anị nị.

Ijekọvụ ọnị ọ rẹ sị ayị tụra Ohomorihi. Ọnị ọ mẹ ka óni mèe vee sú, ọ̀ mẹ̀ aduwa yị ezi Ijosẹẹhụ ọnya-ọnya nị. Ụmẹ ọnọọ ô che ayị za okutẹ anị, dị ọ sị ụbanyị yị Ohomorihi nị.

Ayiziiki ộ sị ayị tụra Ohomorihi. Ọnị ọ rẹ mẹ ka ọ̀ mẹ̀ aduwa yị Ijekọvụ ọnịrị Iisọ, dị ọ kà a yị wa ịsị e vee tù wa ịrẹma ụhwọọ nị.