Goddelike LeierskapVoorbeeld

Jy het die roeping van God gehoor en die belofte ontvang dat Hy met jou sal wees, net soos Hy met Josua was.

Maar waar begin hierdie reis regtig?

Die antwoord mag dalk nie wees wat ons vanuit ons menslike perspektief wil hoor nie. Daar sal nie 'n spesifieke datum of tyd op jou kalender aangedui wees nie; dit lê eerder gewortel in God se volmaakte tydsberekening, sy Goddelike wil, en die moed en krag wat Hy aan ons gee.

Dit was ook waar van Josua. Toe God hom geroep het, het Hy Josua verskeie kere aangemoedig om sterk en vol moed te wees (Josua 1:6-9). Hierdie herhaling het nie net die uitdagings wat vir Josua voorlê uitgelig nie, maar dit het ook beklemtoon dat Josua die vermoë gehad om God se roeping te vervul en om vertroue in dié volk rondom hom te inspireer.

Dit is egter belangrik om te besef dat Josua se krag nie voortgespruit het uit sy eie veerkragtigheid in moeilike tye nie; dit was gewortel in sy onwrikbare getrouheid. Hy word gevier vir sy standvastige geloof in God. Saam met Kaleb het hy vas gestaan in geloof en geglo dat die Israeliete die land Kanaän kon inneem, ten spyte van die reuse op hul pad (Numeri 14:6-9). Josua se getrouheid is een van die eienskappe van 'n ware, Goddelike leier.

Wanneer ons God se roeping ontvang, moet ons ook ’n onstuitbare geloof kweek. Die reis van ’n Goddelike leier is nie altyd maklik nie, en die enigste fondament wat sterk genoeg is om ons te dra, is Jesus Christus en ons geloof in sy beloftes. Soos Josua, moet ons al ons moed en krag bymekaarmaak. Maak jou hart oop vir die werking van die Heilige Gees en laat Hy jou in al jou pogings lei — met die genade en liefde van Jesus.

Goddelike leierskap behels meer as net om mense prakties te lei. Dit sluit ook geestelike leierskap in. Josua het die belangrikheid daarvan verstaan om God se wil en wet te volg tydens sy leierskap. Hy het die volk gelei om hulle verbond met God te hernu en het hulle herinner aan hul toewyding aan Hom (Josua 24:14-15).

Daaruit kan ons as geroepenes vandag nog ’n belangrike les by Josua leer: Hy het nie met ’n ystervuis regeer nie en sy gesag was nie afhanklik van stemme van gewildheid nie. Sy leierskap was gewortel in geloof en gehoorsaamheid aan God.

In my en jou leierskap, as geroepenes in sy koninkryk, word ons geroep om die voorbeeld van Jesus na te volg. Ons moet toegewyd bly aan die liefdesverbond wat Jesus vir ons in Matteus 22 neergelê het. Hier het Jesus die opdrag baie duidelik gemaak toe Hy gesê het dat ons God moet lief hê met ons hele hart, siel en krag — om Hom ons allerbeste te gee — maar ook om ons naaste lief te hê soos onsself.

Gebed:

“Vader, ek vra dat U ons help om getrou te bly aan u liefdesverbond. Versterk ons geloof dag vir dag terwyl U ons lei deur die Heilige Gees in ons harte. Mag die vrugte van ons arbeid in ons roeping vir U aangenaam en aanvaarbaar wees. Amen.”